《小傳日記》耶倫忽然又放鷹，好友即時頭擰擰！

　　《小傳日記》美聯儲「揸ＦＩＴ人」耶倫出嚟放風聲，話準備每年加息幾次，直至２０１９
年底止，到時利率就差唔多升到去３厘左右。言論一出，美金應聲彈番上去，噚日（１８日）仲
好合皮嘅英鎊、人仔即時好Ｄｏｗｎ囉；而噚日跳起２００幾點嘅魚缸，今日亦難免要回一回、
唞一唞。
　　今天魚缸中場一度唔見１５６點至２２９４１，再次失守二萬三；但之後又反覆回穩。恆指
最後仲只係碌低４８點收２３０４９添；國指就唔見１０點收９７９２，成交近５５４億銀。
　　薯片叔叔正式宣布參戰，花生指數梗係直線上升喇！不過，缸友都唔好忘記，花旗國新主人
侵侵（特朗普）將會喺香江時間星期六（２１日）正式上任，記得要睇實有咩新政策影響環球魚
缸呀！
　
＊耶倫鷹媽媽美金立即升，大行來踐踏國泰急急墜＊
　
　　國泰（００２９３）公布「廿年嚟規模最大」嘅重組計劃，話會精簡架構，又唔會設下裁員
比例，認真「玄爆」。同時，國泰亦否認賣畀國航（００７５３）。「賓架」們聽完都唔太睇好
國泰，瑞信維持「差過孖屐」評級，摩通叫「減持」添，搞到國泰急墜近４巴仙，報１０﹒４銀
，係全日最曳藍戰士；國航就飛起近２巴仙，報５﹒４２銀。
　　花旗話，缸友過於擔心特朗普貿易政策對Ａ場嘅影響。ＱＱ（００７００）、平保
（０２３１８）列入今年首選買入股，平保行前近１巴仙，報４０﹒６５銀；ＱＱ卻腳軟０﹒１
巴仙，收１９９﹒５銀。恆安（０１０４４）係首選賣出股之一，瞓低２巴仙，得返６０﹒６銀
。
　
＊花旗彈恆安即時有反應，地主驚息魔全線頭擰擰＊
　
　　聯儲局主席耶倫預告，２０１９年底前每年都要加息幾次。大摩都唱淡磚頭，估計今年樓價
會跌半成，係２００８年以嚟首次。新世界（０００１７）、信置（０００８３）評級降至「持
有」，齊齊趴低約２巴仙，報８﹒９１同１２﹒７銀。恆地（０００１２）亦降至「減持」，碌
低近２巴仙，報４２﹒９銀。
　　馬交旅遊局局長話，美金強勢會減低海外旅客到馬交嘅意欲，澳博（００８８０）嚇一嚇，
跣低逾１巴仙，收６﹒０４銀。新濠國際（００２００）卻一於少理，逆流跳高逾２巴仙，埋單
１１﹒１４銀。
　
＊油價瀡滑梯油股亦曳曳，摩通讚正通街坊更有勢＊
　
　　市場預期花旗國油佬擴產及美金踢高下，油價噚日顯著行落返近３巴仙。油股今日淪為打壓
對象，中石化（００３８６）同中石油（００８５７）齊齊趴低逾１巴仙，收報６﹒０８銀及
６﹒２４銀。中海油（００８８３）微微跌落唔夠半巴仙，收報１０銀。
　　正通汽車（０１７２８）獲摩通唱好，認為估值吸引，呼籲缸友買多Ｄ，「他屐」３﹒２銀
。獲得大行唱好，今朝正通曾駛前逾３巴仙，只可惜後勁不繼，埋單只得大約１巴仙落袋，收報
２﹒６２銀。相反，一班街坊嘅引擎馬力更猛；美東（０１２６８）飆前近７巴仙，收報１﹒４
銀，創約年半新高。吉利（００１７５）就有近３巴仙進帳。
　
＊松景遇伯樂復牌坐火箭，東北有大刁缸邊夠鑊氣＊
　
　　松景（０１０７９）控股權打算易手，如果落實，屆時需要提出強制要約。雖然仲未有細節
，但已經夠晒燃料推動松景火箭式升空逾４２巴仙，收報０﹒７４銀。　
　　東北電氣（０００４２）第一大股東蘇州青創搞緊一單大刁，或者會對股價造成大影響。充
滿無限憧憬下，東北電氣亦飛高逾１４巴仙，收報２﹒７銀。
　　信義玻璃（００８６８）獲摩通畀讚，指浮法玻璃價格上升，行業供需已有改善，叫缸友
「增磅」，「他屐」升至１０銀。信義玻璃聽完笑逐顏開，逆風攀高５巴仙，收報６﹒８９銀。
　　美圖（０１３５７）首獲大摩畀「持平」評級，而「他屐」較招股價仲要低，得８﹒１銀。
之不過，今日美圖仍然緩緩跑上近１巴仙，收報８﹒５４銀。請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。