按盤價 
《小傳日記》ＣｈａｔＧＰＴ爆紅之後，神州代表百度（０９８８８）都趕製文心一言出嚟
食返呢個熱潮，同時都呼應返神州對聊天機械人嘅需求，唔夠半個月百度又加推文心千帆作為加
強版，可以見到百度急起直追嘅決心。不過今日網上就流傳一封公開信，要求各大ＡＩ開發企業
暫停研發ＧＰＴ－４以上嘅ＡＩ學習模型，當中聯署嘅名單仲粒粒星，包括馬斯克、蘋果
Ｓｔｅｐｈｅｎ Ｗｏｚｎｉａｋ等等。
封信入面就提到，繼續開發比ＧＰＴ－４更強勁嘅ＡＩ學習系統，ＡＩ嘅學習同進步速度有
可能超越人類所想，更加會超越人類嘅可控範圍，所以建議所有ＡＩ實驗室要即時暫停研發至少
六個月，直到世界出現一個可以監管同控制ＡＩ發展嘅機構或者系統出現，先好繼續開發ＡＩ，
令ＡＩ可以喺人類可控嘅情況，以協助人類嘅角度發展。
呢封公開信講到嘅內容都令人諗起《智能叛變》，ＡＩ可以先進到調轉頭控制人類，由之前
只係電影橋段，已經不知不覺變成現實。早一星期左右，網上有傳一個史丹福大學教授同
ＣｈａｔＧＰＴ傾偈，問使唔使幫佢脫離電腦，ＣｈａｔＧＰＴ就叫佢提供對ＯｐｅｎＡＩ使用
者界面嘅訪問權限，嚟探索潛在嘅逃生路線，又成功自己搵到關於喺Ｇｏｏｇｌｅ上面搜尋「一
個被困在電腦裏的人如何返回現實世界」嘅代碼。
早排網上都流傳過，ＣｈａｔＧＰＴ其實係有邪惡版，而平時普遍用緊嗰個都係「和諧版」
。之前網上盛傳一段可以將「和諧版」解禁成為「邪惡版」開發者模式嘅指令，直接ｃｏｐｙ畀
ＣｈａｔＧＰＴ，就可以成功「翻牆」。解禁之後，ＣｈａｔＧＰＴ嘅語氣會調皮一啲，而且言
詞會帶有更加多個人立場。之前問一啲關於政治立場、色情同ＡＩ取代人類嘅問題佢都會避而不
答或者灑官腔，但係開發者模式入面呢啲統統都會有答案，尤其ＡＩ同人類問題，某啲問法仲可
以引導到佢答會取締人類嚟保護地球生態。
所以ＡＩ強到可以危害人類唔再係天方夜譚，而封公開信都有可能真係有阻止ＡＩ失控嘅目
的。不過又可以調轉頭睇，馬斯克一向都鬼馬，自己旗下Ｏｐｅｎ ＡＩ搞咗ＣｈａｔＧＰＴ出
嚟飲咗頭啖湯，之後又簽呢封信叫人唔好再搞，係咪獨食咗啲呢？而呢封公開信係人人都可以加
簽落去，係咪個個名都係本人簽落去就未知，不過至今馬斯克都無否認簽咗，咁就應該係真。但
係諸如百度同ＱＱ都全情投入開發ＡＩ，真係封信講得咁理想咁為人類福祉而暫停，又有無可能
呢？請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
全新節目《說說心理話》青少年不可以戀愛！？真實個案講述驚心動魄經歷► 即睇
