《小傳日記》Ａ場停賽香江拍烏蠅，一彈即散好友頭擰擰！

　　《小傳日記》祖國噚日（３日）大閱兵，Ａ仔場一連放假兩天。香江魚缸噚日都放一放假等
缸友可以喺屋企睇閱兵，但今日已經率先復賽啦！
　　花旗國噚晚就急升急回。佢地公布８月服務業指數回落到５９，不過仲係勝於預期，而國際
貨幣基金組織ＩＭＦ就話擔心全球經濟狀況，叫花旗國加息時要三思三思，紓緩咗缸友對加息嘅
擔心；道指一度升過近２００點，但收市縮到只升２３點或０﹒１巴仙，報１６３７４。
　　港股ＡＤＲ計升１４６點或近１個巴仙，香江魚缸今日早段升超過２００點，但亦係一彈即
散；到下午跌幅仲擴大咗，最多回落２１９點見２０７１５，再創２０１３年７月以來新低。
及至收市恆指跌幅收窄至９４點或０﹒５巴仙報２０８４０；國指就碌低１３１點或１巴仙收
９１６９。
　　反反覆覆嘅一日，主板成交６９３億銀。以成個星期嚟講，魚缸唔見７７１點或３﹒６巴仙
，國指就無咗５８１點或６巴仙。

＊花旗失後勁香江成交靜，復失兩萬一捱打要企定＊

　　呢個星期經常見到國家隊撐起內銀同內險Ａ股，但今日Ａ仔場停賽，內險Ｈ股全日都無起色
。藍戰士平保（０２３１８）星期一（７日）除淨，今日沽壓都幾大，趴低３巴仙，報
３５﹒６５銀，３５蚊關卡危危乎。至於街坊國壽（０２６２８）同新華（０１３３９）就分別
走落２巴仙同升唔夠１巴仙，各報２５﹒２銀同３﹒４９銀。
　　深圳市住建局公積金中心星期三嘅時候表示，深圳目前維持現行嘅公積金貸款政策不變，購
買二套房嘅首付比例維持最低三成。咦！呀爺無再鬆一鬆喎！消息一出，磚頭佬大都一蹶不振，
萬科（０２２０２）同雅居樂（０３３８３）就踢低５巴仙同４巴仙，街坊潤地（０１１０９）
同中海外（００６８８）分別唔見１巴仙左右。

＊內房紛碌低阿爺唔錫我？兩油遇沽壓海油和和過＊

　　油價跟隨美元孖住行高，不過上周花旗原油庫存增加令油佬有啲擔憂。「三桶油」以中石化
（００３８６）及中石油（００８５７）最傷，齊齊碌低逾３巴仙，報４﹒８１銀及５﹒８１銀
。當中中石油仲成為全日最弱嘅藍戰士。中海油（００８８３）就好少少，只喺輕微走低唔夠１
巴仙，報８﹒８銀。
　　阿爺噚日宣布裁軍３０萬。軍工股今日就隨市走低，中船防務（００３１７）全日無咗近３
巴仙，報１７﹒２銀；航天萬源（０１１８５）都唔見咗逾４巴仙，報０﹒６４銀；中航工業
（００２３２）就失落逾２巴仙。
　　
＊軍工紛碌低賭仔返來了，招商局外運重組確夠照＊

　　銀娛（０００２７）久旱逢甘露，獲「揸ＦＩＴ人」呂志和增持５０９萬股，涉資１﹒３３
億銀，股價逆市企高近３巴仙，收報２３﹒６銀。惠譽估計，馬交全年賭收大跌三成，雖然下半
年可望靠穩，但復甦勢頭可能因緊縮政策而放緩。報告無影響一眾賭仔逆市走高，最強勁嘅藍戰
士金沙（０１９２８）全日踢高近６巴仙，報２６﹒９銀。新濠國際（００２００）及澳博
（００８８０）分別都升近３巴仙至４巴仙。
　　神州媒體再傳招商局集團同中國外運長航集團重組已成定局，招商局國際（００１４４）走
高３巴仙，報２５﹒２銀；中外運航運（００３６８）同中國外運（００５９８）就分別布斬穫
逾６巴仙及近１１巴仙。

＊魚缸雖弱煲逆市有奇葩，扣好安全帶真正誇啦啦＊

　　創信國際（００６７６）控股股東諗住賣殼，不過似乎無咩缸友關心，雖然今日復牌埋單計
收穫近２２巴仙，收報２﹒１３銀，但得２２單交易，成交都係得近５２萬銀，乾升！
　　金利豐（０１０３１）早前計劃向萬達同鄭裕彤等配股，不過魚缸近期波濤洶湧，最尾交易
告吹；金利豐今日就碌低６巴仙，報２﹒３銀。
　　雖然魚缸今日又表現反艇，但總有逆市奇葩。北控清潔能源（０１２５０）大漲近六成，報
１﹒０７銀，係今日表現最好參賽者。中訊軟件（００２９９）都踢高近３１巴仙，報２﹒０５
銀。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。