《小傳日記》缸外紛紛擾，缸內失分寸；數據三連跌，濠賭怎打算

　　《小傳日記》眨吓眼又放完暑假，一眾學生們又要晨咁早搭車返學。對於小傳嚟講，開學最
大影響就係…塞車！好彩醒目提早出門口，先至一秒都無ｍｉｓｓ到個市。
　　人大常委就本港普選特首定下框架，泛民抗議行動升級。缸外紛紛擾擾下，今朝（１日）魚
缸輕輕碌低３８點；點知祖國公布８月份ＰＭＩ數據跌到去５１﹒１，差過孖屐預期，個市竟然
反高潮，倒升番１４９點兼收復埋廿天線（約２４８３５點）。不過，好快就無晒力縮番落去，
最終全日只得１０點落袋，收報２４７５２。
　　再望吓Ａ仔場表現都唔錯，踢高０﹒８巴仙收２２３５，但都帶挈唔到國貨佬跟升，完場唔
見４點報１０９５８。個市走勢咁怪，缸友梗係唔出手住，全日成交即刻少咗廿幾巴仙，只得
６１９億銀左有。

＊ＰＭＩ曳曳Ａ仔反高潮，大市甚反覆重貨有點焦＊

　　今日大隻佬能夠勉強高收完場，都係全靠友邦（０１２９９）、祖國石油（００８５７）兼
和黃（０００１３）三寶合力頂住，共貢獻咗６９點，單係友邦一隻都已經升０﹒７５元，貢獻
２３點，絕對稱得上係最落力大隻佬。
　　聯想（００９９２）雖然唔算大ｓｉｚｅ，但係今日就做咗最威水大隻佬，全日由頭升到尾
，最高去到１２﹒３銀，再創超過１４年新高，埋單有逾３巴仙進帳收１２﹒２６銀。緊隨其後
嘅就係公用三寶之一嘅電能（００００６），又發揮資金避難所功能，彈高近３巴仙收７２﹒６
銀，其餘兩寶中電（００００２）同煤氣（００００３）都逆市踢高ＤＤ。

＊聯想與友邦今天威到盡，兩電拍一煤豈止來避難＊

　　那邊廂大家盡力頂住個市，這邊廂內銀就腳軟拖低。建行（００９３９）派完中期績表，無
咩驚喜，雖然各大行都普遍叫繼續買貨，當中花旗仲話目標去到７﹒８銀。不過，缸友好明顯覺
得錢莊吸引力已大不如前，好難再享受到財息兼收嘅好處，於決定掟貨走人，仲連累埋其他街坊
，建行、工行（０１３９８）齊齊跌近１巴仙收市，成交仲高達近１４億銀，係全日最多人玩嘅
股份之一添。　
　　祖國保險都係無咩運行，國壽（０２６２８）、平保（０２３１８）都喺無咩消息下碌低少
少。惟獨財險（０２３２８）無受影響，逆市反彈１﹒６巴仙收１３﹒０６銀，唔知係咪因為上
星期尾，富瑞睇好財險前景，升級至買入有關呢？！
　　
＊內銀續疲軟內險同樣軟，財仔逆市漲要謝過富瑞＊

　　不過，相信大行點樣轉軚唱好，都好難打救到弱過弱煲嘅濠賭股啦。上星期五（２９日），
小傳先話兩大龍頭金沙（０１９２８）同銀娛（０００２７）連跌八日已經好誇張，點知低處未
算低；先係成功連任澳門行政長官嘅崔世安話，新任期將會檢討博彩發展，雖然是好是壞都仲未
知，但缸友都決定沽貨走人。
　　食完午飯返嚟，澳門宣布上個月博彩收入又跌６巴仙，唔單止差過孖屐預期，仲要係連續三
個月數據出現下跌，搞到濠賭股即係愈跌愈深，金沙唔見逾３巴仙得番４８﹒９銀，銀娛就得番
５６﹒７銀，其他街坊都當然難逃一挫，跌幅介乎２至近４巴仙。

＊博彩收入縮濠賭碌呀碌，缸邊搵奇葩股仔來落鑊＊

　　不過就算個市幾無方向都好，都總會有啲奇葩出現嘅！今日中國創新支付（０８０８３）就
突然以逾３億銀成交炒高近１３巴仙，收０﹒９６銀，兼打入５０大成交榜，排喺第２５名，成
交仲多過長實（００００１）、農行（０１２８８）同祖國海外（００６８８），勁！　　
　　另外一隻細細粒代表，就由銘源醫療（００２３３）擔任，雖然打唔入成交榜，但就以逾
３９巴仙升幅做咗最勁抽股份，收報０﹒２８銀，成交都超過１﹒４億銀架。升得咁勁，皆因公
司中期盈利爆升超過２２倍至５﹒０７億銀，不過記住睇清楚啲，原來銘源成功收番一筆之前撇
銷咗，高達４﹒９６億嘅應收帳，如果唔計呢筆數，究竟份成績表仲夠唔省鏡呢？！缸友就要計
一計數啦。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。