按盤價 
《小傳日記》今日（２４日）不論缸內定缸外，都一樣咁峰迴路轉！先講缸內，正當擔心Ａ
場無咩力，拖累香江倒跌最多２３６之際，大笨象（００００５）突然大發「象」威，話正就遷
冊問題做檢討。尾市突然爆升逾４巴仙收７３﹒７銀，即時幫大市沖走晒所有霉氣。結果恆指收
漲２３３點報２８０６０，國指亦由大跌轉升，微微踢高１０點收１４４８９。全日成交就得番
１６７４億銀左右。
至於缸外嘅「電視風雲」，亦有突破性進展！收市之後，高等法院宣判，港視
（０１１３７）就免費電視牌照司法覆核勝訴，要求發還行政長官會同行政會議再考慮。依家亞
視又不獲續牌，邱達昌又話要爭牌照，ＴＶＢ又引入祖國媒體企業家做股東，究竟王維基又會有
咩對策呢？！真係好睇過電視劇呀！
＊大象與渣打粉齊齊炒遷冊，大行跌眼鏡濠賭紛反彈＊
講番大笨象先，除咗今朝傳出管理層同最少６個主要股東都力撐主席范智廉同ＣＥＯ歐智華
，可能有得留任到２０１７年底，同埋德銀唱好首季業績之外，米字國傳媒突然爆出，話大笨象
總部遷離米字國評估即刻展開，大約需時半年左右。依大笨象都喺收市前作出回應，話真係檢討
緊遷冊，不過就好難預計要幾耐時間。一次過有咁多好消息，唔怪之得咁威水，佔咗大市逾五成
升幅喇，做最勁藍戰士！總部又喺米字國嘅渣打（０２８８８）都炒高咗４巴仙收１２６﹒８銀
。市場早輪就揣測，大象如果遷冊，好大機會會重返香江，渣打就會係新加坡。
另一邊廂，金沙（０１９２８）雖然噚日張成績表唔見得人，但花旗仲係維持「買入」評級
，但「他屐」就降到４０銀，匯證同瑞信紛紛將他屐削到得番２８銀同３０銀。不過，偏偏今日
反彈近３巴仙。另一藍戰士銀娛（０００２７）都造好，踢高近４巴仙，仲升破十天同埋五十天
線。美高梅（０２２８２）都升超過４巴仙。
＊聯通多人讚街坊同跳舞，中興業績靚粉絲即掃高＊
話咁快又踏入季績期，有好幾隻股份齊齊派成績表，不過當然有人歡喜有人愁喇。聯通
（００７６２）首季雖然純利跌４巴仙，但勝在ＡＲＰＵ升１蚊，摩通同匯證都調升「他屐」，
分別係１６﹒４銀同１１﹒１銀，刺激股價創埋逾３年高位，最終踢高２巴仙。街坊中電信
（００７２８）叨光升得仲勁，有近５巴仙進帳，係最威風國貨佬！
做電訊產品生意嘅中興通訊（００７６３）首３季按年多賺４２巴仙至８﹒８億人仔，瑞信
升咗他屐到１８﹒７銀，結果今日踢高近６巴仙，盤中都試過見近４年高位２５﹒０５銀。
另一隻藍戰士友邦（０１２９９）雖然新業務價值升兩成，亦有多間大行唱好，但之前升得
太多，結果回咗近１巴仙收５１﹒８５銀。
ＴＣＬ多媒體（０１０７０）首季純利升兩倍，ＴＣＬ通訊（０２６１８）首季純利升半成
，但雙雙都係跌得好甘，分別踢低６﹒６巴仙同７﹒５巴仙。
＊南北車反覆船仔玩重組？東航Ａ漲停Ｈ股失後勁＊
今日海陸空都有消息，火車頭變身過山車。南車（０１７６６）同北車（０６１９９）先升
後跌，尾市又再抽升番，最尾分別行上超過４及３巴仙，報１６﹒６６銀及１７﹒３８銀。街坊
中鐵建（０１１８６）臨尾跌幅都收窄至無咗２巴仙，報１５﹒２６銀。
鐵鳥東航（００６７０）打算發Ａ股籌１５０億人仔買２３隻鐵鳥，復賽後即刻展翅高飛逾
一成，但後繼乏力，最尾只係飛高近５巴仙，埋單報６﹒１８銀。Ａ股（滬﹕６００１１５）嗰
邊就無呢個問題，體力爆晒燈，漲停板。
早排澄清無重組諗法嘅船仔股，因為祖國嗰邊又有收購動作，重組憧憬重燃。中遠洋
（０１９１９）前進近８巴仙，報６﹒７９銀。Ａ股（滬﹕６０１９１９）仲漲停埋。下星期一
放榜嘅中海集運（０２８６６）都有３巴仙入袋。
＊禾雀又亂飛利亞復賽飆，上石化轉盈收高近一成＊
禾雀繼續開Ｐａｒｔｙ，停賽休息兩年嘅西伯利亞礦業（０１１４２）舊年中期虧損收窄至
約２﹒１８億銀，今日復賽後最多狂飆２﹒１倍，埋單都升１﹒６２倍，報０﹒６銀，一吐兩年
以來積埋嘅烏氣，奪得升幅榜第一位，勁！
順昌（００６５０）有人搵佢傾投資合作，雖然細節欠奉，但已經夠晒理由繼續炒上。噚日
飆升近６２％後，今日繼續飆３８巴仙，報１﹒４５銀，兩日計已經升咗１﹒２倍。
上石化（００３３８）首季扭季為盈，賺５２１７﹒６萬銀人仔。首季有咁好表現，抵讚！
今日創７年半新高，升咗近一成，報４﹒４６銀。
漢能（００５６６）噚日升咗約１４巴仙後，發不明升因。今日就有報道講公司早排周圍借
錢搞大項目，點知啲項目好多都進展緩慢，未來存在隱憂。今日即刻嘔番９巴仙出嚟，報
７﹒２１銀。假期愉快，請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
