《小傳日記》人行出雙降，魚缸遇霜降；見高鬥快走，遲走好惆悵！

　　《小傳日記》睇住Ａ場一日弱過一日，連三千關都失守，好友節節敗退，阿爺噚日（２５日
）傍晚突然出手減息四分一厘，兼降準０﹒５個百分點。歐美魚缸率先收到呢份喜訊，歐洲股市
彈起３至５％；而花旗亦一度衝高近３巴仙。點知花旗原來係「假反彈」，之後竟然調頭倒插
２００點收１５６６６，唔少缸友都中咗伏。慘！
　　見到花旗國咁嘅景況，Ａ場缸友都唔敢亂衝入市撈底，升到去近三千一關又遇上大沽壓，最
終倒跌逾１巴仙收２９２７。香江今日就延續反反覆覆，早段急插逾３００點，之後跟隨Ａ場上
上落落，下午市甫開上升最多近３００點，但之後就江河日下，尾市急插３２４點收
２１０８０；國指就碌低８６點收９４２７。全日成交１０８９億銀。今次阿爺救市都起唔到即
時效用，「雙降」變「霜降」，好友想反擊就真係難上加難了…
　
＊減息兼降準仍然不輕鬆，缸邊風浪急無謂胡亂衝＊
　
　　阿爺見股市唔對路，再度推「雙降」緊急救亡，債務重災區嘅磚頭股輕鬆唔少，龍頭中海外
（００６８８）升咗成日尾市打個和，無升跌。富力地產（０２７７７）好啲，有成４巴仙落袋
，收報６﹒６７銀。街坊雅居樂（０３３８３）核心利潤跌咗五成，股價想有睇頭都難喇，下半
場急急插低逾７巴仙收３﹒４３銀。世房（００８１３）完場之後就會放榜，績前曾碌低近８新
低至９﹒２３銀，臨尾就企穩，收９﹒７１銀。
　　超人兩大旗艦長和（００００１）同長實（０１１１３）噚日完場後放榜，大行對兩份成績
表睇法都有啲唔同，有維持兩間公司嘅目標價，亦都有削價，不過始乎無咩邊間升目標價，搞到
長和同長實分別碌低近２巴仙同４巴仙，收報１００﹒３銀同５０﹒３銀，長實仲續創上市新低
添。街坊新地（０００１６）就會喺下個月１０號先放榜，今日就企高唔夠１巴仙。

＊內房有頭威可惜失尾陣，長和系孖寶績後齊被質＊

　　旺旺（００１５１）成績表唔合格，成班大行合作無間，齊齊唱淡公司。缸友見到都心灰意
冷，股價碌低近５巴仙，報６﹒２４銀，盤中低見５﹒８７銀，創近四年新低。街坊康師傳
（００３２２）雖然獲主要股東三洋食品增持，但仲未企得番起身，同樣趴低近５巴仙，報
１１﹒４４銀，創咗６年新低。
　　馬交第二季旅客總消費（不包括博彩收入）跌咗近２５巴仙至約１２２﹒５億澳門元，消息
成為推低賭仔股價藉口。銀娛（０００２７）再插近６巴仙，報２４﹒２５銀，創近三年新低兼
成為最差藍戰士。金沙（０１９２８）同新濠國際（００２００）亦分別走低３巴仙至５巴仙。
　　除咗上面嗰幾位藍戰士，恆安（０１０４４）、利豐（００４９４）同聯想（００９９２）
今日都創咗約兩年、六年半同兩年新低，分別報７１﹒９銀、４﹒９７銀同６﹒１５銀。

＊旺旺被唱淡師傅陪著曳，濠賭數據弱銀娛甚閉翳＊

　　油價跌咗咁耐，終於因為跌過籠而反彈最多３巴仙，一班油兄弟應聲衝前，昆侖能源
（００１３５）又踢起逾３巴仙，報５﹒０６銀，不過有排都未恢復元氣。大阿哥中石油
（００８５７）、中海油（００８８３）都有近１至２巴仙收穫，報６﹒２９同８﹒０６銀；三
子威盡藍戰士，拎到第一、第七同第三位。但中石化（００３８６）就無癮，離群碌低近２巴仙
。
　　中航科工（０２３５７）中期賺少４巴仙，但股價本來都企高近６巴仙，不過尾市跟大隊碌
番落去，最終唔見近２巴仙報５﹒０２銀。中船防務（００３１７）都係今日放榜，曾經偷步行
前近５巴仙，可惜最後都難逃一跌，挫近２巴仙收１７﹒８６銀。航天控股（０００３１）噚日
拎成績，賺多３﹒７倍，今日就彈起３巴仙收１銀。星期五（２８日）先放榜嘅中航工業
（００２３２）同航天萬源（０１１８５）仲勁，跳高近７同５巴仙。

＊油價略反彈油股畀個讚，股仔大上落要吃驚風散＊

　　股仔方面，華富（００９５２）成交暴漲，全日有成１﹒１５億，股價都飛起逾３３巴仙，
報１﹒３６銀；飛尚無煙煤（０１７３８）又突然飆高４０巴仙，夾埋佔據表現最好頭兩位。
　　不過另一邊廂，企展控股（０１８０８）今朝復牌，終止以１﹒４億出售軟件解決方案公司
，結果瞓低近３９巴仙，得返０﹒１３８銀，差盡魚缸。
　　上海証大（００７５５）豪花４５億人仔買南京１３塊地發展。仲有時富金融
（００５１０）終止出售時富金融股份協商；兩個復牌之後，分別唔見咗逾３１同近２１巴仙，
埋單０﹒１２９同０﹒３２銀，認真慘情。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。