《小傳日記》長周末前唔敢衝，好友５月再進攻！

　　《小傳日記》花旗國噚晚多間大型企業派成績，表現就好壞參半，當地魚缸都無太大變動，
道指微微收升６點報２０９８１；納指就喺科網股強勢支持下，再升２３點報６０４８，創收市
新高。
　　外圍無動靜，而香江過埋今日就迎接五一假期，祖國魚缸休市，孖屐觀望氣氛好濃，今日
（２８日）恆指低開７點後就窄幅上落。多隻中字輩都無心機，近日強勢嘅ＱＱ（００７００）
同友邦（０１２９９）都喺高位整固，得返部分北水受惠股開ＰＡＲＴＹ，結果恆指埋單就唔見
８３點報２４６１５，終止四連升；國２指就收低４１點報１０２１９。
　　恆指連升四個月，單４月份進帳５０３點。由於大市續受北水推動，加埋外圍有好表現，這
個５月應不窮。之不過，長周末前缸友都作壁上觀，今日魚缸成交只係得番６５４億銀。
　
＊連升四個月大市確威威，５月應不窮期望好氣勢＊
　
　　平保（０２３１８）、國壽（０２６２８）齊齊放榜，前者首季多賺１１％至約２３０億人
仔，獲得野村讚好，維持目標價６４﹒３８銀；後者就多賺１７％至逾６１億人仔，並計劃斥
１３２億人仔參與廣發銀行增發股份，野村都維持買入評級，目標價３２﹒１５銀。不過，兩位
都無太大反應，埋單微微行低收報４３﹒８銀及２３﹒６５銀。
　　渣打（０２８８８）噚日趁業績有驚喜而炒高咗，點知有消息指，野村賣咗渣打股份畀機構
投資者，套現５億美金。咁大筆數，當然嚇親缸友跟住掟貨，最終渣打埋單急挫逾３巴仙收
７２﹒９銀。
　
＊壽仔與平仔績後微微軟，野記沽渣打高追太心酸＊
　
　　賭股輪住放榜，噚日永利澳門（０１１２８）業績唔錯，今日就輪到美高梅（０２２８２）
報喜，首季經調整ＥＢＩＴＤＡ為１﹒４億美金增２５巴仙，高盛出報告叫買貨，目標價由
１８﹒４微升至１８﹒６銀以示支持。美高梅埋單開心跳起逾４巴仙收１７﹒７２銀，讚。
　　長汽（０２３３３）首季少賺１８巴仙至逾１９億人仔，表現令人失望，高盛摩通都叫沽貨
，分別降目標價至６﹒２１銀及７銀添！長汽當然傷心，收市碌低逾５巴仙８﹒４４銀。
　　中芯（００９８１）亦會跟住派成績，下個月１０號揭盅，不過缸友已經偷步入市，推高中
芯逾５巴仙埋單收９﹒８６銀。巨擘ＡＳＭ（００５２２）就繼續衝前逾３巴仙，曾去到
１１７﹒８銀再創新高添。
　
＊美高梅跳起皆因盤數靚，中芯ＡＳＭ今天亦好正＊
　
　　Ａ場呢個禮拜都唔上唔落，祖國缸友喺上面都無心戀戰，寧願南下香江搵食，過去三日流入
香江嘅北水都有超過２０億銀，ＩＧＧ（００７９９）更加一連四日成為港股通（深）十大活躍
股榜首，今日又破頂，已經去到１２﹒６銀插旗。不過始終高處不勝寒，尾市碌番落嚟，收市微
跌報１１﹒８４銀。但今年以來，其實已經升咗１﹒３倍，真係好巴閉。
　　祖國缸友一向都好吼國產貨，用完可以變貂嬋嘅神ＡＰＰ美圖（０１３５７）今日都升近２
巴仙，報１１﹒７銀。今日神州牛奶一哥伊利話買唔成中國聖牧（０１４３２），聖牧就比缸友
掟貨，跣低咗超過１６巴仙，報１﹒６３銀。
　
＊北水夠滋潤港股通旺場，瑞聲與舜宇山頂意高漲＊
　
　　蘋果今年係威係勢，缸友好期待「唉瘋八」會係咩樣，無論喺寶島同香江嘅相關股份都喺咁
破頂，藍戰士瑞聲（０２０１８）繼續一飛衝天，今日１１５銀為最新山頂位，全日埋單計升咗
超過５巴仙，報１１４﹒２銀。國產貨華為ＯＰＰＯ先係舜宇（０２３８２）嘅大客，但舜宇都
有得坐吓順風車，仲坐到去最新山頂位６５﹒３銀，全日升咗近２巴仙，報６４銀。
　　亞視熄咗機，蝕咗好多年嘅有線（０１０９７）都終於有人肯「泵水」畀佢，有線老細出嚟
話五月底嘅股東大會，有好大「餐士」會獲得股東通過注資，有線股價今日即刻精神晒，升咗超
過９巴仙，報０﹒５９銀。香港電視行業老大ＴＶＢ（００５１１）今日停賽，而缸友對此都仲
係一頭霧水。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。