《小傳日記》Ａ場回歸追落後，香江趁機唞一唞！

　　《小傳日記》眨吓眼Ａ場就放完大假，今日（８日）正式回歸戰場，一如預期，復市後即發
力追落後，抽高３巴仙收３１４３點。不過，相對香江花旗呢排升嘅幅度，Ａ場今日都唔算係好
突出了，唯有寄望今個月中召開嘅五中全會，有好消息傳出，再刺激另一輪升浪吧！
　　至於香江呢邊，雖然尋晚（７日）花旗再升逾百點，但喺Ａ場放假期間累升咗約二千點，仲
收復埋二萬二大關，當然要唞一唞，回一回氣先有力再衝過喇！結果，恆指埋單係咁易跌番
１６０點出嚟收２２３５４，暫時又回番落去５０天線（２２４６６點）樓下；國指就挫１０７
點收１０２８７。
　　回氣嘅一日，全日成交差唔多９３５億銀，表現都算唔錯了。

＊花旗再抽上Ａ場復市漲，香江要回氣好友勿愁傷＊

　　神州魚缸放完大假終於出山，追落後衝前近３巴仙。但ＥＴＦ同券商跟甩尾，華夏滬深三百
（０３１８８）、南方Ａ５０（０２８２２）同安碩Ａ５０（０２８２３）碌低近３至５巴仙。
光大控股（００１６５）唔見咗近５巴仙，報１７﹒７４銀；中信証券（０６０３０）、海通證
券（０６８３７）亦冧咗約４巴仙，得返１５﹒９同１２﹒８６銀。
　　唔少身家放喺Ａ埸嘅內險一樣唔生性，中國太平（００９６６）冇咗逾３巴仙，報２４﹒７
銀。街坊平保（０２３１８）、太保（０２６０１）、國壽（０２６２８）跟住瞓低近２巴仙，
收４２﹒５、３０﹒９５同２９﹒１５銀。

＊重組推新案大行仍不滿？電能輕踏前長建微微軟＊

　　電能（００００６）同長建（０１０３８）驚兩兄弟合體唔成，決定推出新方案，換股比例
由１﹒０４提高到１﹒０６６，特別股息都加一半到７﹒５銀，希望吸引小投資者支持。嘩嘩！
之不過，大摩、里昂都係唔滿意，話要去到１﹒１５至１﹒２倍先叫合理。電能受追捧行前逾１
巴仙，報７３﹒６５銀；長建反而唔多識郁。至於瑞銀認為新建議下，長和（００００１）拎住
合併後長江基建實業嘅股權會減少，但股息收入會多咗４８億，長和全日照樣軟逾１巴仙，埋單
１０２﹒７銀。
　　兩大啤酒商世紀合併或者落空，百威英博提高收購ＳＡＢ　Ｍｉｌｌｅｒ嘅作價，點知都係
畀人嫌孤寒。相關嘅華創（００２９１）插咗近６巴仙，報１４﹒０４銀，係表現第二差藍戰士
；青島啤酒（００１６８）跣低０﹒３巴仙，報３６﹒５銀。

＊人家遇阻滯華創卻陪跌，賭仔續跳舞油股玩回吐＊

　　賭仔今日繼續發力，國家旅遊局指國慶去馬交嘅旅客升超過６巴仙！人流多咗，缸友憧憬賭
收有睇頭，但花旗同美銀美林分別估１０月賭收仲係跌２９巴仙同３４巴仙。不過，缸友忽然愛
賭仔，一於跟好不跟壞，照衝入去掃貨，金沙（０１９２８）逆市踢高近２巴仙，收報２８﹒１
銀，係今日表現第２叻藍戰士。銀娛（０００２７）排第３，亦有１巴仙進帳，報２５﹒０５銀
，唔覺唔覺已經連升５日，期間累升２７巴仙，算係一洗早排頹勢！
　　油價回軟，結束三連升，結果噚日係威係勢嘅「三桶油」腳軟軟，中海油（００８８３）趴
低６巴仙，報８﹒９５銀，係最渣藍戰士；中石油（００８５７）亦唔見２巴仙，報６﹒１４銀
；中石化（００３８６）都無咗１巴仙，報５﹒４１銀。

＊新丁半新丁缸邊鬥精靈，７３６波動日跌日上升＊

　　中國置業投資（００７３６）前日發完不明升因後噚日回吐近１８巴仙，今日再次向前大踏
步，急升近２９巴仙，仲要大成交錄得８億銀！
　　今日有５位新丁，當中最搶眼嘅係亞勢備份（０８２９０）收報４﹒４銀，高配股價
（２毫子）２１倍！唔計手續費每手賺４﹒２萬銀！應力控股（０８１４１）亦都好勁，收報４
﹒８銀，較配股價（３毫子）多１５倍，每手袋４﹒５萬銀！真係發過豬頭。
　　半新丁雲裳衣（０８１２７）上市翌日發力，抽高３９巴仙，收報２﹒２３銀，亦高配股價
（毫半子）近１４倍！之不過，隻股噚日最高見過４﹒２銀，高追咗就慘啦。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。