《小傳日記》人仔入籃夢成真，香江急升好氣氛！

　　《小傳日記》踏入２０１５年最後一個月，首個交易日就已經有好消息沖喜。人仔獲國際貨
幣基金組織（ＩＭＦ）納入特別提款權嘅貨幣籃子，人仔國際化又揭開重要的新一頁，恭喜！咁
大件開心事，香江魚缸當然衝高慶祝喇！今朝（１日）一開場就抽高二百幾點，上番二萬二，之
後就愈升愈有，完全無受祖國製造業ＰＭＩ跌至４９﹒６，差過預期嘅影響，埋單彈高３８４點
收２２３８１，收復番五十天線（２２３７１）。國指就曾經突破番一萬點，可惜企唔穩，散場
漲１５７點報９９４７，全日成交８０５億銀左右。

＊左手交右手港鐵向上走，零售遇寒流雙福腳仔軟＊

　　港鐵（０００６６）向政府獻計，為高鐵項目封頂至８４４﹒２億銀，同時派特息４﹒４銀
。政府雖然要就高鐵項目同立法會拎多１９５億銀，但筆數同佢收到港鐵派息差唔多，簡而言之
就係左手交右手。大行普遍對單「刁」偏向負面，話借錢派息拖累公司盈利，甚至覺得對股東不
公添！港鐵復賽曾跌約３巴仙，不過好快收復失地，全日計仲倒升近２巴仙，收報３６﹒３５銀
。
　　１０月香江零售銷貨值臨時估計係３７２億銀，按年跌３巴仙。貴價貨好似珠寶首飾個啲跌
幅最多，成１７％。零售業寒風凜凜，六福（００５９０）同周大福（０１９２９）齊齊碌底近
２巴仙，收報１７﹒３８銀及５﹒９６銀。莎莎（００１７８）反而有得踢高近３巴仙，收報
２﹒７３銀。

＊賭收向下沉賭仔照揚帆，國泰被唱衰股價又跌碎＊

　　馬交１１月賭收碌低咗逾３２巴仙至１６４億澳門元，衰過預期嘅跌３１﹒５巴仙，不過賭
仔似乎未受影響。銀娛（０００２７）有逾４巴仙進帳，收報２３﹒８銀。金沙（０１９２８）
就踢高近４巴仙，收報２７﹒２銀。澳博（００８８０）及永利澳門（０１１２８）都有２巴仙
至３巴仙落袋。
　　生發發（００３８８）遭大摩降級兼削價，主要因為魚缸成交弱。不過生發發一於少理，今
日隨魚缸走高近１巴仙，收報２０４銀。
　　「劇飛」國泰（００２９３）接連遭大行唱衰，連瑞銀都加入埋唱衰行列，指公司面對神州
鐵鳥挑戰，股價今日逆市掟低逾２巴仙，收報１３﹒３８銀，係最差藍戰士。

＊神州樓價高內房好風騷，電力市場化潤電誇啦啦＊

　　祖國指數研究院發表報告，神州樓價已經連續升咗第四個月，全國百城新盤每平方米平均價
值１０８９９銀人仔，按月升３巴仙，深圳樓價最勁，飆咗逾３４巴仙，唔知邊個買得起呢？總
之成班內房佬開心到暈，萬科（０２２０２）衝前７巴仙，報２０﹒７銀，最高飆過９巴仙，創
埋上市新高，潤地（０１１０９）同中海外（００６８８）貴為藍戰士，升勢一樣咁凌厲，分別
飛高約８巴仙同６巴仙，全日報２２﹒４５銀同２７﹒３５銀，藍戰士升幅榜排頭二位；其他內
房例如保利（００１１９）、世房（００８１３）仲有越地（００１２３）齊齊踩油開動５巴仙
，大豐收。
　　祖國能源局出招推電力市場化，中資電力股聽到同樣興奮，升勢彪悍！藍戰士潤電
（００８３６）連續碌咗一個月，今日終於整裝待發，狂跑６巴仙，報１５﹒５２銀，今日最高
更升過８巴仙，係全日第三強藍戰士；華電國際（０１０７１）表現都唔差，飛升６巴仙，報
５﹒２１銀，同門兄弟華電福新（００８１６）都跳上４巴仙；至於街坊們龍源電力
（００９１６）、中國電力（０２３８０）同大唐發電（００９９１），都一齊爬上３巴仙至５
巴仙。

＊ＪＣ要吸水粉絲入市追，中慧企唔穩破頂回吐深＊

　　今日唔少魚毛股都做咗萬人追捧嘅美人魚，唔單止成交大大筆，而且股價愈爬愈高添！ＪＣ
　Ｇｒｏｕｐ（０８３２６）話唔夠錢做大茶飯，決定配股集資，缸友紛紛捧場，全日高升２４
巴仙，報５﹒６銀；雋泰（００６３０）無咩大新聞，但係成交股數都有４４３８萬股，比半年
日均成交股數多好多，結果漲２１巴仙報０﹒６３銀。
　　東北虎（０８１９７）最近大發神威，個股升幅榜成日都榜上有名，連續第五日創上市新高
，最高紀錄去到１﹒０８銀，最後完場跑前２４巴仙，報１﹒０５銀。
　　但係中慧（０１１４３）就慘豬豬，上日完成配股仲好開心，點知今朝開市破頂見５﹒５５
銀之後就無以為繼，來也匆匆，去也匆匆，無咗１７巴仙，最後報４﹒５３銀，係全日表現最差
個股。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。