《小傳日記》企鵝有威勢，大象唔閉翳；友邦績前彈，魚缸似甩難？

　　《小傳日記》魚缸一連插咗五日之後，隨住美金指數喺近９７高位腳軟碌返落嚟後，人仔亦
谷底反彈，重磅大佬企鵝（００７００）連跌幾日都連續兩日跳彈床，加上花旗國同神州喺解決
貿易戰方面又有計傾，魚缸喺上個禮拜五（１７日）升返百幾點之後，今朝（２０日）雖然只係
高開６０點，兼且一度倒跌近４點，但企鵝繼續發威，下晝升幅更加係擴至超過４巴仙，跑贏晒
一眾藍戰士，魚缸當然繼續踩油向前行，最多彈起３９６點，全日高見２７６０９點，魚缸最後
埋單彈起３８４點或超過１巴仙，報２７５９８點。
　　魚缸今日雖然彈力十足，但成交唔係太配合，只有９３７億銀，較上個禮拜五少咗近７巴仙
。國貨佬指數今日彈起１１８點或超過１巴仙，報１０６３２點。滬指就升咗２９點或超過１巴
仙，報２６９８點。
　　企鵝今日威盡全場，埋單計都急彈４巴仙，報３５０﹒８銀，仲要連續反彈咗兩日，加埋升
咗近８巴仙，勁！大象（００００５）早段有Ｄ落泊，可能因為廿億美金回購計劃已經完咗嘅關
係，朝早低見６９﹒５５銀兼創咗超過一年新低，但到咗下晝就變身小飛象，埋單彈起近１巴仙
，報７０﹒５５銀。另一個重磅大佬ＡＩＡ（０１２９９）將會喺今個禮拜五（２４日）放榜，
今朝早一度唔見咗１巴仙，但缸友始終對佢業績寄予厚望，唔少缸友都趁機撈底，最終反彈近２
巴仙，報６７﹒１５銀。

＊油價逐級跌鐵鳥漲幅現，三桶油逆升中海油招積＊

　　話說最近花旗同中東班油佬唔多妥，花旗國又話唔入口伊朗啲油，沙特又話穩定油價要填返
伊朗個空缺做埋佢個份，十足ＯＰＥＣ（油組）版嘅「宮心計」，今日環球油價都跌左落去，加
上人仔反彈，所以班「鐵鳥」都一湧而上。東航（００６７０）彈近７巴仙，報４﹒７１銀。南
航（０１０５５）升逾５巴仙，報５﹒０９銀。國航（００７５３）漲逾４巴仙，報６﹒７銀。
北京首都機場（００６９４）跟升逾２巴仙，報８﹒７銀。另外，中銀航空租賃（０２５８８）
都創新高見５５﹒５銀，今日收升逾３巴仙報５４﹒７銀。
　　油價雖然冇乜料到，但「三桶油」都借大市氣氛轉好炒高，中海油（００８８３）就最巴閉
，彈起超過３巴仙，報１２﹒３８銀。中石化（００３８６）踢高近２巴仙，報７﹒３２銀。中
石油（００８５７）表現唔算好突出，彈起唔夠１巴仙，報５﹒７６銀。
　　
＊鐵路股急挫股民跟住坐，潤泥跑得靚水泥股價正＊

　　今日班鐵路「巴打」啲股價有啲濕熱，中車時代（０３８９８）係公布業績後股價好似瀡滑
梯咁跌左落去，上半年賺少咗超過７巴仙，跟住大和同瑞信仲要踩多一腳，全日跪低近８巴仙，
報４１﹒３５銀。其他巴打都跟住佢插水，中國中車（０１７６６）跌逾２巴仙，報６﹒６３銀
。中鐵（００３９０）插２巴仙，報６﹒５３銀。中交建（０１８００）跌逾１巴仙，報
７﹒９２銀。中鐵建（０１１８６）跌逾１巴仙，報９﹒０３銀。
　　但班「水泥佬」就好鬼雀躍，首先周三（２２日）海螺水泥（００９１４）派成績，但股價
已經預先落鑊炒起，今日彈近４巴仙，報４７銀。潤泥（０１３１３）升逾４巴仙，報８﹒９４
銀。中建材（０３３２３）漲近３巴仙，報７﹒７１銀。金隅（０２００９）漲逾１巴仙，報
２﹒８３銀。

＊永利有成績表現最得戚，舜宇插到底萬洲跌得低＊

　　永利馬交（０１１２８）派完成績表後，上半年賺多咗超過九成，兼且仲要豪爽派息，中期
息連特別息派７５仙，仲要獲大細摩一齊讚，喺咁多好消息帶動下，永利全日飛起近９巴仙，報
２０﹒１５銀。其他街坊都有搭順風車，金沙（０１９２８）彈起近３巴仙，報３７﹒１５銀。
銀娛（０００２７）同美高梅（０２２８２）都跳起約３巴仙，報５４﹒９５蚊同１４﹒１０銀
。
　　神州手機鏡頭佬舜宇（０２３８２）瞓低７日都未起到身，今日仲要跌落最低８３﹒２銀，
創下自２０１７年７月嘅新低，埋單唔見咗近兩巴仙，報８７﹒０５銀。其他手機設備佬就同枱
食飯，各自修行啦。比亞迪電子（００２８５）升咗４巴仙，報８﹒１８銀。通達
（００６９８）就漲近７巴仙，報１﹒４銀。鴻騰（０６０８８）上個禮拜五升咗近半成後，今
日繼續發威，走高超過３巴仙，報３﹒７２銀。
　　豬瘟喺神州爆發咗好幾日，豬肉佬萬洲（００２８８）連日被缸友掟貨，今日繼續碌落近６
巴仙，報５﹒７５銀，為全日最差嘅藍戰士，慘！。

＊７５９變動３６０心動，新威斯頓優英裘向上游＊

　　出名平賣進口零食嘅７５９阿信屋，創辦人兼主席林偉駿前日仙遊，集團今日公布由鄧鳳群
接手公司之主席、董事總經理及提名委員會主席。孖屐都心思思，佢母公司ＣＥＣ國際
（００７５９）會唔會賣殼，７５９最大對手優品３６０老細今日就話，如果ＣＥＣ係１０億銀
以下就有興趣買，不過睇嚟就未有具體嘅收購意向啦。消息一出令ＣＥＣ坐火箭，仲曾經上到
１﹒０４銀高位，依家就收０﹒８９銀飆逾９１巴仙。
　　新威斯頓（０８２４２）暫別一回，今日復賽後話公司主要股東劉勇諗住收購公司全部股份
，消息一出就令股價早上最多爆升超過３４巴仙，最高曾經去到０﹒１３７銀，之後下晝就升幅
收窄，埋單升近半成，報０﹒１０７銀。
　　東方海外（００３１６）早前復賽指已恢復公眾持股量，上周五急插１７巴仙後，今日繼續
插近１８巴仙，報５６﹒７銀，今日最低去到５５﹒６銀，係年內新低。
　　英裘（０１４６８）上星期五收到近２０億股要約股份之有效接納，相當於已發行股本約
４３巴仙。要約人同埋其一致行動人士將持有已發行股本約近７５巴仙。今早高開向上游，最後
漲逾１１巴仙，收報０﹒３銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。