《小傳日記》連漲七天高高收，結算完成唞一唞？！

　　《小傳日記》睇住個市日日升，中資板塊輪流炒，本地薑又追埋上嚟，今日（３０日）仲最
高去到２４９１２點後，小傳不禁要提一提大家，小心「開心嘅時光過得特別快，又係時間講
ＢｙｅＢｙｅ」。首先，期指結算夾完之後，大市隨時回一回，第二，根據以往經驗，大市升咗
咁耐，最後落鑊嘅通常都係重磅股，依家連香江地主都衝埋上嚟，小心好友隨時會只鳴金收兵。
　　總結今日魚缸表現，收市前已經明顯縮咗好多，埋單只有９１點進帳，收２４７３２，不過
成交就旺到不得了，有１００１﹒３億銀，係今年４月宣布「滬港通」好消息以來嘅新高。
　　Ａ仔場無咩郁動，中資股失色下，國貨佬指數率先倒跌２點，收１１１１９，結束「六連漲
」光輝日子。
　　小傳一向都係穩陣派；有勇字派行家就話，呢排港匯咁強，熱錢湧入孖屐，搞到金管局要不
停注資，都可以睇得出個市幾咁強，應該都係大漲小回嘅機會大，仲叫缸友唔使太過擔心添！

＊熱錢續湧入成交破千億，魚缸有頭威國貨失尾陣＊

　　講番班香江地主，除咗噚日（２９日）大摩改口風話睇升之外，根本就無咩特別好消息支持
，講嚟講去，都係繼續憧憬美聯儲局唔會咁快加息。至於噚日觀塘重建項目流標，發展商表明話
會再入標；而今日成班地主都照向上衝，新地（０００１６）升逾３巴仙收１１５﹒９銀，新世
界（０００１７）、四叔（０００１２）齊齊衝高近２巴仙。信置（０００８３）本來大漲逾４
巴仙跑贏班街坊，仲創埋逾一年高位，但收市前又碌番晒落嚟，最終升１巴仙唔夠。
　　至於聽日（３１日）放榜嘅長和系兩父子，超人（００００１）呢幾日已不停創新高，今日
最高仲去到１５２銀，風頭一時無兩，不過完場前就跟市縮一縮，但都有逾２巴仙進帳，算係幾
硬淨！但囝囝和黃（０００１３）就無咁叻啦，收市前無晒所有升幅，差唔多打回原形收
１０６﹒９銀。　　　　
　　　　
＊重磅忽腳震缸友要小心，生發發ＱＱ感覺有點暈＊

　　仲有近日強勢嘅重磅股都已經無晒鑊氣，生發發（００３８８）已經連升咗六日，今日仲衝
高去１７６﹒９銀後，有貨嘅缸友就梗係獲利離場啦；卒之收市前啲沽盤湧晒出嚟，完場要倒跌
逾２巴仙收１７１﹒２銀，係第四差表現藍籌股，但成交依然勁，有近３２億銀，繼續係最多人
買賣嘅股份！
　　「股王」ＱＱ（００７００）同生發發一樣命運，要結束六連升強勢，倒跌逾１巴仙收
１２８﹒５銀。始終升咗咁耐，回一回氣都好應該呀，或者唞唞再出發，話唔定仲好啦！
　　唔單止呢兩隻重磅股要休息吓，Ａ仔場今日終止六連漲，搞到呢排極受歡迎嘅Ａ５０中國
（０２８２３）同南方Ａ５０（０２８２２）都要跟住跌番落嚟，齊齊唔見１至２巴仙。　　

＊Ａ５０內房齊齊打倒褪，華能績欠佳街坊來陪跌＊

　　呢排沉醉喺阿爺鬆綁世界嘅祖國內房，都係時候要回歸現實。祖國海外（００６８８）高位
回吐近２巴仙收２２﹒７５銀，係第四差表現大隻佬，二、三線街坊世房（００８１３）、碧桂
園（０２００７）、雅居樂（０３３８３）齊齊唔見１至逾２巴仙。潤地（０１１０９）就企得
幾穩，埋單都仲１巴仙升幅收１７﹒５６銀，表現算唔錯。
　　至於電力股就見光死，華能國際（００９０２）未放榜前升咗唔少，點知原來中期盈利增長
大幅放緩至２１巴仙，令人跌晒眼鏡，咁今日就梗係要碌番落嚟啦，全日唔見逾６巴仙收
８﹒７３銀銀。拖累其他街坊都跟住跌，華電國際（０１０７１）跌４％報４﹒８１元。

＊阿爺打老虎調查周永康，大行出報告齊撐石油族＊

　　講完咁多隻大隻佬同過氣熱炒股之後，就要講一講大老虎啦！小傳今日睇報紙，幾乎份份報
章都以「打老虎」做頭版，皆因阿爺正式對周永康立案調查。周永康之前同石油幫關係密切，早
前好幾位石油界猛人都已經落馬，睇嚟事件距離告一段落都不遠矣，所以今日都有唔少券商都出
報告撐石油股。交銀國際話年初至今，石油服務行業嘅表現因反貪調查而受壓，之後有望回升，
而富瑞發表都出報告話，中石油（００８５７）股東價值將獲釋放，但睇返中石油今日表現，唔
算特別出色，全日無升跌以１０﹒４４銀完場；反而囝囝昆侖能源（００１３５）就踢高１﹒５
巴仙，收１３﹒４６銀。
　　阿爺打大老虎，其他石油相關股終於有望走出谷底，安東油田（０３３３７）急升近５巴仙
收４﹒５１銀，華油能源（０１２５１）都升近７巴仙收４﹒１銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。