《古臣周記–古臣》遊客赴澳門興致未如往年，賭股黃金周難炒起！

　　《古臣周記》傳統十一黃金周唔係炒消費就炒旅遊，不過今年疫情緣故，以馬交濠賭佬相信
都未必可以翻到身啦。事關雖然神州喺上星期三（２３日）恢復全國赴澳自由行簽註，但預計審
批都要一定時間，而且目前馬交酒店訂房率仲係麻麻地，今年出現「既不旺丁，又不旺財」嘅機
會率都幾高，所以要短炒馬交佬嘅缸友要留神！

＊花旗指神州對赴澳簽証設軟上限＊

　　近排最主要拖累馬交佬嘅消息就係，有傳神州近排又大力打擊博彩中介，賭客兌換一定銀碼
籌碼時要登記個人資料，導致中介人換碼出現困難，嚴重打擊流動性，亦有業界人士指有賭客因
此到賭場提取之前存放嘅現金，搞到出現「擠提」添！近日行內人士指，由於疫情導致賭收下滑
，估計要等遊客增加返，先會改善到現金流。因此，目前有賭場採取分期嘅方式去比賭客還款。
大行大和指，咁樣會令貴賓廳嘅業務更雪上加霜。
　　另一方面，之前孖屐一直憧憬神州喺８月中開始，開放比珠海及廣東赴澳簽證之後，會提振
賭收，不過馬交８月暑假旺季賭收仍然連續五個月錄得按年逾九成嘅跌幅。所以，雖然馬交自上
星期三開始比全國居民辦理赴澳簽証，但阿臣對於刺激賭收嘅睇法仍表示保留。
　　大行花旗發表報告，話唔似得以前咁一申請就獲批，依家神州暫時為赴澳遊客簽證設定「軟
上限」，又預計第四季賭收會按年跌七成四，以及如果再無新一波嘅疫情，馬交賭收都要到出年
農曆新年前先可以恢復正常。實德環球（００４８７）副主席馬浩文就表示，估計神州赴澳自由
行簽注起碼都要到九月尾先出結果，所以暫時仲係來自廣東嘅旅客居多。

＊出發前做病毒檢測影響旅遊意欲＊

　　除咗簽證可能設「軟上限」之外，辦理簽證及其他入境嘅防疫措施都可能令遊客卻步。美銀
證券指出，之前神州個人遊簽證只需要透過自助機申請，但而家就要親自到指定地點辦理，所以
要用多咗時間。唔單止咁，遊客仲要喺出發之前作新冠病毒檢測。據該行上月所作嘅調查顯示，
得四成七嘅人願意因此接受新冠測試。
　　再睇埋酒店預訂數據，阿臣係咁意搵下主要馬交賭場旗下嘅酒店，發現１０月１日國慶正日
嘅房間仲有得預訂，同以往大時大節一房難求嘅情況相比真係差好遠！而且，就算係五星級酒店
，房價劈價嘅程度都幾大，有報章統計，五星酒店平均減價五成、四星或以上每晚房價最低只需
要１０００銀。業內人士話，如果整體入住率有三、四，賭收恢復番舊年嘅三至五成已經算唔錯
。

＊抽中一手寶尊電商，暫中線持有＊

　　所以今年十一黃金周大家都唔好抱咁大期望，而且第四季流感高峰期疫情會唔會翻發都仲存
在好大未知之數，所以阿臣都勸大家忍一忍手，係都等埋十月初啲賭收數據出爐再作打算。
　　另外，上星期阿臣抽兩手新股寶尊電商（０９９９１），最終獲發一手（每股發售價
８２﹒９元）。呢隻股阿臣預炒螞蟻上市概念，所以暫時中線持有，初步他屐睇９３銀。不過阿
臣都明白最近花旗國大選前夕美股會比較波動，而且中概股隨時受累，所以止蝕位就放喺７８銀
。

　　表列截至９月３０日早上１１時３０分阿臣投資組合表現：
　
　　股份　　　　　　股數　　　　　平均買入價（元）　　　現價（元）　　　總值（元）
　　－－－－－－－－－－－－－－－－－－－－－－－－－－－－－－－－－－－－－－－
　　港股：　
　　ＳＰＤＲ金ＥＴＦ　　１０股　　１０９７﹒００　　１３７５﹒５０　　　１３７５５
　　平安好醫生　　　　２００股　　　　５２﹒９０　　　　９９﹒５５　　　１９９１０
　　阿里巴巴　　　　　２００股　　　２１０﹒５０　　　２７３﹒８０　　　５４７６０
　　港交所　　　　　　１００股　　　２６４﹒５０　　　３６０﹒６０　　　３６０６０
　　寶尊電商　　　　　１００股　　　　８２﹒９０　　　　８１﹒５５　　　　８１５５
　　－－－－－－－－－－－－－－－－－－－－－－－－－－－－－－－－－－－－－－－
　　股票市值　　　　：　　１３２６４０元　
　　剩餘現金　　　　：　　１００５１４元　
　　組合淨值　　　　：　　２３３１５４元　
　　組合本月收益表現：　　－１﹒９２％（截至上月底止組合淨值：２３７７２９元）
　　組合累計收益表現：　＋１２２﹒１％（本金１０５０００元計）（２０１６年８月開倉）
　
　　＊數據截至９月３０日早上１１時３０分