《小傳日記》中港悶市打呵欠，手遊落鑊炒到癲！

　　《小傳日記》噚日（５日）聽完咁詳細，咁重要嘅「兩會」政府工作報告之後，可能中港缸
友要時間消化李總理嘅一字一句，整理吓投資策略，決定坐埋一邊觀戰好過。結果今日（６日）
兩地魚缸齊齊發「吽唞」，Ａ場收跌７點，報３２４１。
　　既然Ａ場無大方向，連續跌咗三日嘅香江魚缸又點會有起色呢…全日喺２４２００點左右窄
幅上落，散場時輕輕走低２９點收２４１６４，國貨就好ＤＤ，收升９點報１１６０６。全日成
交即刻縮番晒落去，只得７２５億銀。
　　睇番公仔圖，噚日就已經呈現「三頂」，今日仲出現「六連陰」，暫時仲喺保歷加通道底部
，又未收復到五十天線（約２４３１７），短線走勢真係唔太樂觀，睇嚟要試下二萬四關嘅支持
力度。

＊阿爺出口撐手遊齊齊彈，軟件叨叨光金軟士氣壯＊

　　不過，炒友又點會錯過尋寶機會，今日手遊股就做咗幸運板塊，代替光伏股上太空。皆因李
總理噚日開金口力撐，要制定「互聯網＋」行動計劃，推動移動互聯網、雲計算等，總之就要衝
出國際！手遊股就猶如中咗頭獎一樣，當中細細粒嘅神州數字（０８２５５）終於可以走出冷宮
，一如神舟飛船升空，急急抽高超過五成，一口氣衝破晒所有主要平均線，仲拎埋最威水個股添
！創業板街坊ＩＧＧ（０８００２）下星期一（９日）放榜，今日大成交爆升１９巴仙預先慶祝
，中國手遊（０８０８１）都飛升１５巴仙，勁！
　　大大隻嘅雲遊（００４８４）、博雅（００４３４）雖然無搶高得咁勁，但都有６至９巴仙
落袋，齊齊開心。親戚軟件股都有ＤＤ進帳，大哥金山軟件（０３８８８）逆市踢高近６巴仙收
１７﹒６０銀，而「揸ＦＩＴ人」雷軍創辦嘅小米就巴閉得多，今年收入有望突破千億人仔添！

＊突傳深港通缸友衝唔衝？生發發澄清離場再決定＊

　　噚日阿爺只係提一提，會適時啟動深港通，今日下半場就突然傳出嚟緊星期日（８日）會喺
京城開發布會，公布深港通進程嘅細節喇！究竟消息係咪真，缸友一於少理，即刻衝入去過往鑊
氣較重嘅深ＡＨ股到，當中山東墨龍（００５６８）（深：００２４９０）就「嘭」一聲衝咗上
去，抽升８巴仙收３﹒５４銀，Ａ股都有逾４巴仙進帳。浙江世寶（０１０５７）
（深：００２７０３）埋單都有近８巴仙落袋，不過Ａ股就無咩反應，其他東北電氣
（０００４２）、經緯紡機（００３５０）都係呆呆滯滯無動靜。
　　老老實實，小傳就覺得今次單傳聞係「流」料居多，皆因咁大件事，又點會淨係得深交所話
開發布會，而無生發發（００３８８）份呢？！而家生發發發言人就話無聽過咁嘅事。缸友都係
小心中伏呀。　

＊光伏今洩氣缸友齊嘆氣，氣價郁少少燃氣升唔少＊

　　光伏股呢幾日表現好風騷，逆市爆升超過幾成都無問題。漢能（００５６６）今日開賽都仲
升多一陣，但好快就無晒力，跣低差唔多７巴仙收報６﹒８銀，連長和主席李超人都急急腳澄清
話自己無買過漢能。街坊君陽（００３９７）朝早都試過飆升三成，點知呢個時候，就輪到漢能
話年頭就賣鬼晒君陽啲股份，實行有事齊齊「孭」，搞到君陽尾市急回１６巴仙。
　　炒友即刻轉玩燃氣股，皆因祖國最近調整氣價，而標普出聲講班燃氣分銷商有著數。祖國燃
氣（００３８４）、中國天然氣（００９３１）就跳高４至９巴仙，北控（００３９２）都走高
近３巴仙。
　　砵砵車界玩環保能源車，最出名當然係比亞迪（０１２１１）啦。優步（Ｕｂｅｒ）仲諗住
同佢買１０００架環保車。不過開市衝一衝就開後波，埋單要倒跌唔夠１巴仙，慘。但祖國咁撐
環保，無理由放過呢架「環保車」嘅，缸友識做啦！

＊聯想係最威皆因比重升，歐元又貶值思捷最肉赤＊

　　魚缸今日收市關門後，恆指將會調一調整。大笨象（００００５）雖然無咗０﹒１巴仙，報
６７﹒８銀，去到超過２年新低。但佢喺藍戰士首領地位真係固若金湯，想挑戰佢都唔係咁易，
今日收市後佢喺恆指比重就去到１２巴仙啦，有１５０年資歷認真唔簡單。聯想（００９９２）
比重都升到去１巴仙，股價就逆市升２巴仙慶祝，今日藍戰士最叻仔就係佢啦。
　　歐洲嗰班阿頭開完會，扑鎚話下個禮拜一開始每月買６００億歐元國債。歐元即刻腳軟，去
到差唔１１年新低。喺歐洲大把業務嘅思捷（００３３０）心都痛晒，今日跌低２巴仙，報
７﹒７６銀，創逾３年低位！
　　最後，要讚一讚ＡＩＡ（０１２９９），雖然噚日回咗少少，今日即肯補番數，升番近２巴
仙，去到４８﹒５５銀，係第２威水藍戰士。公仔圖表現咁靚仔，一定長升長有，無走雞！假期
偷快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。