《小傳日記》中港魚缸賀放水，內銀發威缸友追！

　　《小傳日記》花旗國嘅１０年期國債息再一次直逼３厘大關，資金流去債市嘅憂慮未消除，
嚇到花旗國魚缸腳軟軟，道指噚晚（２３日）碌低１４點報２４４４８點。但好在仲有Ａ場撐住
，香江呢邊成功免受影響。
　　香江魚缸今朝（２４日）一開閘就彈高９９點，開報３０３５３。之後缸友醒起人行聽日（
２５日）實施定向降準，資金吸納中資金融股齊齊造好，魚缸愈升愈有，一度高見３０６６５點
，漲幅達４１０點，重上十天線（３０５２１點）、廿天線（３０３７４點）、百天線
（３０６３４點），勁呀！
　　重磅嘅藍戰士今日就唔算太突出，不過勝在有幾隻憧憬Ｈ股全流通嘅魚毛，同埋內房佬幫手
撐住，所以埋單都仍然升３８１點或逾１巴仙，報３０６３６點。Ａ場飛起近２巴仙報
３１２８點，國指跟勢漲２４４點報１２２４４點。雖然主板成交都未回復返千億，但都算多過
噚日少少喇，有９７４﹒７０億銀。

＊降準明實施內銀笑瞇瞇，拆息密密升大象係最醒＊

　　人行今日放水３００億人仔，以緩解資金緊張，而祖國聽日就會實施定向降準，將會有更多
水湧入孖屐，刺激內銀佬全線有好表現。建行（００９３９）跳起逾２巴仙，報８﹒２２銀；農
行（０１２８８）都衝前逾２巴仙，報４﹒３６銀；招行（０３９６８）彈起逾３巴仙，報
３３﹒１５銀；中行（０３９８８）飛起近２巴仙，報４﹒２銀。
　　拆息高企，本地銀行佬同樣造好，高盛就建議大家可以吼實其中幾隻。好似近排密密升嘅大
象（００００５），今日又彈起近１巴仙，報７７﹒６５銀。不過，其餘兩隻獲睇好嘅就唔太突
出，小象（０００１１）表現一般，靠穩報１９２﹒７銀；中銀香江（０２３８８）彈起唔夠半
個巴仙，報３９﹒３銀。
　　
＊大摩穆迪撐內房佬翻生，水泥叨叨光潤泥高處望＊

　　個別祖國磚頭佬畀大摩支魔笛吹起，好似噚日受到海南限購消息影響嘅雅居樂
（０３３８３），大摩升目標價至１８﹒２銀，遠高於噚日收市價，雅居樂埋單跳起番逾５巴仙
收１６銀；恆大（０３３３３）都獲送上祝福，大摩上望３３﹒３銀添，恆大衝前逾７巴仙收
２５﹒６５銀，仲有大把水位，勁。
　　除此之外，評級機構穆迪都撐埋一份，指未來６至１２個月，阿爺應該唔會推出更嚴厲嘅調
控政策，相信樓價唔會大跌！交投比較旺嘅融創（０１９１８）同碧桂園（０２００７）升得仲
勁，分別收漲近８巴仙及逾６巴仙，報３４﹒２５銀及１６﹒２６銀。
　　內房佬生意好，水泥佬當然都開心，潤泥（０１３１３）最近派咗省鏡季績之後，瑞信已經
升目標至１０銀，今日潤泥就繼續高高收，跳起近８巴仙報７﹒８４銀，仲曾經破頂見７﹒８９
銀添；一班街坊都叨光向前衝，海螺水泥（００９１４）、中建材（０３３２３）分別有逾５及
近７巴仙落袋，分別收４７﹒５銀及８﹒９３銀。

＊花旗國讓步俄鋁勁風騷，大美人棄租落鑊畀個好＊

　　貿易戰受害者之一嘅俄鋁（００４８６），終於有好消息出現喇！花旗國對制裁態度軟化，
財政部話，如果俄鋁主要股東德里帕斯卡放棄控制權，就會減輕制裁；仲批准企業喺１０月２３
號前，可以繼續同俄鋁做生意。見到有轉機，傷痕纍纍嘅俄鋁即刻向花旗申除解除制裁添。俄鋁
當然開心到飛起，下半場果陣，喺莫斯科上市嘅俄鋁都大反擊，香江俄鋁即時食住個勢再衝前逾
４３巴仙收報２﹒１８銀，勁！雖然有排都未去番制裁前嘅水平，但起碼止止血先吧。
　　不過，消息一出，倫敦３個月期鋁一度重挫超過９巴仙，創下１９８７年１０月以來最大跌
幅，啱啱公布咗首季少賺１９巴仙嘅中鋁（０２６００），就當然大失所望，急回番逾７巴仙收
４﹒４７銀。
　　香江零售界呢邊，亦有位昔日「大美人」突然落鑊，思捷（００３３０）想當年喺２００７
年股價高達１１１銀左右，但大美人「日漸衰老」，仲做埋「睡公主」，股價一沉不起。難得有
消息話，公司縮減規模，棄租禮頓中心旗艦店。冀望慳番唔少租金下，思捷竟然炒高２０巴仙報
２﹒８２銀！

＊分拆反應好平保衝得高，憧憬全流通兗煤向前衝＊

　　消息指平保（０２３１８）分拆嘅平安健康醫療科技（０１８３３）（簡稱：平安好醫生）
招股反應熱爆，市傳首日孖展近１２００億，認真誇張！平保當然就開心喇，飛起逾１巴仙，報
８３﹒２５銀。
　　聯想控股（０３３９６）嘅Ｈ股全流通申請獲通過，８﹒８億股內資股將轉換成Ｈ股，股價
就當然繼續開心跳起喇，埋單漲逾３巴仙，報２５﹒９５銀。其他有Ａ股嘅Ｈ股都一樣造好，兗
煤（０１１７１）大升７巴仙報１１﹒１６銀；馬鋼（００３２３）衝前逾６巴仙，報３﹒９５
銀；萬科企業（０２２０２）彈高近４巴仙，報３３﹒３５銀；ＨＴＳＣ（０６８８６）跳起逾
４巴仙，報１５﹒６４銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。