極速報價  |  詳細報價  |  互動圖表  |  成交  |  新聞  |  評論  |  影片  |  相關證券  |  公司資料  |  派息  |  賣空
01288 農業銀行
即時 按盤價 跌3.300 -0.010 (-0.302%)
相關新聞

23/03/2018 17:25

《小傳日記》貿易戰開打,香江做戰靶;股東突掟貨,QQ好難過!

  《小傳日記》唉,咩叫連環夾擊?今日(23日)缸友們都深深體會到了……先係股王QQ
(00700)大股東突然宣布掟貨套現近770億呀!嚇到QQ ADR噚晚已經急插至
405﹒67銀,唔少有貨粉絲都驚到有得震無得瞓。點知,一波未平一波又起,狂人侵侵(特
朗普)正式向中國展開貿易戰,對進口商品徵收關稅,噚晚花旗國三大股指都受重創,全部錄得
6周以來最大單日跌幅,當中道指跳水724點或近3巴仙,報23957點。
  雙重大打擊一次過殺埋身,香江今朝(23日)即時裂口低開1140點報29930,三
萬關同百天線(30379點)都一併被攻陷。之後大部分時間都維持喺700幾至1100點
跌幅,藍戰士基乎全軍覆沒,只得恆隆地產(00101)同電能(00006)逃出生死,各
升不足1巴仙。恆指埋單雖然跌少咗,但都仍急瀉761點或2﹒5巴仙,收30309;國指
都身受重傷,大插299點或2﹒4巴仙,收報12128。
  由於QQ被股東掟貨都涉及近770億,所以魚缸全日成交超過2834億銀,比噚日高出
近87巴仙,是自2015年4月9號以來高位。
  缸內「熊」踪處處,好彩缸外都有一個小小好消息,就係香江財爺陳茂波宣布派錢,決定向
預算案中,未能受惠嘅成年香江人派4000蚊,算係今日嘅苦中一點甜吧。
  
*股東突掟貨QQ慘急挫,逆市高高收金蝶好搶手*

  股王QQ噚日已經因為公布業績後,被指手遊收入增長放慢,而受咗一定沽壓,點知今日仲
要再向下,皆因為最大股東Naspers宣布掟貨,以配售價405銀減持2巴仙股權,套現
近770億銀巨額,搞到QQ今朝喺競價時段已經插咗8巴仙,慘慘。
  好彩嘅係QQ今日都仲守得住配股價405銀,午後跌幅都收窄得返一半左右喇,最終埋單
只係腳軟逾4巴仙,報420銀。
  雖然大跌市,不過總有魚毛可以突圍而出嘅,講緊嘅就係金蝶(00268)喇,不但有主
席作為實益擁有人增持,仲有中信証券畀個「增持」評級,最勁彈高咗近9巴仙,埋單都升近4
巴仙,報7﹒42銀。
  
*貿易戰展開萬洲好悲哀,跌到眼花花利豐業績差*

  中美貿易戰最終都係要開打喇,除咗魚缸受影響之外,最唔開心嘅當然包括一眾喺花旗國業
務佔比較大嘅魚毛喇。下星期一(26日)放榜嘅萬洲(00288),一開始急跌過一成,之
後雖然收復返部分失地,但都要腳軟近半成,報9﹒03銀;申洲國際(02313)都碌低逾
5巴仙,報75﹒9銀。「手機設備孖寶」同樣受影響,瑞聲(02018)急跌近7巴仙,報
145﹒6銀;舜宇(02382)都挫逾5巴仙,報151﹒7銀,成為跌幅最大兩隻藍戰士

  利豐(00494)就更加慘喇,不但受貿易戰影響,因為舊年由盈轉虧蝕3﹒75億美金
,被多間大行唱淡,碌低10巴仙,報3﹒87銀。

*魚缸受重創生發發震盪,缸友唔入貨平保又跌過*

  今日魚缸大震盪一度插逾千點,近日同樣受連環打擊,或被搶生意嘅生發發(00388)
就更加愁,隨市碌低近3巴仙報256﹒8銀,要同百天線(約259﹒44銀)說再見。
  祖國內險方面,平保(02318)本來早幾日派完省鏡成績表後,有機會挑戰「紅底」,
可惜缸友趁好消息出貨,再加埋今日隨市捱沽,搞到收市瞓低近4巴仙報84﹒45銀,莫講話
晉身「紅底」,依家連條百天線(82﹒743銀)都隨時被攻陷,慘。街坊國壽
(02628)本來成績好過預期,全年多賺近69巴仙,但難敵淡友攻勢,不過都算唔係好傷
,只係唔見近2巴仙收22﹒15銀,已算好好了。

*內房重災區中海外憔悴,內銀等放榜有貨亦唔放*

  魚缸大跌市,祖國內房佬都係重災區之一,中海外(00688)本來早兩日表現都唔錯,
但遇正大地震,喺下星期一(26日)派成績表前,今日都回吐番之前升幅咁滯,埋單收低近
5巴仙報27﹒65銀;街坊潤地(01109)都一樣命運,明明業績夠省鏡升咗唔少,但係
都難逃跟市跣低嘅命運,完場唔見近4巴仙收28﹒95銀。
  祖國錢莊下星期進入放榜期,今日都難免被拋售,早排已公布業績快報嘅農行
(01288)將率先在下周一(26日)派業績,埋單算係跌得少,碌低近2巴仙收4﹒43
銀;建行(00939)、工行(01398)、中行(03988)就排隊喺之後幾日揭盅,
今日就跟市收低1至逾2巴仙。
  今日魚缸跌到天昏地暗,好彩跟住兩日可以休息透透氣。周末愉快!請請!

  《編者按》本欄搜羅即日熱門傳聞,惟消息未經證實,《經濟通》亦不保證內容之準確性
       本文只供參考之用,並不構成要約、招攬或邀請、誘使、任何不論種類或形式
       之申述或訂立任何建議及推薦,讀者務請運用個人獨立思考能力自行作出投資
       決定,如因相關建議招致損失,概與《經濟通》、編者及作者無涉。

全新節目《說說心理話》原生家庭對成長有咩影響?改善溝通有計可施?► 即睇

備註: 即時報價更新時間為 28/03/2024 18:00
  港股即時基本市場行情由香港交易所提供; 香港交易所指定免費發放即時基本市場行情的網站
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力