《小傳日記》Ａ場不勝寒，缸友有點慌；內房反高潮，午後急急放

　　《小傳日記》經歷咗噚日（３０日）中港大升市之後，今日（３１日）就要回歸現實，回一
回，唞一唞。雖然阿爺都繼續放水，不過Ａ場衝到上去３８３６點高位之後，Ｄ獲利回吐盤就湧
晒出嚟，下半場仲急插番落去，埋單唔見１巴仙收３７４７點。
　　香江呢邊，食住道指噚晚爆高２６３點，同埋今朝Ａ場嘅強勢，喺季度最後一日，飛升最多
２５８點登上二萬五嘅光榮任務，多隻大隻佬都創逾５２周新高。不過，唔知缸友係咪驚聽日
（１日）阿爺公布ＰＭＩ會唔對辦，於是今日賺夠沽貨先。最終香江魚缸只係升４５點收報
２４９００，國指就漲３９點收１２３４６。全日主板成交１４８９億銀，係自２００８年１月
２３日以來新高；當日受到美國減息四分三厘刺激，成交高達１５６４億銀左右！

＊先升後回氣成交繼續漲，內房趁高放懶理好消息＊

　　噚日個巿升到「嘭嘭聲」，缸湖傳聞滿天飛，其中就有傳阿爺人行喺飯後三點半，就磚頭政
策開ＰＣ；但阿爺就正面抽擊，澄清無咁嘅事。點知，開ＰＣ係假嘅，鬆章就真！喺收巿後公布
將二套房嘅首期，由六成降低至四成，勝孖屐預期嘅五成添；另外，個人買家置業２年或以上，
更可豁免徵收營業稅。反
　　阿爺送大禮，今日差唔多全線內房都炒高慶祝。但係，午巿之後散水聲不絕，內房股反高潮
倒插，雅居樂（０３３８３）就跌得最甘，全日跌近７巴仙收４﹒６６銀；若按日內高位計，插
低近１４巴仙呀！
　　此外，唔少大隻內房都上演高台後跳水，其中保利置業（００１１９）、祖國海外
（００６８８）同萬地（０２２０２）都分別喺最高位急回１２巴仙、８巴仙及８巴仙。

＊德國佬唱好生發發照唞，ＱＱ續有景長和略低收＊

　　阿爺開綠燈，激活「港股通」，作為缸友無可能唔接受！德銀都話生發發（００３８８）攤
長嚟講大把「著數」，目標價睇上１９９銀。查實，生發發今日開賽無幾耐已經飆上去
１９９﹒２銀，破咗德銀嗰目標價兼創逾７年新高。但都係挑戰唔到兩張紅衫魚，臨尾仲要跌返
１﹒６巴仙，報１９０銀。睇黎又要再重整力量先可以釣多條紅衫魚！
　　超人１３號（０００１３）諗住６月３日除牌，之後超人１號（００００１）就會分拆長地
出嚟，唔知超人係咪計過嗰日係好日呢？但今日就未必係嘞，事關超人１號同超人１３號今日破
頂之後分別回返１巴仙同０﹒６巴仙，埋單報１５８﹒８銀同１０７﹒６銀。
　　前面班破頂藍戰士紛紛敗陣而回。ＱＱ（００７００）微眾銀行諗住４月開張，花旗就睇好
ＱＱ，話值得買。ＱＱ今日開場見１５１﹒４銀，唔單止係今日最高位，仲係上市新高，最後都
有近２巴仙入帳，報１４７﹒２銀。唔駛倒跌兼仲有升幅，就已經好威水啦！

＊ＡＩＧ減持財仔在發愁，股仔玩批盪有喜亦有憂＊

　　每逢巿好，股仔水漲船高，班芬佬或者股東都會乘機抽水套現，可謂永恆不變嘅定律。就好
似ＡＩＧ咁，啱啱以每股１５﹒１５銀，掟咗２﹒５６億股財險（０２３２８），套現近４０億
銀。呢批貨約佔已發行Ｈ仔嘅５﹒５巴仙，減持後ＡＩＧ持股將由９﹒９％降至４﹒４巴仙。畀
主要股東減持，老散就最忌啦，是以財險就被插低咗３巴仙收１５﹒３２銀，同時係全日成交金
額最多股份。
　　但同係股仔唔同命，榮豐（０００６３）又係畀主要股東掟貨，今鋪擬掟６２﹒６２巴仙股
權添，雖然仲喺摸酒杯底階段，但今早復牌即炒高，收市都有近３６巴仙升幅收０﹒４銀。
　　趁個巿旺，梗有公司攤大手板度水咖啦，好似康哲（００８６７）、祖國中藥
（００５７０），齊齊玩配股，但因同時康哲嘅大股東減持，而祖國中藥則抽水搞收購，所以今
日兩股各插近８巴仙及炒高逾９巴仙。

＊福耀新登場抽中荷包脹，北京車漢能今日有異樣＊

　　雖然祖國錢莊業績無料到，不過今日都幾有力，德銀就睇好中行（０３９８８），話「滬港
通」範圍擴大有利跨境資金流動，今日強勢破頂，收市仲有０﹒５巴仙進帳，跑贏同業。至於同
樣被德銀同瑞信力撐嘅建行（００９３９）都衝高０﹒３巴仙收６﹒４４銀。細粒Ｄ嘅民行
（０１９８８），全年賺超過５巴仙，不過大行驚貸款質素轉差，都唔係太睇好前景，搞到本來
彈高逾５巴仙，最終收市要倒跌番落去，慘。
　　另一邊廂，首日加入魚缸嘅福耀玻璃（０３６０６）高開一成一，雖然個市之後縮咗水，但
都可以保持升勢，收市１９銀，比招股價高咗１３巴仙。同日上埸嘅高偉電子（０１４１５）表
現就差得多，今日一落場就同招股價持平，收市仲要碌低近一成添。
　　最後，小傳發現北京汽車（０１９５８）竟然突然出現勁多大手成交，唔通有啲嘢？股價仲
處於高位，今日只係輕微踢高０﹒４巴仙，有貨嘅缸友打醒十二分精神喇！仲有熱炒股漢能
（００５６６）收市前都衝高近４巴仙，成交高達近１１億銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。