《小傳日記》Ａ仔向前衝，香江好輕鬆；內銀與保險，今回記一功！

　　《小傳日記》好友唞咗兩日之後，終於儲夠彈藥反擊啦！本來缸友見到噚晚（７日）納指又
插過，加上阿爺又抽水６００幾億人仔，諗住魚缸今日（８日）都係繼續向下碌居多。點知，Ａ
仔放完假復賽好醒神，原來孖屐傳出祖國一連串穩經濟增長措施，有機會今個月陸續出台，成班
祖國錢莊即時生猛晒，仲手拖手托起大隻佬指數反彈２１９點或１巴仙，完場收２２５９６，再
一次向百日線（約２２６８１）出發，成交明顯活躍，有成７３９億銀，畀噚日足足多咗逾２８
巴仙！
　　中資股升得咁勁，國貨指數梗係夠晒風騷，彈高１６４點或１﹒６巴仙，收１０３２１，強
勢衝破百日線（１０２８５點），氣勢如虹！

＊花旗頭耷耷香江不眼濕，市升成交漲淡友心都實＊

　　雖然上星期阿爺已經講過一連串穩增長措施，不過當時就未有風聲話幾時出台。難得有內地
媒體爆料，話由今個月開始，穩增長、擴內需，刺激投資同埋消費嘅政策，將會密集式出台！如
果消息係真，阿爺今個月就出招谷經濟，即係話將會多咗公司借錢做生意，祖國錢莊就唔愁無油
水賺啦！
　　唔怪之得成班祖國錢莊都大發神威，單係建行（００９３９）、工行（０１３９８）同埋中
行（０３９８８）都抽高２至３巴仙，為大隻佬進貢７０點。招行（０３９６８）仲巴閉，以
４﹒３巴仙升幅跑贏同行，民行（０１９８８）緊隨其後，埋單升４巴仙。其他錢莊都有２至３
巴仙進帳。
　
＊Ａ場開香檳ＥＴＦ振奮，阿爺放綠燈保保最開心＊
　　
　　Ａ股復賽就升到「嘭嘭聲」，一度收復２１００關，全日埋單升近２巴仙見２０９８點，創
埋個半月高位。成班ＥＴＦ股都約埋開香檳慶祝，Ａ５０（０２８２３）逾１８億銀大成交彈高
近３巴仙，收８﹒６４銀。南方５０（０２８２２）、恆生Ｈ股ＥＴＦ（０２８２８）、同埋華
夏滬深三百（０３１８８）都齊齊升２至３巴仙。
　　祖國保險股都有好好表現，因為中保監宣布「開綠燈」，批准保險公司之間進行同業併購，
又批准投資者對保險公司使用部分貸款做收購。太保（０１３３９）表現比較突出，升近３巴仙
收３﹒２５銀，國壽（０２６２８）、財險（０２３２８）都有１至２巴仙進帳。

＊ＱＱ似喘穩麥叔叔撐場，支付未跌夠碌得認真傷＊

　　至於噚日一度痛失「大牛股」寶座嘅股王ＱＱ（００７００），眼見股價由癲峰６４６銀一
路跌到得番４９７銀，一個月內差唔多無咗百五銀，簡直傷在ＱＱ身，痛在粉絲心啦…估唔到噚
日「新興市場之父」麥樸思出聲力撐叫買貨之後，ＱＱ管理層即刻食住個勢，用差唔多７７００
萬銀回購股份，帶頭入市以表對公司有信心！呢招都算有啲效，ＱＱ成功終止四連跌弱勢，全日
收市報５０９﹒５銀倒升１﹒６巴仙。
　　講真，八千萬對ＱＱ嚟講只係冰山一角，用少少錢就可以暫時保住「大牛股」寶座，呢招真
係抵到爛啦！不過，股王自身難保，班細嘅都好難重拾昔日「炒風」，網上支付股繼續表演插水
，創新科技（０８０８３）曾瀉１８巴仙，好彩收市前有缸友撈底，完場只跌逾４巴仙，但金邦
達（０３３１５）都蒸發近８巴仙。金蝶（００２６８）喺呢個時候發１﹒５億美金換股債，搞
到股價要插水逾９巴仙收２﹒６４銀。

＊金活突飆升復星做伯樂？６９２續插７４５急漲＊

　　呢排資金大挪移，成班炒股都傷亡慘重，不過，金活醫藥（０１１１０）食完晏返來就突然
抽到支好籤，爆升逾３８巴仙收２﹒７１銀，飆上去最多升幅榜第一名。原來缸邊有消息話，復
星醫藥（０２１９６）睇中公司喺祖國擁有龐大銷售網絡，有意思入股拍住上。
　　之不過，金活間唔中就有啲消息傳出嚟炒吓，早排又傳過遠大醫藥（００５１２）同埋廣州
醫藥都有興趣入股，仲一度傳過有可能同ＱＱ合作添，今回就傳到復星。
　　仲有中國鐵聯傳媒（００７４５）宣布用２０億進軍祖國電影市場，復賽後曾經飆升近四成
去到１蚊大關，但之後縮咗水，但都有２﹒６億銀大成交炒高１１巴仙，收０﹒８１銀。
　　最後提一提慘被洗倉嘅中國家居（００６９２），短短幾日差唔多蒸發咗八成身家，市傳係
因為有券商斬倉。跌得咁慘，公司最終都要停賽止一止血。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。