【搵銀神算】「蘇富比級」拍賣場掛沽域名花費無幾，套現話咁易！

　　《搵銀神算》經過本欄過去兩期嘅分析，相信看倌們喺投資網絡域名呢門生意上，都應略有
研究。嚟到最後一章，就梗係同大家落場實戰，一嘗如何主動「搶域名」而不失霸氣嘅滋味啦。
　　另一方面，前文教過大家如何創造有價值嘅域名，到今章將同大家分享沽貨套現嘅經驗，有
乜門路走貨，才可抓盡每一分油水。最後，再講講點樣防備域名被強搶，教大家如何打呢場「域
名攻防戰」。

＊環球域名大鱷雲集，叫價力高＊

　　當你手執靚貨，奇貨可居，下一步就應諗點樣甩手，如何善價而沽而不失霸氣！相信巴打們
都曾打錯、串錯網址，誤入一啲與目標域址相近嘅網頁。雖然呢類網站內容欠奉，但通通都大字
標題，刊出「Ｆｏｒ　Ｓａｌｅ」橫額掛沽，但呢類留下聯絡方法，情如「姜太公釣魚」願者上
釣。雖然如此，就算無人出價，但數據顯示錯打網址嘅失暈魚何其多，其實唔少呢類網站，單靠
首頁亦可獲相當可觀的廣告收入。
　　唔想守株待兔？看倌們可主動出擊。若北望神州，土炮啲嘅方法，當然要依靠淘寶網啦！歷
史亦有唔少持貨者成功出貨，但就睇你遇唔遇到有緣人啦。
　　若域名「口味」較國際、較洋化，就不妨試拎去「ｓｅｄｏ﹒ｃｏｍ」拍賣平台掛牌。呢類
網站專惹嚟一班環球域名大鱷嚟「濕平」，故出手自然相對高，有信心嘅炒家不妨拎啲珍藏上去
秤一秤，睇睇身價值多少。咪以為呢類「蘇富比級」嘅平台收費高昂，擔心畀人食咗隻車，其實
佢哋採取佣金制，好似以「﹒ｃｏｍ」尾嘅一級「ｇＴＬＤ」（ｇｅｎｅｒｉｃ　Ｔｏｐ－
Ｌｅｖｅｌ　Ｄｏｍａｉｎ），收費僅成交額嘅一成，好值得一博。

＊提防「網絡蟑螂」強搶域名？＊

　　有云「一剎那光輝唔代表永恆」，就連登記咗嘅域名，只要你忘記交域名年費，使用權隨時
可畀人搶走。巴打們或會質疑，多數平台都有信用咭ａｕｔｏ－ｐａｙ，呢類事情又點會咁易發
生？但真係唔好意思，筆者就係「網絡蟑螂」（ｃｙｂｅｒｓｑｕａｔｔｅｒ）魔爪下嘅一位受
害者。
　　話說喺２０１３年頭，筆者有個跟咗７年嘅域名將近過期，滿以為信用咭會自動過數，點知
信用咭因到期被更換，令交易未能成功，錯失續約期限。本諗住等個域名過咗「冷河期」（詳情
見另文），重新流出巿面後再搶佔，點知如意算盤即被打破，就算幾比心機苦按鍵盤上嘅「Ｆ５
」，冀望喺零秒更新得知域名重啟登記，但登記權亦被「網絡蟑螂」秒殺。至於點先可打好呢場
「攻防戰」？另文將詳盡講解。

＊美國白宮、騰訊無權強搶域名＊

　　前文提及，唔少大企業為求「自保名聲」，不惜豪擲千金，向域名持有人「回購」屬於自己
嘅地頭。但有巴打暗底請教任我行，問及若搶先登記域名，會否捱吃官司呢？的確有這可能，他
激動追問：「那麼所有投資，那便付之流水？」大家又唔使咁驚。就算域名被搶、被盜，原持有
人亦可得到保障，我哋不妨參考一下近年嘅相關案例。
　　喺早年，「ｗｈｉｔｅｈｏｕｓｅ﹒ｃｏｍ」（即美國總統官邸白宮之名稱）呢個域名曾惹
嚟唔少風雨。堂堂一國元首官邸名字，竟被有心人登記，最大劑嘅係用作色情網站網址，令花旗
政府好不尷尬。官方梗係曾試圖「重奪白宮控制權」啦，但你夠惡、夠勢力大就掂咩？最後都無
功而還。
　　講近啲，就好似「ｑｑ﹒ｃｏｍ﹒ｃｎ」咁，唔使講都知佢今日係「企鵝仔」
（００７００）嘅網站啦，但其實佢喺十鬆啲年前，曾爆出唔少風雨。缸湖消息指喺２０００年
時，有位仁兄登記咗呢個域名，先唔好理佢咩動機啦，佢的確拎真金白銀，依程序登記的。但喺
使用近５年後，呢個域名離奇地「自動過戶」咗去深圳騰訊。先唔好理邊個用「超技術」，誰對
誰錯都好啦，缸湖中人都將焦點放喺仲裁委員會域名爭議解決中心之上，事關專家組最終判定原
持有人嘅擁有權，令大家放心繼續「投資」。雖然嗰位仁兄重奪域名，但據域名登記資料顯示，
個域名喺２００４年１月由騰訊深圳重新登記，睇怕當年搞得滿城風雨後，雙方已坐低傾掂數。
說到底，申請一個咁嘅域名，無非都係搵油水，總之有錢就好辦事啦。
　　雖然面對國家政府級嘅控訴，但喺法律都會企喺畀錢登記域名嘅一方，所以唔使驚各位嘅
「投資」會被充公啦！

筆者：任我行