《小傳日記》ＱＥ加重組，中港同飛高；大象炒回歸，粉絲齊叫好！

　　《小傳日記》咩叫「大牛市」？！簡單Ｄ講，只要一收到好消息，魚缸都可以ｈｉｇｈ到爆
！好似祖國今日（２７日）就傳出阿爺會推出中國版量寬（ＱＥ），人行會直接喺錢莊買資產，
同埋又翻炒央企合併憧憬，兩樣聽落好勁嘅消息傳出，Ａ場又輕輕鬆鬆升破４５００關，收升３
巴仙報４５２７點，勁！
　　香江呢邊，就有大象（００００５）撐起魚缸，繼上星期五（２４日）點頭承認諗緊遷離米
字國之後，依家又爆出計劃沽出當地二千幾億嘅零售銀行業務，股價今朝向著８０關邁進，仲帶
動大市抽升最多５２７點至２８５８８，再創近七年半新高。雖然尾段大象回順，大市升幅亦縮
番落去，但都有３７２點進帳，收報２８４３３；國貨佬就衝高２５２點，收１４７４１。今日
全日成交１９０９億銀。

＊好嘢浪接浪缸友心花放，愈炒愈有勁七年半新高＊

　　魚缸今日向上彈高，大象當然功不可沒。話說上禮拜「揸Ｆｉｔ人」范智廉話正就遷冊問題
檢討緊，唔少人都期待大象會回歸香江。話口未完，有傳大象為咗避開米字國嘅重稅，可能將當
地嘅零售業務出售。孖屐係兩個利好消息嘅帶動下，一度急漲６巴仙，埋單升幅收窄，仍然有逾
３巴仙進帳，收報７６﹒４５銀，佔咗大市約三成升幅！
　　所謂一石激起千層浪，雖然仲未知大象係咪會回歸，唔少本地錢莊今日都有唔錯表現。囝囝
恆生（０００１１）一度破頂見１５２﹒８銀，街坊渣打（０２８８８）都繼續有逾２巴仙升幅
收１２９﹒５銀。至於每次炒併購實有份嘅大新銀行（０２３５６）同大新金融（００４４０）
就踢高近６巴仙同４巴仙。

＊大象炒回歸街坊同拍掌，小象大新系破頂齊齊漲＊

　　近來搶晒魚缸焦點嘅，一定係一班傳出改革嘅央企莫屬喇。今日帶領魚缸飛升嘅，除咗狂舞
大象外，就有「三桶油」。有探子回報，阿爺正研究緊將中石油（００３８６）、中石化
（００８５７）同中海油（００８８３）仲有中國化工合併，變成石化巨人，同國際公司合作競
爭咁話。缸友唔理消息係真係假，一於炒咗先！三者分別炒起２巴仙至７巴仙，就連中石化囝囝
上石化（００３３８）都叨到光，一樣滾起咗兩成呀！
　　除咗賣油佬傳重組，一直以嚟都係咁講重組嘅，仲有一班船王嘅！就好似中海集運
（０２８６６）（滬：６０１８６６）、中遠洋（０１９１９）（滬：６０１９１９）、雖然之
前就澄清話，未收到重組消息，不過缸友一於無理，連船王都炒埋！結果兩者就炒上９巴仙同
１３巴仙，Ａ場果邊直頭漲到停板添！

＊阿爺夠關顧央企搞重組？油企與船仔升得好風騷＊

　　香江電視業可以話係一波未平一波又起。話說上禮拜高院裁定香港電視（０１１３７）就官
府拒發免費電視牌照提出嘅司法覆核勝訴，小勝一仗嘅港視股價當堂醒神晒，今日踢高逾１１巴
仙，收報３﹒４７元。本地電視界一哥電視廣播（００５１１）股價都無乜點受影響，今日有１
巴仙進帳。至於之前邱達昌牽頭爭免費電視牌，旗下遠東系都有好表現，遠東發展
（０００３５）、遠東酒店（０００３７）分別走高近９巴仙同１１巴仙。
　　另外，魚缸呢排氣勢如虹，大市交投繼續旺場，個別本地券商都有炒作。耀才證券
（０１４２８）、海通（００６６５）分別踢高逾１３巴仙及１２巴仙。但早排上場嘅廣發証券
（０１７７６）就陰功豬，雖然獲瑞信首予「跑贏大市」，目標價３１銀，但係都逆市碌低近
１巴仙，慘。

＊電視起風雲先來升一浸，市好券商好獨漏了廣發＊

　　個市又癲咗，大又炒細又炒。今日復賽嘅東江環保（００８９５）就創新高喇，事關公司向
主席等人配Ａ股，打算集資２３億人仔，當中仲有平保（０２３１８）添呀！結果隻８９５今日
收報４６﹒４５銀，踢高五成二。
　　半新丁集成傘業（０１０２７）今日繼續爆上兩成七，比起２月份佢上市時，已經高出１７
倍，如果當初抽到一手，忍得住無沽到嘅缸友，就真係瞓著都開心到笑出嚟啦！
　　仲有一Ｄ靜咗好耐，但又超大成交嘅爆升毫子股，當中五龍電動車（００７２９）都創一年
高位，最高去到０﹒７１銀，已經創咗過一年新高，散場時逾４﹒７億銀大成交收報０﹒６７銀
，飛起一成六，勁！至於另外大成交嘅，仲有百靈達（０２３２６），今日又再飛起１倍，隻股
月初由三毫幾子起步，今日收報２﹒５銀，仲成為今日升幅王！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。