《小傳日記》缸友呢頭先避過「息魔」襲擊,嗰頭油組又預計好難達成限產協議,油價即急
墜,布蘭特11月期油重挫近4巴仙,收45﹒89美金。仲震散埋花旗魚缸,道指上星期五
(23日)跣低131點收市報18261點。
外圍企唔穩,恆指今朝(26日)都低開131點報23554,之後QQ(00700)
、金沙(01928)同銀娛(00027)齊齊瞓低。A仔場即將放國慶長假,好友選擇提早
離場,結果失守三千關,嚇到恆指最多唔見逾400點。恆指散場仍挫368點報23317;
國指就陪跌166點報9629。全日成交近656億銀。
睇番魚缸公仔圖,已經連續三日出現陰燭,亦失守十天及廿天線,現水平已跌至上升軌道底
部;加上星期四(29日)係期指結算日,而花旗總統候選人特朗普與希拉里香港時間周二
(27日)早上九時進行首場辯論;多項不明朗因素籠罩下,缸友都要綁好安全帶了。
*太多不明朗好友避一避,一度插四百淡友卻甚肥*
瑞聲(02018)近排一直無運行,雖然之前有大行瑞信支持,仲維持目標價喺94﹒9
銀,但都托唔到股價,今日插穿咗五十天線(78﹒435銀),腳軟近5巴仙,報77﹒6銀
成為最差藍戰士。
大象(00005)就傳出已經著手委派獵頭公司搵下一任執行官,不過就畀星展剔出首選
股之列。雖然公司繼續喺倫敦回購緊,但係今日都收復唔到十天同廿天線,仲回落逾1巴仙,報
57﹒35銀。
海外有風話長建(01038)位於米字國嘅污水處理公司無交到企業稅,公司就澄清話有
交到,只係筆稅款已經抵銷咗。不過,股價都唔夠硬淨,隨魚缸腳軟近3巴仙,報67﹒45銀
。
*大象續回購無奈仍低收,賭仔與聲聲今回鬥快走*
賭仔好壞消息參半,馬交早前8月份入境旅客按年減少5巴仙,留宿旅客反而創近年新高,
同時亦有風話馬交酒店業供應增加,競爭會加劇。結果賭仔近排碌返轉頭,就算之前被瑞信睇好
嘅銀娛亦倒退近3巴仙,報28﹒45銀。另一阿哥金沙亦唔見逾3巴仙,報32﹒3銀。
賓架德銀睇好「深港通」,點評話有助增加魚缸流動性,會有更多國際公司嚟港上市,再加
埋「深港通」呢項重大利好消息,生發發(00388)今日都算硬淨,微跌近1巴仙,報
203銀。天順證券(01141)近日出現大成交,股價表現極之波動,曾經去到0﹒229
銀,不過之後升幅收窄晒,最後靠穩報0﹒215銀。
科網股出現回吐,金山軟件(03888)跌得都幾淒厲,質低近5巴仙,報18﹒08銀
;街坊博雅(00434)更插低近9巴仙收4﹒26銀,慘!
*金山與博雅沽壓甚沉重,中鋁礦私有復牌即上衝*
砵砵車廣汽(02238)獲交銀國際予「中性」評級,目標價9﹒8銀,指廣汽受長汽
(02333)同埋吉利(00175)等低端SUV製造商威脅,結果向後退半成,報
9﹒98銀。
中鋁礦業(03668)獲大股東中鋁海外溢價32巴仙提私有化,復牌後火箭式彈起近兩
成半,報1﹒31銀,試過創逾3年高位。
協盛協豐(00707)斥5億買起亞視52巴仙股權連債;缸友們可能仲好掛住亞視,炒
高股價近16巴仙,報0﹒24銀。
恆發洋參(00911)聽日(27日)起改名做「前海健康」,今日提前炒起近8巴仙慶
祝,埋單0﹒19銀。
*協盛買亞視粉絲甚高興,炒股唔炒市魚毛炒到㷫*
魚缸大退潮,個別魚毛反而彈得興奮,民企長城微光(08286)透露,有獨立第三方想
認購公司內資股,莫非有新老闆加入?唔理咁多炒咗先講,長城微光一度爆上近55巴仙,最終
升幅就回落到逾34巴仙,報0﹒65銀。
西伯利亞礦業(01142)官非纏身,全年業績又遲遲未刊登,停牌咗三個月,今日終於
肯派成績表,原來全年虧損減少咗1﹒4億銀,復牌之後獲力捧一路向上,食完午飯之後更一度
炒高逾53巴仙,完場就跑前超過23巴仙,報0﹒265銀。
南京熊貓(00553)放風話,媽咪熊貓集團考慮緊將重大資產注入公司,令大家都好好
奇,復牌後全日爆發近16巴仙,報7﹒86銀。
中達金融(00572)呢個月以嚟不斷癲升,水位上漲兩倍有多,今日宣布授出會員積分
兌換店嘅獨家特許權之後,再跑上多超過16巴仙,報0﹒71銀。請請!
《編者按》本欄搜羅即日熱門傳聞,惟消息未經證實,《經濟通》亦不保證內容之準確性
本文只供參考之用,並不構成要約、招攬或邀請、誘使、任何不論種類或形式
之申述或訂立任何建議及推薦,讀者務請運用個人獨立思考能力自行作出投資
決定,如因相關建議招致損失,概與《經濟通》、編者及作者無涉。
全新節目《說說心理話》原生家庭對成長有咩影響?改善溝通有計可施?► 即睇