《小傳日記》公投明日知結果，缸友今天呆呆坐！

　　《小傳日記》講咗咁耐，米字國「留歐」定「脫歐」公投終於喺今日（２３日）香江時間
２點鐘正式開波！基本上，未開始投票之前，一班同米字國息息相關嘅股仔表現都唔錯，大象
（００００５）、渣打（０２８８８）、長和（００００１）都手拖手踢高。不過，公投開始咗
之後，英鎊就由今日高位１﹒４８４２美元回落番ＤＤ，一班魚仔升幅亦隨即縮番晒，似乎缸友
信心都未係好夠喎！
　　但係老老實實，公投結果要聽日中午左右先知，依家十劃都未有一撇，大家都觀望為上，上
下波幅百零點。再睇吓亞洲魚缸表現，Ａ場暫時就喺二千九關浮沉，擺明等緊「深港通」消息。
魚缸成交靜亦預咗，全日只得５４０億銀；但係恆指亦算頂得住，收升７３點報２０８６８，國
指揚２１點報８７８５。
　　
＊公投開波了英鎊略回吐，留歐定脫歐明天方知道＊

　　米字國公投正式開波，最快聽朝早就有初步結果。缸友似乎傾向相信「留歐」派會勝出，相
關魚仔繼續獲追捧。長和踢高近１巴仙，收報９１﹒６５銀。大象亦衝前１巴仙，收報５０﹒８
銀。渣打臨尾升幅收窄，但仍有逾１巴仙落袋，收報６３﹒８銀。
　　除咗公投外，孖屐又再炒「深港通」，缸友憧憬七一前後會有好消息。深ＡＨ股折讓最大嘅
浙江世寶（０１０５７）踢高逾２巴仙，收報８﹒９３銀。東方電氣（０００４２）同新華製藥
（００７１９）分別有近３巴仙同逾３巴仙進帳。生發發（００３８８）就未能企穩，臨尾輕微
跣低０﹒２巴仙，收報１８６銀。

＊公投等結果轉炒深港通，折讓大股仔升得好輕鬆＊

　　馬交５月旅客２４８萬人次，按年雖然跌咗２﹒８巴仙，但按月則微升０﹒３巴仙；其中神
州客就有１６３萬人次，按年跌低３﹒５巴仙。一眾賭仔微微行前；其中金沙（０１９２８）斬
獲近２巴仙，收報２６﹒５５銀；澳博（００８８０）同銀娛（０００２７）亦分別跑前０﹒４
巴仙至約１巴仙。
　　藍戰士友邦（０１２９９）今日踢高近２巴仙，收報４６﹒２銀。中移動（００９４１）今
日錄得唔少大手，最多嘅一手高達４億銀人仔咁多，但股價唔多郁，得唔夠半巴仙升幅，收報
８６﹒９５銀。
　　
＊大摩來踐踏聯邦無心機，阿爺撐運動體品笑騎騎＊

　　摩笛吹呀吹，今次吹中聯邦制藥（０３９３３），將評級貶到「減持」，目標價削到２﹒５
銀，聯邦制藥全日失魂跌落超過３巴仙，報３﹒０３銀。另邊廂，四環製藥（００４６０）表現
興奮，衝上近４巴仙，報１﹒６４銀，收復十天線（１﹒５９銀）同廿天線（１﹒６１銀），至
於同業復星醫藥（０２１９６）就軟近１巴仙，報１８﹒７２銀。
　　阿爺推出全民健身計劃，鼓勵人人落場做運動，踢波跑步跳廣場舞！一眾體品股利好向上走
，李寧（０２３３１）之前獲瑞信升評級讚好，全日行前近２巴仙，報３﹒４８銀；３６１度
（０１３６１）踏前超過１巴仙至２﹒３銀；至於安踏（０２０２０）表現靜啲，升唔夠１巴仙
，報１４﹒２８銀。

＊德銀來唱好煤炭高高收，唉瘋相關股齊來唞一唞＊

　　「唉瘋」概念股之前猛咁衝，係時候唞一唞。舜禹光學（０２３８２）之前畀德銀呼籲買入
，今日就無晒氣，倒退近３巴仙至２６﹒８５銀；瑞聲科技（０２０１８）都後退接近３巴仙，
報６６﹒２銀；富智康（０２０３８）無有怕，照上近２巴仙，報２﹒６銀。
　　煤炭之前大受打擊，最近終於有好消息，德銀話煤價向上揚，升幅同持久度超出大行預期，
將三大煤股神華（０１０８８）、中煤能源（０１８９８）同兗州煤業（０１１７１）評級一齊
向上跳一級，神華被呼籲買入，心情好興奮，跳上近２巴仙，報１３﹒６２銀；中煤能源就無喇
喇跌近１巴仙，收市報３﹒８９銀，兗煤就靜靜哋，無升跌，收市報４﹒９１銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。