《小傳日記》Ａ仔入摩快揭盅，香江二萬六進攻！

　　《小傳日記》外圍魚缸暫時風平浪靜，香江呢邊就睇實今個星期三（２１日）凌晨４時３０
分宣布Ａ仔入摩結果。之不過，摩指納Ａ都未揭盅，缸友已經好興奮，預早入貨等開香檳慶祝！
氣氛咁好，恆指今朝（１９日）高開１０９點後愈戰愈勇，最多跳起３１３點至２５９３９，二
萬六關就在眼前！
　　多隻重磅藍戰都發力，除咗祖國移動（００９４１）頭耷耷外，股王ＱＱ（００７００）、
近日獲北水滋潤嘅大象（００００５）、強勢破頂嘅ＡＩＡ（０１２９９），再加埋想搞新板嘅
生發發（００３８８）都齊齊夾高，最終恆指有２９８點落袋，收報２５９２４；國指喺內險佬
領漲下，亦抽高１３５點報１０５２０。
　　魚缸氣氛轉旺，不過炒股不炒市，成交只得６５７億銀。　　
　
＊入摩不入摩不如唱首歌，缸友追保保中移搞邊科＊
　
　　神州磚頭佬果然股如其名，同磚頭一樣咁硬淨，唞咗幾日即刻醒神晒，融創（０１９１８）
喺上周三（１４日）破頂後就向下調整，但勢估唔到咁快就彈返上去，全日升咗超過４巴仙，報
１４﹒２２銀。「四條三」恆大（０３３３３）自從喺今個月７號登頂後就碌返落嚟，碌低咗超
過一成半後，今日終於亦爬返上去，仲升咗近８巴仙，報１５銀，成功喺一眾街坊之中突圍跑出
。
　　Ａ場今日雖然唔算太靚仔，都係升咗２１點，但神州保險佬就無執輸，皆因中保監提倡保險
資金進入實體經濟，即係內險佬又有機會搵多Ｄ錢喇！一哥平保（０２３１８）六連陰後開心升
咗近４巴仙，報５２﹒１５銀；太平（００９６６）就緊隨其後，升近３巴仙，報１９﹒８銀。
　
＊ＱＱ做領軍街坊跟一跟，搞搞創新板生發發振奮＊
　
　　ＡＩＡ（０１２９９）做咗蟹仔一段時間後，今日終於突破橫行區，全日升咗超過２巴仙，
報５７﹒０５銀，以創上市新高強勢收市。股王ＱＱ今日都發威，升咗超過２巴仙，但就破唔到
２８０銀阻力位，報２７８﹒８銀。
　　ＱＱ走勢勁，其他手遊佬一樣冇走雞，雲遊（００４８４）好巴閉，全日爆升咗近半成，報
１３﹒４２銀。ＩＧＧ（００７９９）雖今日只係升咗超過４巴仙，報１２﹒０４銀，但今年受
到北水湧入，大嗱嗱已累升咗成１﹒４倍，足足跑贏所有街坊九條街。
　
＊主席來增持恆安高高收，敏華與渾水缸邊鬥一鬥＊
　
　　生發發（００３８８）提倡成立「創新初板」同「創新主板」，畀唔同投票權架構上市，美
銀美林舉腳贊成；話如果成功，可以喺４年內為生發發增加一成營業額。生發發應聲彈高近３巴
仙，報２０３銀。
　　恆安（０１０４４）上星期獲行政總裁同主席增持，加上有中金唱好升級籲「買」，今日飛
起近５巴仙，收５７﹒９銀，仲係最打得藍戰士。
　　敏華（０１９９９）再次出招反擊渾水嘅指控，強調自己２０１７年年報正確，又批評渾水
低估佢旗下產品嘅質量。不過，敏華上星期五（１６日）反彈過逾８巴仙後，今日都要回吐返近
４巴仙，埋單６﹒９５銀。
　
＊豪派特別息４４０舞高，泛海系績前炒起好風騷＊
　
　　泛海系今日風生水起，匯漢（００２１４）上個月發盈喜，下禮拜三（２８日）就會放榜，
今日提早炒起１８巴仙，報２﹒８９銀；泛海（００１２９）亦飛起一成半，報２﹒７１銀；泛
海酒店（００２９２）就有近１２巴仙進帳，埋單０﹒６７銀。
　　福澤（０８１０８）上禮拜五（１６日）急插近８６巴仙之後停牌，真係嚇親，原來係主席
李革因為個人原因喺場內賣曬所有持股。今日知原因之後缸友們都爭住搶貨，結果反彈番近半成
，收報０﹒２３１銀，但同急插之前仲有好大段距離！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。