《小傳日記》摩指大執位，成交確巴閉；別了兩萬二，好友有點翳！

　　《小傳日記》花旗國魚缸上星期五（２７日）復市，不過缸友仲沉醉喺感恩節氣氛當中，無
心戀戰，結果收市微跌１４點報１７７９８，靜市一場。
　　Ａ場就擺脫咗上星期五大震盪嘅陰霾，今朝（３０日）低見３３２７點後就反擊成功，收市
倒升０﹒３巴仙報３４４５點，上番三千四關，沖一沖喜。不過，香江缸友見到Ａ場未有明確方
向，都唔敢貿然入市，集中火力睇實ＭＳＣＩ收市之後換馬，相關股份嘅表現好過！果然，ＱＱ
（００７００）、建行（００９３９）等大隻佬喺收市前兩分鐘成交急增，全日大市成交「嘭」
一聲增至約１００７億，久違了嘅四位數哦！
　　總結香江魚缸全日表現，雖然一度衝高逾百點上番二萬二，可惜臨門一腳無力，收挫７１點
報２１９９６，國指唔見６５點收９７９０，慘。港鐵（０００６６）停牌，現正開記招，為高
鐵工程進度解話。

＊摩指執執位股仔反反覆，出出入入間想笑又想哭＊

　　ＭＳＣＩ收市後換馬，「新貴」民航信息（００６９６）及博華（０１０７６）將加入中國
指數嘅大家庭，前者成功保住漲幅，埋單仍彈高近１巴仙報１３﹒２６銀；後者反反覆覆，下半
場腳軟軟，好似收市都有逾１巴仙落袋，收０﹒２４９銀。金隅（０２００９）慘遭踢走，依然
衝前唔夠１巴仙，報５﹒０７銀。
　　阿里巴巴、百度等等１４隻中概股ＡＤＲ亦將首度入會，中海外（００６８８）同中海油
（００８８３）比重可能受影響而下降，照樣踢高近１巴仙，埋單２５﹒７同８﹒５８銀。潤地
（０１１０９）都唔怕失寵，無升跌，報２０﹒８５銀。聯通（００７６２）反而扭計，跣低近
１巴仙，收９﹒６銀。

＊大摩與高佬齊齊捧ＱＱ，街坊有榮焉金軟最叻叻＊

　　中移動（００９４１）佔比重下降，全日甚反覆，快落快上又快落，收市跌近１％。至於
ＱＱ除咗受ＭＳＣＩ換馬影響外，比重可能遭降低，但同時亦畀高盛睇中，納入「確信買入」名
單，盛讚公司喺社交同遊戲領域都係領頭羊，目標價仲由１７６銀升至２０２銀。除咗高盛外，
大摩亦都將ＱＱ列入神州焦點股。ＱＱ獲賓架們唱好，股價表現硬淨，走高近１巴仙，收報
１５４﹒３銀。同樣做科技生意嘅聯想（００９９２）都獲花旗續叫買入，都成功彈高近１巴仙
收８﹒２銀。
　　龍頭ＱＱ獲盛讚，唔少軟件同行都感受到快樂。金軟（０３８８８）踢高近４巴仙，收報
２０﹒６銀。金蝶（００２６８）及中國軟件（００３５４）都分別有唔夠１巴仙斬穫，收報
３﹒７５銀及３﹒５５銀。

＊海螺來錫錫西部即跳舞，阿爺搞改革電力卻腳軟＊

　　西部水泥（０２２３３）有「大阿哥」安徽海螺（００９１４）睇起，先注入４６億陝西省
中部業務資產，再入主手握近５２巴仙權益，仲以溢價近１７巴仙提要約全購。西泥今日復出缸
湖，飛起近７巴仙，報１﹒５５銀；安徽海螺亦走高近１巴仙，收２１﹒１５銀。街坊聯合水泥
（０１３１２）好妒忌，被掟走咗近５巴仙，報０﹒５８銀。
　　阿爺一次過公布六大電力體制改革配套文件，話要多啲地方試吓改革輸配電價、組建獨立嘅
電力交易機構，同建立優先購電、發電制度。華能國際（００９０２）、中國電力
（０２３８０）冧低２至３巴仙，得返６﹒７６同４﹒１３銀。華潤電力（００８３６）就企穩
，報１４﹒６銀。

＊虧損兼合股７３６被質，高銀兩兄弟你跌我又跌＊

　　中國置業投資（００７３６）諗住「五合一」，同時間公司放榜，中期虧損擴大至
４６４６萬銀人仔。壞消息困擾纏身，股價蒸發逾２２巴仙，收報０﹒１２８銀。
　　高銀地產（００２８３）半年賺少咗２９巴仙至３﹒７億銀，今日趴低咗近９巴仙，收報
６﹒１銀。兄弟高銀金融（００５３０）仲慘，無咗足足一成，收報１１﹒３銀。
　　新源控股（０１０４８）要約得２２％股權接納，唔少缸友都睇好佢未來發展。股價今日抽
高３５巴仙，收報５﹒１２銀，係升幅榜首位。
　　榮豐（０００６３）配股令公司符合公眾持股規定，兩位聯席主席上星期五亦已經齊齊辭職
，股價抽高近１８巴仙，收報０﹒５７銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。