《小傳日記》長假期前放放蚊，大市牛皮成交奀！

　　《小傳日記》香江人真係好鍾意去旅行，一見到有長假期，就會心思思想去嘆吓世界，好似
韓國團咁呀，因為一套Ｈｉｔ爆嘅韓劇《來自星星的你》而勁加價，但都一樣照爆滿，就知道股
可以唔買住，但旅行就一定要去！
　　睇返今日（１７日）魚缸嘅成交量，就知道小傳講得無錯！長假期效應，加上阿爺又抽水逾
９００億人仔；今朝上半場成交只得２１０億多啲，計埋下半場，全日都只得４２８億銀，係今
年最奀嘅一日。
　　今日市況悶到又放蚊；而全日收市大隻佬指數升６４點，收２２７６０，國貨指數就踢高
４４點，收１００８０。阿Ｑ精神啲睇，有得升都好過冇！

＊２６７大刁大行潑冷水，瑞銀睇得熊粉絲真心碎＊
　　
　　今日阿信泰富（００２６７）就無晒癮啦，皆因全城睇到實嘅「世紀巨刁」計劃終於喺噚日
（１６日）收市後揭盅，公司以２８６５億銀鯨吞母企資產，最終以「４９９億人仔茄殊」加
「配發１７７０億銀人仔股份」埋單。
　　點知，大行就唔係好ｂｕｙ呢單「刁」，覺得會攤薄公司帳面值，股價又會受到配股影響，
瑞銀仲竟然話，合併後嘅合理價應該係１０﹒６銀添。再加上有消息人士話，今次收購之後，控
股權無變到，所以唔可以叫做新上市咁話…難怪完場唔見３巴仙，收１３﹒８６銀。雖然係表現
最曳大隻佬，但成交唔算激多，約４﹒６億銀，沽壓都唔算太勁，粉絲們仲可以睇定啲。
　　
＊中油服海螺今回累鬥累，瑞信踩多腳壽仔亦憔悴＊

　　至於最曳國貨佬就由中海油服（０２８８３）擔當，全日唔見逾３巴仙收１８﹒４２銀。原
來佢唔單止今日曳，仲係首季表現最差國貨佬；最怕低處未算低，缸友們都係小心啲。
　　而安徽海螺（００９１４）就係今日表現第二差國貨佬，收市碌低３巴仙收報３０﹒８５銀
。其實海螺作為龍頭阿哥，之前股價表現都幾唔錯！喺３月份派完省鏡成績表，股價就扶搖直上
，仲拎埋首季最好表現國貨佬第二名。點知估佢唔到，因為「滬港通」一出，就慘成「Ｈ股溢價
」狂質目標，被淡友攻到遍體鱗傷，早幾日連３０蚊都穿埋，認真「陰功豬」。
　　仲有國壽（０２６２８）都仲未逃出「滬港通」受害股嘅命運，加上３月份保費收入又唔好
，今日就被瑞信踩多一腳，話估值低都無用，始終增長動力都輸畀同行，維持畀中性評級；雖然
佢無調低目標價２４﹒５銀，但國壽呢排頭頭碰著黑，最終完場都要跌１巴仙收２１﹒１５銀。
　　
＊重磅唔願郁中電信不俗，藥股齊報捷有貨就有福＊
　　
　　其他重磅股都無厘神氣，無咩大上落，ＱＱ（００７００）、建行（００９３９）、工行
（０１３９８）升幅介乎０﹒４巴仙至１巴仙。祖國移動（００９４１）就腳震震收７１﹒９５
銀，無咩突破表現。同業聯通（００７６２）收市後放榜，首季多賺７４巴仙至３３億人仔，勝
市場預期。不過粉絲已一早獲利離場放假，差唔多以全日低位散場，報１０﹒４８銀，反而中電
信（００７２８）就好有力，尾市仲踢高逾３巴仙收３﹒５６銀添。
　　藥業股都全線報捷，金活醫藥（０１１１０）抗流感藥通過香渣衛生署註冊，即將推出市場
，股價就飆１２巴仙率先慶祝。聯邦制藥（０３９３３）、復星醫藥（０２１９６）、康哲藥業
（００８６７）都齊齊彈高５至６巴仙。
　　
＊７４５急彈成交亦誇張，萬德與天年你漲我又漲＊

　　要數今日最巴閉股份就非中國鐵聯傳媒（００７４５）莫屬，噚日先講開佢成功斬斷「十二
連陰」厄運，卒之出現「鹹魚翻生」嘅希望，今日成班炒友就合力去延續「希望」，由開場升到
完場，全日爆升６５巴仙收０﹒３９銀，以一隻毫子股嚟講，成交竟然有近６億銀，仲多過長實
（００００１）同大象（００００５），認真誇張！
　　仲要咁啱得咁橋，早排被人發現，同鐵聯傳媒請埋同一間核數師嘅萬德資源（０８１６３）
及天年生物（０１１７８）都「鹹魚翻生」，分別急升超過２６巴仙同逾９巴仙，三隻股份未到
復活節，就已經率先復活啦。假期愉快，請請！　　
　　

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。