《小傳日記》中港魚缸破大關，淡友潰敗確淒慘！

　　《小傳日記》睇住呢幾日個魚缸，完全感受到咩叫「未出發先興奮」！藍籌股業績期今日由
電能（００００６）揭開序幕，但係魚缸已經快人一步成功寫下「三連升」，兼衝破埋二萬四大
關，簡直勢不可擋！
　　魚缸今朝（２４日）一開市就彈高約百點，跟住匯豐ＰＭＩ數據夠晒省鏡，錄得１８個月新
高，再加埋Ａ仔場又成功攻陷２１００大關，收報２１０５點踢高逾１巴仙，即刻刺激大市升到
去２４１５０點高位，係自２０１１年４月下旬以來嘅新高。完場時都仲企喺二萬四樓上，彈高
１６９點收２４１４１點，成交再增加近８巴仙至８６０﹒３億銀，全日總共有４０大隻佬熊證
打靶添！
　　國貨指數都唔弱，差ＤＤ就上番萬一大關，全日急升１１８點收１０９３９，終於創咗今年
新高啦！

＊ＰＭＩ靚仔Ａ升我又升，攀越三年高成交也提振＊

　　中資股嘅氣勢真係不容忽視，今日推高國貨指數嘅功臣就係內險股啦！摩通今日出報告話，
預計內險股盈利大幅增長，獲揀為首選之一嘅平保（０２３１８）全日踢高４巴仙，收６４﹒２
銀，除咗做咗國指貢獻最多嘅功臣之外，仲做埋表現最好大隻佬，認真叻仔。街坊人保
（０１３３９）同國壽（０２６２８）都唔輸蝕，分別升４巴仙同２﹒６巴仙。
　　至於最叻仔國貨佬就由長汽（０２３３３）擔當。不過唔好以為有咩好消息推動，相反公司
上半年純利跌３巴仙；唔單止驚喜欠奉，仲畀瑞銀話下半年仍有不明朗因素，維持中性評級。之
不過，長汽一於少理，全日竟然踢高逾７巴仙收３２﹒５銀，真係夠晒奇！
　　望返Ａ仔場表現咁好，Ａ股ＥＴＦ自然水漲船高，安碩Ａ５０（０２８２３）成交繼續高高
高，有成３３﹒７億銀，係全日最多人玩嘅，收市仲升２﹒７巴仙收９﹒１１銀。南方Ａ５０
（０２８２２）同南方Ａ５０－Ｒ（８２８２２）都一樣咁受歡迎，齊齊踢高近３巴仙。

＊保保是寶寶ＥＴＦ高高，長汽今長勝不如計計數＊

　　要講今期最爽嘅，睇怕非祖國磚頭佬莫屬啦！近期祖國傳聞滿天飛，呢頭傳溫州全面解除限
購令，嗰頭又傳海口都取消商品房限購，祖國地主呢排輪住升，缸友噚日（２３日）炒完龍頭，
今日就炒二、三線地主股。碧桂園（０２００７）今日踢高７﹒４１巴仙，收３﹒７７銀，街坊
保利置業（００１１９）同雅居樂（０３３８３）都分別踢高６﹒４２巴仙同５﹒６４巴仙，收
３﹒８１銀同６﹒３７銀，而其他地主普遍都有２至３個巴仙呢！
　　睇番龍頭，潤地（０１１０９）同萬科（０２２０２）今日都繼續有得升，不過升幅得
１﹒５至２﹒７巴仙。不過一哥祖國海外（００６８８）全日就無升跌，睇怕係之前升得太勁，
要唞下氣啦！

＊內房有苗頭大隻卻唞唞，確利達異樣價量齊暴漲＊

　　今日有幾股仔表現都唔失禮，由中渝置地（０１２２４）分拆出黎嘅確利達（０１３３２）
今日表現極度神勇，仲一度創埋上市新高見２﹒７銀，完場時升幅都有成１﹒５倍收２﹒４２銀
，一日間市值就由１﹒３８億銀暴升至３﹒５億銀左右，認真巴閉！
　　翻查番啲資料，確利達既主要股東之一就係渝港國際（００６１３），而中渝置地同渝港國
際都係由「重慶首富」張松橋揸旗，莫非有咩大計？！
　　另外，利豐（００４９４）囝囝利標品牌（００７８７）都好威水，雖然畀主要股東Ｓｕｎ
Ｌｉｆｅ減持，但全日仍然踢高１２﹒６４巴仙，收１﹒９６銀！遠遠拋離媽咪微升０﹒３９巴
仙嘅表現啦！
　　講開「一家人」，信義玻璃（００８６８）同信義光能（００９６８）呢家人就冇咁好彩啦
！信義玻璃放榜之後繼續腳軟，全日跌低７巴仙；好彩囝囝生性，而且仲獲摩通升目標價，全日
有近３巴仙落袋。

＊同是一家人表現卻迴異，華電忽批盪街坊來陪跌＊

　　個市升得咁勁，華電國際（０１０７１）突然公布抽水，以每股４﹒９２銀（折讓逾１１巴
仙）發股，預期將穩袋１３﹒８４億銀，用嚟補充流動資金。無啦啦「Ｃａｐ水」又無乜發展大
計，股東梗係唔ｂｕｙ啦！所以今早復賽後，即以行動抗議，沽貨離場，搞到股價隨即下插
７﹒５巴仙；雖然華電今日狠插穿十天線，但總算仍保得住５銀大關及「派貨價」，最終埋單跌
近６﹒８巴仙，收５﹒０９銀。
　　華電國際仲累到佢成班街坊全線逆巿向下，其中大唐（００９９１）就跌得較甘，全日碌低
近３巴仙，收３﹒９４銀。潤電（００８３６）、華電（００９０２）則跌１﹒５巴仙及２﹒４
巴仙。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。