《小傳日記》跌足四日好心傷，好友終於勝一仗！

　　《小傳日記》「滬港通」開咗車五日，香江魚缸就跌足四日，眨吓眼就唔見咗七百幾點，幾
經辛苦，好友今日（２１日）先贏番個主導權，喺下半場士氣仲一度愈嚟愈高昂，抽高番１５８
點。雖然埋單時縮番ＤＤ，升８７點收２３４３７，但至少挽回番啲面子，唔使跌足五日咁「陰
功豬」呀！
　　Ａ仔場都有番啲生氣，好快就忘記咗噚日（２０日）ＰＭＩ數據好曳嘅陰霾，今日又踢高
１﹒３巴仙收報２４８６點，帶動埋國貨佬升番６７點收１０４４７。難得氣氛好番Ｄ，全日大
市總成交都升番上去，有７１１億銀左右，完全無受冷清嘅南向額度影響！

＊互通第五天終於唔使煎，魚缸與Ａ仔今天齊齊掂＊

　　通車效應急散唔緊要，賭仔今日有阿爺照，終於識反彈啦！事關濠賭將會延長通關時間，下
個月１８日起，拱北口岸開放時間延長兩個鐘，橫琴口岸更加可以２４小時通關。大行出報告話
對賭仔有著數，瑞銀就話橫琴口岸全日通關可帶旺路氹人流，指金沙（０１９２８）、銀娛
（０００２７）同新濠博亞（０６８８３）最有著數。無疑呢個消息可以救一救賭仔最近嘅頹勢
，銀娛連跌咗四日終於可轉勢反擊，埋單彈高逾逾４巴仙收５２﹒５銀，相信５０銀支持都幾大
，短線可再挑戰１００天線（５５﹒４銀），因其新賭場出年５月開幕，話唔定可以提升盈利添
。
　　但有個賭仔就比較「濕滯」，就係永利澳門（０１１２８），佢阿媽畀花旗國多個部門圍攻
，被調查有無洗黑錢，搞到今日唔可以跟大隊一齊升，收市跌近１巴仙收２６﹒１銀，咁搞法
２５銀都可能守唔住，鍾意炒濠賭嘅缸友，不妨變一變陣，轉買金沙或銀娛等龍頭股穩陣啲。

＊關口開耐Ｄ濠賭開心Ｄ，媽媽忽頭痕永利震一震＊

　　一班券商股都有唔錯表現，呢個星期滬港通反應無論南行定北行都一日靜過一日，南行反應
淡過淡奶，搞到呢幾日兩地券商股表現真係「不行」。今日滬港通反應終於算有番ＤＤ起色，滬
股通未到３點３下午茶時間已經餘額少過噚日收市嗰陣。內地券商股招商證券
（滬：６００９９９）同興業證券（滬：６０１３７７）升到漲停開Ｐａｒｔｙ，帶動埋呢邊券
商股。
　　長遠其實有得諗，隨著祖國缸友對香江魚缸同滬港通逐步了解，相信將來真的會加碼投資，
呢邊又唔洗交炒股利得稅，又唔洗交股息稅，又無停牌機制。大隻嘅中國銀河（０６８８１）就
強勢反彈近７巴仙收６﹒７１銀，中信証券（０６０３０）都有近４巴仙進帳收２０﹒１５銀。
　　生發發（００３８８）都唔執輸，連跌五日累插１１巴仙後終於反彈啦，收升近１巴仙報
１６７﹒１銀。睇嚟１６２銀有較大支持，相信短線已見底，缸友可考慮１６５銀入貨，初步博
上番１７５銀以上。

＊生發發券商終於威番轉，油價見反彈油股不再酸＊

　　俗語話，「十字星出爐，升開有條路」。噚日小傳同各位缸友講起油股，估唔到今日賣油佬
愈升愈有，睇返隻中海油（００８８３），原來前日（２１日）出現咗疑似小型十字星，難怪有
力反彈！講真股價已經由９月開始碌到而家，今日借住油價回升造番好Ｄ都好正常，收市漲咗逾
３巴仙，收１１﹒８８銀；而中石化（００３８６）同中石油（００８５７）都升１至２巴仙。
　　再加圭阿爺公布咗，１０月份成品油同天然氣運行數據，神州１０月原油產量有成１７８９
萬噸，同比都增０﹒２個巴仙，原油加工量都近４０００萬噸，增加咗３﹒２個巴仙，帶挈靜咗
一排嘅中國天然氣（００９３１）升逾４巴仙，連班頁岩氣仔仔都叨到光，安東油田
（０３３３７）繼續飛升近１８巴仙，報１﹒９４銀；華油能源（０１２５１）就大舉踢高１７
巴仙報２﹒２４銀。

＊頁岩氣受捧股仔禾雀飛，新傳媒爆升財訊見異樣＊

　　點止頁岩氣一族一飛衝天，早排畀恆大（０３３３３）睇中嘅新傳媒（００７０８）簡直就
升到唔識停，差唔多由頭升到落尾，收市前仲見５﹒８銀創下上市新高，勁！完場都以４﹒５億
銀大成交爆升９８巴仙收５﹒５８銀。
　　仲有另外一隻傳媒股，財訊傳媒（００２０５）本來喺０﹒６銀水平浮浮沉沉，但喺下半場
突然衝咗出嚟，急升逾３９巴仙升破多條平均線，成交仲要急增至１﹒２億銀。
　　名軒（０８２４６）就宣布以市價抽水，通常細股無端端配股，都會嚇到粉絲掟貨Ｓａｙ　
Ｇｏｏｄｂｙｅ。點知名軒不跌反急升，埋單飆高六成收１﹒０４銀，最高升到去１﹒３５銀，
差ＤＤ創埋上市新高，勁！假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。