《小傳日記》天鴿漸逼近，缸外超高溫；內險與內銀，缸內甚興奮！

　　《小傳日記》花旗同北韓局勢愈嚟愈緊張，不過花旗缸友見慣風浪，噚晚（２１日）都無嚇
到雞飛狗走，道指仍收高２９點報２１７０３。　
　　外圍政局不穩，香港呢？今日天氣熱到爆，下午兩點天文台錄得３６﹒６度，係１８８５年
有紀錄以嚟喺濕地公園，更加錄得３９度，真係熱到叫救命。

＊氣溫破紀錄成交急急增，升過三百點中字最開心＊
　
　　缸外熱到爆，缸內同樣熱到爆，就算面對熱帶風暴「天鴿」都一樣無有怕！今朝（２２日）
魚缸喺內險、內房佬強勢下，已經高開１６７點，尾市連內銀佬都加入升市大軍，盤中一度升超
過三百點。結果恆指收市踢起２４６點或１巴仙，收報２７４０１，一口氣收復十天線
（２７２８７點）及廿天線（２７３５１點），勁！中字輩強到不得了，國指當然跑贏恆指成條
街，埋單大漲２０３點或１﹒９巴仙，報１０９５４。
　　唔知缸友係咪驚聽日「天鴿」殺到，魚缸隨時休市無得玩，所以今日Ｔｒａｄｅ定先，又或
者即日來回，全日成交增加到約９０４億銀！
　
＊平保做領軍內險好振奮，ＱＱ與旺旺升市卻無份＊
　
　　呢個星期內險股排住隊派成績表，各位大佬今日都發足力，受龍頭大哥平保（０２３１８）
嘅帶動，板塊全線都升升升。大摩繼續覺得缸友們可以增持平保，仲將目標價由５８銀升到去
６５銀，令平保唔止係內險佬入面排第一，仲係魚缸最好表現，成為最叻藍戰士，今日再次破頂
係６３﹒１插旗，最後埋單踢高逾４巴仙，報６３﹒２銀。
　　街坊國壽（０２６２８）後日（２４日）放榜，表現都唔錯，全日近３巴仙報２３﹒８５銀
；喺星期五（２５日）揭盅嘅財險（０２３２８）都不甘示弱啦，衝前４巴仙收１５﹒４銀，創
２０個月以來新高。太保（０２６０１）仲巴閉，大力踢高近６巴仙，收報３６﹒６５銀，做埋
最勁國貨佬。
　　不過，股王ＱＱ（００７００）就無份威威喇，收市前仲被掟貨，埋單倒跌近１巴仙收
３２４銀。另邊廂，細藍戰旺旺（００１５１）半年少賺近１５巴仙至１５億人幣，缸友相當失
望，離場抗議，搞到急插逾６巴仙收５﹒１９銀，係最差藍戰士。
　
＊細摩升目標６６８即笑，富力今放榜彈起認真俏＊
　
　　中海外（００６８８）噚日中午放榜，中期業績好省鏡，純利２１６﹒５億銀，按年飛起約
２５巴仙，同時，摩通仲維持「增持」評級，「他屐」仲由３２﹒５２銀升到去３４﹒５銀，高
佬都上望３５﹒２銀，刺激股價踢高近４巴仙，報２６﹒４５銀，成為第二叻藍戰士！
　　萬科企業（０２２０２）後日放榜，股價曾經高見２３﹒４銀，仲破埋十天同廿天線添，最
後升逾５巴仙，報２３﹒２５銀，係第二勁國貨佬。街坊恆大（０３３３３）噚日吹起近１８巴
仙，今日就腳仔軟喇，全日股價無奈碌低近２巴仙，報２１﹒６５銀；富力（０２７７７）中午
宣布半年多賺８巴仙，兼調高全年銷售目標，難怪股價應聲彈高近１０巴仙，報１６﹒２８銀。
　
＊沽空來狙擊魏橋心翳翳，洛鉬炒業績中生藥唔曳＊
　
　　魏橋紡織（０２６９８）就慘豬豬喇，被沽空機構Ｅｍｅｒｓｏｎ狙擊，同時又質疑係母公
司嘅「秘密提款機」，結果股價瞓低近６個巴仙，報４﹒３銀。
　　中國生物製藥（０１１７７）噚日收咗市之後公布中期業績，中期盈利１１億人仔，年增近
２６個巴仙添，兩季度合同派息３﹒５港仙添。德銀仲重申「買入」評級，「他屐」仲由７﹒６
銀升到去８﹒２銀，全日跳高近５巴仙，報６﹒８１銀。
　　洛陽鉬業（０３９９３）今個禮拜六（２６日）公布中期業績，今日率先衝前近６巴仙，仲
升破埋十天線（３﹒８０４銀）同廿天線（約３﹒９５９銀）添，報３﹒９７銀。
　
＊中建築供股粉絲即掟貨，麗展大悅城跳起有團火＊
　
　　之前講過中海外續後靚爆，而同系嘅中國建築（０３３１１）中午派成績表，雖然比起舊年
同期賺多咗１１巴仙，每股都有１５仙中期息派；不過，同一時間，又計劃折讓「八供一」淨籌
６３億銀，用嚟做發展同營運資金。失驚無神問缸友拎錢，梗係ｄｉｓｌｉｋｅ喇！中國建築埋
單急插７巴仙，報１１﹒６銀，跌穿２０天線同５０天線。中國建築都要諗諗點先可以令缸友回
復信心啦。
　　麗新發展（００４８８）（臨時編號：０２９７１）開市前有近５億銀嘅市前交易後，下半
場突然衝前６巴仙，報１４﹒７８銀，最高仲去到１５﹒４６銀創四年半以嚟高位添！
　　大悅城（００２０７）宣布，話阿媽中糧集團為咗整合資源同提升中糧集團房地產業務，可
能會重組公司控股權益。有阿媽照住，難怪可以踢高１５巴仙，收報１﹒３７銀。請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。