《小傳日記》香江魚缸包拗頸，散水潮現心驚驚

　　《小傳日記》新鮮出爐嘅匯豐中國５月份製造業ＰＭＩ初值，小幅回升至４９﹒１，雖則唔
算好驚喜，已經足以推高Ａ仔場。上證指數全日抽高１﹒９％或８３點，收報４５２９點。反而
香江魚缸呢邊就唔多爭氣，偏偏要同祖國魚缸包拗頸。
　　恆指今朝早低開７８點，全日大部分時間都係向下，雖然尾市一度嚟個絕地反擊倒升近３０
點，點知最後都要碌番落去，連１０天線都守唔到，收報２７５２３點，跌６１點或０﹒２巴仙
，主板成交１２４５億銀。
　　國貨佬指數就跌１０３點或０﹒７％，收報１４１３２點。

＊提速兼降費三雄確閉翳，德銀來唱好ＱＱ照碌低＊

　　祖國工信部公布４Ｇ用量已去到１﹒７８億戶，淨係上個月都多咗１６０３萬戶，但有報道
指要真係做到阿爺提出嘅提速降費，關鍵在於打破壟斷，不過咁大個「孖屐」畀３間玩曬，其實
想話唔壟斷都幾難，大隻佬祖國移動（００９４１）結果微跌０﹒２巴仙，收報１０３﹒４銀；
佢兩個街坊就慘Ｄ，聯通（００７６２）同祖國電信（００７２８）分別唔見３巴仙同近４巴仙
，聯通仲係今日表現最渣藍戰士。
　　另外一位大隻佬ＱＱ（００７００）雖然畀德銀唱好，對遊戲同廣告增長有信心，畀埋「他
屐」１７８銀，但今日腳軟１巴仙，報１５６﹒７銀。大笨象（００００５）就畀高盛升「他屐
」至９２銀，話佢退出嘅市場唔係好賺到錢，反而賣走可以降低負債；再加埋市場傳佢好快會分
拆英國零售銀行，結果踢高唔夠１巴仙散場，收報７４﹒２５銀。

＊遠洋拍中海你好我又好，缸友炒數據比亞迪高高＊

　　中遠洋（０１９１９）孖住中海發展（０１１３８）齊齊出海。雙方組合營公司，合營仲已
經諗住買４艘大型鐵礦石運輸船，連摩通都讚今次買船影響正面，不過最重要當然係重組憧憬又
大咗。中遠洋同中海發展股價分別走高９巴仙及４巴仙，報６﹒５４銀及６﹒５２銀，兩間公司
嘅Ａ股仲漲停板，認真厲害！
　　祖國頭４個月新能源砵砵車產量急增近３倍，至３﹒４４萬輛。消息推動砵砵車比亞迪
（０１２１１）逆市向前衝近９巴仙，報５４﹒５５銀。不過，４月條大數全國客車產銷量都跌
咗，搞到班街坊表現麻麻。東風（００４８９）同長汽（０２３３３）分別走低近１巴仙至２巴
仙；北汽（０１９５８）就好少少，都有近２巴仙入袋。

＊缸邊排住隊高台玩跳水，高銀系兩股急插逾四成＊

　　魚缸「散水潮」停不了，今日就輪到雙人跳水，講緊嘅係高銀金融（００５３０）同高銀地
產（００２８３）。呢對孖寶今日分別插逾四成，報１７﹒４８銀及１４﹒３６銀，水花四淺。
兩公司齊齊發聲明澄清集團一切正常，但始終都於事無補。
　　除咗呢對孖寶外，唔少參賽者表演高位插水。毅信（０１２４６）破頂後倒跌約７巴仙，報
４﹒３０銀。新灃（０１２２３）創過７年高位之後都碌低近一成巴仙。百融達（０２３２６）
抽高近３１巴仙見１５﹒７銀之後，曾經倒插番近４３巴仙，得番６﹒８５銀，最尾就企穩升近
１巴仙，相當刺激。

＊星政府減持銀泰跌得傷，漢能續停牌太陽能捱沽＊

　　銀泰（０１８３３）上星期至講緊話由阿里首席執行官張勇擔任新揸ｆｉｔ人，無喇喇畀新
加坡政府減持，拖累股價今日唔見咗近８巴仙有多，收報１３﹒７４銀，連跌３個交易日
，似乎後市有可能要考驗條１０天線。其他阿里股都無乜運行，阿里影業（０１０６０）同阿里
健康（００２４１）分別跌咗６﹒３巴仙同３﹒７巴仙。
　　漢能（００５６６）噚日遭洗倉式下瀉，公司話遲吓會刊發內幕消息。不過有傳證監會就漢
能涉及市場操縱展開調查。漢能今日繼續停賽，難為班街坊就要捱沽，卡姆丹克（００７１２）
同君陽太陽能（００３９７）分別唔見咗３﹒４同７﹒５巴仙，收報１﹒４３銀及０﹒３１銀。
匯證就話大隻佬保利協鑫（０３８００）今年盈利下跌，股價走低近３巴仙。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。