《小傳日記》中美魚缸大反擊，香江一樣咁出色！

　　《小傳日記》全靠俄羅斯結束軍事演習，開火危機即時降一降溫，花旗國魚缸上星期五（８
日）當堂生猛番晒，急急彈高１８５點收１６５５３，扭轉咗成個星期嘅頹勢。再加埋Ａ仔場今
日（１１日）掃番上去２２００關樓上，收漲１﹒４巴仙，創埋８個月新高！兩大魚缸強勢支撐
下，香江想唔升都難。
　　大隻佬指數一開市就已經衝高約２００點，之後仲ｋｅｅｐ住向上衝，食完午飯返嚟又再升
多啲，臨完場前仲踢高最多近３４０點，收市報２４６４６抽高３１４點，輕輕鬆鬆收復十天線
（約２４５８６點）。Ａ仔場咁好表現，國貨佬指數又點會失禮，全日彈高２０５點，收
１１０３７。不過成交就無上星期五咁多，少咗近９巴仙至６５７億銀。

＊ＥＴＦ受寵成交向前衝，滬港通細則良機切莫失＊

　　今日魚缸咁開心，要數最多人玩嘅股份，除咗將會喺星期三（１３日）放榜嘅「股王」ＱＱ
（００７００），以逾２３億銀升近２巴仙收報１３２﹒３銀，穩守最多成交股份外，專門追蹤
大隻佬指數同Ａ仔場嘅安碩Ａ５０中國（０２８２３）、盈富基金（０２８００）同南方Ａ５０
（０２８２２）分別霸咗第二至四名寶座，成交就差唔多，各約有１８至１９億銀，齊齊踢高
１至２巴仙，一於中港基金齊齊開派對。
　　講開中港兩地嘅喜事，又點少得炒極都未炒完嘅「滬港通」呢？！今日生發發
（００３８８）就整咗條片解釋多方面細則，提及到香江開市前５分鐘就接納滬港通落盤，而
「滬股通」每日額度就係１３０億人仔，爆咗嘅就話唔會再接買盤。難得出埋詳細規則，生發發
又跟勢升逾１巴仙收１７９﹒２銀，今朝仲一度見１８０銀添！部分券商股鑊氣一樣咁勁，信達
國際（００１１１）又升唔停，炒高逾２２巴仙收２﹒０４銀，中國富強（００２９０）、時富
金融（００５１０）踢高８至９巴仙。
　　
＊摩通拍惠譽力撐眾地主，潤地勁強勢藍籌中最威＊

　　神州大陸限購令不停鬆綁，評級機構惠譽都要出嚟解話幾句，指近日祖國不同城市都接連宣
布鬆綁，將會增加業主購買大單位嘅意欲，從而推動樓市發展。就連摩通亦都出聲撐埋一份，話
內地樓市成交將會喺９月份反彈，建議趁低吸貨，潤地（０１１０９）、祖國海外
（００６８８）立即應聲飛高近６巴仙同逾３巴仙，潤地仲成為升幅最勁嘅大隻佬！
　　摩通亦都建議投資者喺一眾祖國地主放榜前，可由碧桂園（０２００７）、雅居樂
（０３３８３）同世房（００８１３）換馬至其他推薦嘅股份，好似富力（０２７７７）、合景
（０１８１３）等等。搞到碧桂園同雅居樂今日都唔係升好多，只得約１至２巴仙進帳，世房同
合景泰富就拍住上，升高近４至５巴仙。不過，融創（０１９１８）又再次跑出，全日炒高９巴
仙收６﹒７２銀，仲創埋６﹒８銀年半新高添。　

＊魚缸急急升地主記一功，入標爭買地恆地即起飛＊

　　其實今日魚缸升得咁靚仔，香江地主股真係應記一功。上個禮拜五，馬鞍山住宅地截飛，有
份入標嘅恆地（０００１２）今日表現好省鏡，升咗近５巴仙收報４９﹒６銀，做埋表現第二好
嘅藍籌。至於超人旗下嘅房地產基金（ＡＲＡ）諗住出售上海物業套現，雖然暫時只係傳聞，但
長實（００００１）都跟市升近３巴仙，收報１４３﹒７銀。
　　家陣新地（０００１６）嘅世紀審訊進行得如火如荼，前主席郭炳湘江湖地位不減當年，有
傳佢諗住籌組「帝國集團」，仲要借殼上市咁話，睇嚟東山再起指日可待。不過新地股價今日就
升唔夠１個巴仙，未見太興奮。信置（０００８３）都唔執輸，今日有２﹒７個巴仙升幅，分分
鐘之後有望突破１４蚊大關。

＊ＩＧＧ爆升跑贏成條街，萬洲創新高瑞銀首睇好＊

　　如果要講今日最多成交榜入面，最巴閉嘅股份，就非ＩＧＧ（０８００２）莫屬！公司宣布
中期業績唔使見紅，仲轉賺３２９４萬美金，首席營運官許元仲話同ＱＱ嘅「微信」平台合作所
帶來嘅收入符合預期，董事會將會決定轉唔轉去主板上市添。份業績咁省鏡，今日股價仲標青！
以４億幾銀大成交炒高近三成，收５﹒４７銀，認真誇張！
　　其他街坊都叨埋光，博雅互動（００４３４）都成億成交踢高近１１巴仙收１０﹒０６銀，
雲遊（００４８４）就升逾５巴仙收１９﹒１８銀。
　　最後不可不提嘅係祖國豬肉界龍頭萬洲（００２８８），聽日開始就加入富時環球指數，刺
激股價上市無耐就創新高見７﹒０５銀，瑞銀又出晒報告力撐，話睇好升到去８﹒１７銀叫人入
貨。結果以逾１３億銀成交急升近５巴仙收６﹒９７銀，勁！請請！
　　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。