《小傳日記》有線翻身囉！純官做掌舵；炒股唔炒市，到底搞邊科？

　　《小傳日記》花旗巨挈排隊放榜，噚晚（２０日）美國運通派咗份靚靚季績，幫道指打打氣
，成功反擊１７４點收報２０５７８，總算止一止呢幾日嘅跌勢。
　　不過，今日（２１日）香江缸友都唔得閒理外圍，齊齊望住有線寬頻（０１０９７）點樣大
翻身都夠晒精彩。仲有股王ＱＱ（００７００）、瑞聲（０２０１８）同舜宇（０２３８２）齊
齊創新高，台泥（０１１３６）畀阿媽大手筆私有化等，都令缸友睇到嘩嘩聲。
　　魚缸繼續炒股唔炒市，成交大減至６１１億銀左右，仍未擺脫整固格局！全日喺二萬四關上
上落落。恆指本來都試過去返２４１９０，點知尾市畀祖國內房拖累，恆指要瞓低１４點收場，
報２４０４２；國指就跌６點，收１００５０。
　　
＊運通季績靚道指大反擊，香江有頭威奈何無乜力＊

　　有線寬頻終於等到白武士打救，噚晚近十點鐘左右，有線發通告指，大折讓６６巴仙三供五
，籌約７億銀，控股權就會易手至新世界（０００１７）主席純官、遠東發展（０００３５）主
席邱達昌，以及富力（０２７７７）同百福（０１４８８）主席，而純官就會做有線大股東。
　　雖然有線避過關門大吉，但係咁大折讓抽水，缸友掟貨以示ｄｉｓｌｉｋｅ，有線開市即急
插兩成，最低去到０﹒４６銀。但中午邱達昌開記者會大派定心丸後，有線成功大翻身，拗腰倒
升番逾１６巴仙埋單，收０﹒７１銀。勁！
　　至於同幾位白武士相關嘅股份，如新世界、遠東發展等，股價就只係輕輕跣低，各收報
９﹒６４銀及３﹒５２銀。

＊有線玩供股大落復大上，北水愛ＱＱ重鋼受重傷＊

　　股王ＱＱ近日深受北水寵愛，領軍科網股向前殺敵，今日又一度再創上市新高，見
２３９﹒６銀！不過話晒咁大隻股，唔夠兩個月就升咗近１６巴仙，有貨缸友都趁高獲利，埋單
微跌一格！
　　重鋼（０１０５３）就慘慘豬，全日最多蒸發咗近３３巴仙，埋單仍插低逾２７巴仙收
１﹒５０銀，係最差表現魚毛。點解咁曳，皆因公司公布，重組置入資產嘅方案比較複雜，仲未
知道可唔可以滿足到監管要求。
　　
＊ＡＳＭ破頂瑞聲更加正，投資電動車聯想亦好靚＊
　　
　　搞半導體嘅ＡＳＭ太平洋（００５２２）認真巴閉，禮拜二（１８日）登完頂後，今日都仲
有力破頂，主要都係集團老細出嚟話，預計第二季收入繼續有雙位數增長！現時山頂位去到
１１５﹒３銀，埋單都升超過半成，收１１２﹒５銀。
　　有錢齊齊搵，蘋果近年咁賣得，幫佢做代工嘅瑞聲（０２０１８）都賺到盆滿缽滿，禮拜三
（１９日）變身紅底後都仲要係咁上，股價就似肥佬著笠衫─幾大就幾大，最新嘅山頂位已經去
到１０７﹒５銀，全日升咗近４巴仙，報１０６銀。雖然蘋果唔係舜宇（０２３８２）嘅大客，
但你好我也好，今日同瑞聲一樣雙雙破頂，已經去到６１﹒７５銀高位插旗，埋單就升咗近１巴
仙報５９﹒９５銀。
　　頹咗一排嘅聯想（００９９２）話要投資電動車，咁就發威上返５銀大關最高去到５﹒１７
銀，全日升咗近２巴仙，報５﹒０５銀。

＊阜豐搞批盪粉絲即掟貨，台泥私有化今天有團火＊
　　
　　喺神州生產味精嘅阜豐（００５４６）宣布話要配股抽水７﹒８億銀；折讓近８巴仙配股，
缸友都掟貨離場以示不滿，全日跌低超過１２巴仙，報５﹒２６銀。
　　嚟自寶島嘅台泥（０１１３６），大股東話要以每股３﹒６銀同缸友買返晒所有股份，大嗱
嗱溢價超過３８巴仙。缸友收到風，心裏只有一句「機會嚟啦」！台泥今日股價如升火箭咁升咗
超過三成，報３﹒４４銀，距離３﹒６銀只係差超過４巴仙嘅水位。
　　亞洲資源（００８９９）大股東西安交通能源今日話要放咗佢手上嘅股份，有成１３﹒３億
股，價錢就差唔多有五個億，計返每股價格大約０﹒３７１銀。今日亞洲資源就曾經最多爆升
４６巴仙；但點知係一場虛火，全日計得番超過３巴仙進帳，收０﹒２１９銀。
　　缸外天氣極度惡劣，天文台仲一度發出黃雨警號，缸友放工記得拎遮，快Ｄ返屋企喇！假期
愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。