《小傳日記》魚缸結算前碌低，二萬三關有點危！

　　《小傳日記》過去兩日，香江魚缸畀人仔貶值搞到頭暈暈。今朝（２７日）諗住可以跟外圍
輕輕高開，回一回氣先，點知眨吓眼就被淡友攻陷，調頭倒跌最多逾３００點，低見２３００２
點，一班牛仔差Ｄ喺聽日（２８日）期指結算日前被打靶，簡直險過剃頭！
　　不過魚缸入面，近千隻魚毛就難逃舉白旗命運，中資股繼續捱打。恆指全日就唔見１９３點
收２３１３２，連輸三場，國指一樣無晒精神，埋單碌低８９點報９６０８。
　　市場氣氛差咗，成交當然繼續靜，全日得番逾５８７億銀。未來兩日有班中資股趕住派成績
，缸友坐穩Ｄ喇。　　　　

＊神華明放榜街坊心慌慌，中海油跑輸油服卻歡愉＊

　　神州黑色系商品期貨全線急插，動力煤跌停牌，焦煤亦唔見咗近半成。中煤能源
（０１８９８）、兗煤（０１１７１）齊齊瞓低近５巴仙，報４﹒４６同５﹒９０銀。聽日放榜
嘅神華（０１０８８）亦跣低２巴仙，報１６﹒１４銀。但蒙古焦煤（００９７５）一於少理，
照飆高逾１３巴仙，收０﹒２７銀。
　　孖屐擔心油組減產協議簽唔成，油價跌逾１巴仙。中海油（００８８３）更遭瑞信維持「跑
輸孖屐」評級，踢跌咗近３巴仙，報１０﹒２０銀。中石油（００８５７）、中石化
（００３８６）亦冇咗１至２巴仙。
　　油服佬反而逆流而上，百勤（０２１７８）、安東油服（０３３３７）跳起近８巴仙。中海
油服（０２８８３）明日放榜前獲大摩看好，都企高近３巴仙，埋單７﹒９１銀。

＊母子出成績中銀較招積，長實賣廣場逆風傲飛翔＊

　　中行（０３９８８）首三季賺１３４８億人仔多咗２﹒５巴仙，德銀讚佢表現穩定、繼續叫
「買」，不過瑞信話撥備前經營溢利增長放緩緊，中行結果趴低逾１巴仙，報３﹒４８銀。佢個
仔中銀香港拎成績表後嘅反應完全唔同，頭三季減值準備前經營溢利升２巴仙至２２３億，應聲
飛起近１巴仙，報２７﹒７０銀。另外中銀董事會終於拍板計劃賣集友，但都要等阿爺開綠燈先
。
　　超人又有新舉動，長實同李超人海外基金會出售上海浦東新區嘅「世紀匯廣場」項目。長實
預計錄到逾６２億收益，瑞信率先唱好認為可以增強財務狀況，仲將「他屐」升到去６６﹒３銀
，長實全日彈高近１巴仙，收５５﹒６銀。
　　有傳「世紀匯廣場」嘅買家係中國人壽，不過發言人就話未收到有關信息。國壽
（０２６２８）就碌低１巴仙，得返１９﹒８銀。

＊蘋果系趴低通達發神威，長汽開後波吉利同坎坷＊

　　蘋果績後噚晚股價即刻向下趴低，瑞聲（０２０１８）噚日雖然逆踢高近２巴仙，但似乎只
係曇花一現，今日更碌低逾２巴仙，收報７４﹒０５銀，連條百天線（約７４﹒３９４元）都無
埋啊陰功！整手機殼嘅比亞迪電子（００２８５），來自蘋果訂單較多，今日亦大跌逾３巴仙，
收報６﹒２８銀。至於街坊通達（００６９８）客仔主要來自神州品牌，逆市踢高約２巴仙，收
報２﹒０２銀。
　　長汽（０２３３３）業績未能成為股價上升引擊之餘，更拖累長汽又開後波。今日再駛低逾
４巴仙，收報７﹒７６銀。吉利（００１７５）仲慘，唔見咗逾５巴仙，收報８﹒３２銀，唔通
星期二（２５日）公仔圖上出現個粒係「黃昏之星」？東風（００４８９）同比亞迪
（０１２１１）齊齊趴低近２巴仙。

＊聯泰起勢衝德普再發功，七年後解凍第一電訊痛＊

　　聯泰（００３１１）獲上海紡織按１﹒８銀提要約收購，加埋預期出售非核心業務後派
０﹒８２銀息，合計２﹒７銀可以話為最低價咁滯！聯泰復牌後飆高逾６８巴仙，收報３﹒１１
銀。另一邊廂，第一電訊（００８６５）停牌近七年後，終於復牌。鎖住７年咁耐，有得走人，
仲唔走咩！第一電訊被質低逾６３巴仙，收報０﹒２３７銀，成為今日跌幅第一嘅魚毛。
　　德普（０３８２３）同核數師溝通完後，再反駁早前空軍格勞克斯嘅指控，雖然今日彈高約
６巴仙，收報０﹒２２７銀，但要回到之前嘅兩個幾銀紙似乎仍遙遙無期！
　　航標（０１１９０）主席肖智通質押嘅２８﹒５巴仙持股被出售，由投資者謝桂琳接貨，並
搖身一變成為公司最大股東，缸公司隨時出現控股權變動，助踢高近１５巴仙，收報０﹒５１銀
。
　　威華達（００６２２）澄清指可能合資夥伴得恆大（０３３３３）同眾安保險，「三馬」馬
化騰、馬明哲同埋馬雲都唔係可能合資夥伴。澄清後，威華達嘔返近１３巴仙，收報０﹒４４５
銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。