《小傳日記》明天大戰前，離場唞陣先！

　　《小傳日記》香江呢排走勢真係好難捉摸，就算花旗國噚晚（２８日）終止跌勢，反彈番
１８９點收報１７６３０點；但係由於Ａ場實在太唔穩定，香江缸友又等緊美聯儲局議息，所以
恆指今朝（２９日）只係輕輕高開百幾點之後就縮晒水，就算Ａ場收市前衝番高逾３巴仙收報
３７８９，都唔能夠帶旺香江。始終聽日（３０日）又係香江期指結算日，加埋新交所富時中國
Ａ５０指數期貨結算，又再加埋凌晨時份ＦＯＭＣ份聲明；大戰前夕，缸友都唔敢輕舉妄動。
　　恆指最終收升１１５點報２４６１９，國指就漲１００點報１１２７３，全日主板成交就明
顯靜番Ｄ，約８６０億銀。

＊多事的明天納悶的今天，大象輕踢上牛牛被慢煎＊

　　大笨象（００００５）一直盛傳會搬竇返嚟香江，但據報大笨象如果走嚟香江會被剔出富時
１００指數，加埋有指米字國錢莊徵費會慢慢撤銷，香江政局又咁多爭拗，搞到大笨象回歸機會
減低。下星期一（３日）就係大笨象放榜大日子，話唔定到時會有新消息呢！今日大笨象就微微
跟市踢高１巴仙，收報６９﹒５５銀。
　　魚缸呢兩日造番好，不過部分大隻佬好似比之前Ａ股地震嚇一嚇，驚魂未定。ＱＱ
（００７００）全日頭耷耷，收跌逾１巴仙，報１４４﹒４銀，係第二差藍戰。平保
（０２３１８）都流晒鼻水，碌低１巴仙，報４５﹒５銀，蒙牛（０２３１９）變埋病牛，唔見
咗近２巴仙報３６銀，仲要係最差表現嘅藍戰士，無陰功囉！

＊迪迪Ａ漲停Ｈ股也跳舞，國航終復牌一天跌個夠＊

　　電動車迪迪仔（０１２１１）（深：００２５９４）Ａ股難得叉足電，漲停板收５４﹒７８
銀人仔，帶挈埋Ｈ股行前逾３巴仙，報３４﹒９銀。不過囝囝比亞迪電子（００２８５）就好慘
，失驚無神做咗淡友狙擊目標，逾２億銀大成交插咗９巴仙，報６﹒７７銀。慘！街坊長汽
（０２３３３）就似乎出現故障，今日再度向開後波跌近６巴仙，報２６﹒１銀，月中復牌至今
累計蒸發咗逾三成，認真濕滯！
　　鐵鳥國航（００７５３）預計中期大賺超過７倍，不過又諗住折讓２１巴仙配股。復賽後似
乎都出現燃油不足嘅情況，飛低逾７巴仙，報８﹒１１銀。正常嘅，７月份全場皆傷，停賽成個
月難免要追番啲跌幅。其他鐵鳥表現都唔算好好，東航（００６７０）同南航（０１０５５）分
別都要飛低近２巴仙，報６﹒４７銀及７﹒７３銀。　

＊運動身體好股價更加好，濠賭紛彈起否極泰來乎＊

　　德銀早前發表報告，話神州內地運動行業最好時期仲未來臨，預期內地運動行業將會受惠周
期性同結構性利好改變，因見到運動服裝營業額會加速上升咁話，投資者回報亦都會有改善。於
是就建議「買入」安踏（０２０２０），仲提升佢目標價１３個巴仙去到２１﹒５銀，股價於是
跑上５巴仙，報１９﹒５銀。連帶其他體育股都一齊跳高，特步（０１３６８）、李寧
（０２３３１）、匹克（０１９６８）各有４巴仙至６巴仙進賬。
　　馬交嗰邊政府預計７月賭收跌到大約１８０億銀澳門幣，不過早前巴克萊發表報告話，預計
上周日晚均賭收有改善，令到一班賭仔興奮彈起，銀娛（０００２７）同金沙（０１９２８）都
好亮麗，飛起２巴仙同３巴仙，街坊澳博（００８８０）同永利（０１１２８）就分別飛上逾３
巴仙，各自報８﹒９４銀同１５﹒７銀。

＊易主派特息卓高嘭嘭升，粵首伸手牌復賽即質低＊

　　個別股仔都有Ｄ消息，普拉達（０１９１３）今日開波嗰陣錄得大手交易，涉及都有７億銀
，造價每股３４﹒２５銀，今日全日就踢低逾５巴仙，報３４﹒７５銀，仲低見３４銀，係
１２年２月以嚟低位添。
　　卓高（００２６４）宣布派特別中期股息０﹒４２５４銀，加上控股權易手畀宏輝
（００１８３）大股東龐維新，今日復賽即爆上２７巴仙，報２﹒０８銀，成為升幅最勁嘅個股
。
　　粵首環保（０１１９１）折讓八成配股，配股價係０﹒１４５銀，一共配發８３億股，佔擴
大後股本約７３﹒５個巴仙，集資大拿拿１２億銀，今日復賽就急瀉近三成，報０﹒５７銀。請
請！
　　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。