《小傳日記》大象績差心傷透，魚缸嘆氣調頭走！

　　《小傳日記》花旗國魚缸噚晚休戰，歐洲又冇咩聲氣，搞到香江呢邊今朝悶到瞓著，只能夠
輕輕高開２８點，最多亦只係升６７點至２４２１３。點知中午突然傳嚟壞消息，大象
（００００５）放榜成績差過預期，回購計劃規劃又細；午市甫開大象急急趴低，連帶魚缸都冇
運行調頭向下失守二萬四，一度唔見２３６點。恆指埋單冇咗１８２點收２３９６３；國貨佬好
ＤＤ，腳軟３６點報１０４０８。
　　孖屐倒跌，不過成交依然唔少，約有８７７銀，比噚日（２０日）多逾１２巴仙。
　　聽日有乜重要嘢？除咗新財爺「波叔」首次公布財政預算案外，兩大磚頭股新世界發展
（０００１７）同信置（０００８３）都出業績。話時話，今日磚股普遍向好，新地
（０００１６）仲升３巴仙添。嘩！缸友要望實有咩消息喇！

＊大象業績曳回購規模細，高佬踩多腳粉絲甚閉翳＊

　　大象由今年開始，已好努力咁向上爬，噚日仲炒緊業績有驚喜，曾經去到６９﹒１銀，挑戰
７０大關。可惜，希望愈大，失望愈大；中午放榜，全年列帳基準稅前盈利大跌逾六成至逾７１
億美金，比孖屐預期足足跌多三成，仲要回購規模最多只得１０億美金，又少過上一次，缸友大
失所望，跌到一地眼鏡碎。卒之大象下半場一開市就急跌最多逾４巴仙至６６﹒０５銀，之後仲
畀高盛輕輕踩多腳，微降目標價至７２銀。結果，埋單唔見５巴仙收６５﹒５５。囝囝恆生
（０００１１）都無晒心機，全年少賺四成至１６２億銀，又係差過預期；好在仲有大摩撐腰，
成功彈番上去，逆市微升０﹒１巴仙報１６３﹒３銀。
　　
＊跌穿兩萬四地主卻好揮，瑞信來撐場百麗甚架勢＊

　　百麗（０１８８０）今朝未開市已興奮彈高一成，原來背後有瑞信發功，勁豪爽咁大升目標
價５８巴仙至６﹒３銀，評級就由「跑輸大市」調高至「跑贏大市」。難怪百麗收市有近９巴仙
進帳報５﹒５４元，做咗最威風藍戰喇。
　　生發發（００３８８）一樣獲唱好，中金就升目標價３５巴仙至２４７銀，亦改口叫缸友
「買貨」。可惜大市無力，生發發都無厘神氣，隨市瞓低近１巴仙失２００關，報１９９銀。不
過一日半日表現未必可作準，呢排魚缸成交旺咗咁多，有貨缸友又唔使太失望。
　　
＊中金撥到行港所乏反應，阿爺夠關顧汽車特別醒＊

　　阿爺早日話會研究調整新能源車補貼政策，今日又傳出京津開始諮詢，打算將所有的士換成
電動車。砵砵車東風（００４８９）、比亞迪（０１２１１）興奮彈高約２巴仙，報８﹒８５同
４５﹒８銀。長汽（０２３３３）更加衝前近４巴仙，收９﹒７２銀，仲一度見逾一年高位
９﹒９８銀。
　　又有消息話，阿爺諗緊提高外資投資壽險公司嘅比例，或甚至畀佢地全資擁有壽險子公司。
國壽（０２６２８）即刻跳高近１巴仙，報２４﹒４５銀，盤中創過２４﹒９５元一年新高。太
平（００９６６）都行前近１巴仙，埋單１９﹒０４銀。

＊爺爺愛保保壽仔是個寶，鐵礦銅熱炒半新丁高高＊

　　鐵礦石期貨曾經漲逾４巴仙刷新紀錄高位，加上湖南省年底至今清除咗２７５萬噸「地條鋼
」產能，鞍鋼（００３４７）應聲飛起２巴仙，報６﹒１１銀。馬鋼（００３２３）、首長國際
（００６９７）亦唔輸蝕，斬穫約２巴仙，收２﹒９同０﹒２７銀。
　　花旗話，全球兩大銅礦生產國產量減少，中國需求卻增加，估計銅礦會６年嚟首次出現求過
於供。江西銅（００３５８）、五礦資源（０１２０８）齊齊踢高逾１同近６巴仙，收報
１３﹒８８同３﹒２２銀。
　　仲有孖展水頭充足，大股無睇頭，半新丁安保工程（０１６２７）同松齡護老集團
（０１９８９）成為焦點，齊齊落鑊炒高３０巴仙及２６巴仙，收１﹒３銀及１﹒１３銀。請請
！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。