《小傳日記》阿爺大派定驚散，Ａ仔香江齊反彈！

　　《小傳日記》阿爺噚日（１９日）一聲令下，實施「規範兩融」，Ａ股一日內暴瀉近８巴仙
，掀起突如其來「小股災」。點知中證監噚晚就已經出嚟派定心丸，話今次出招唔係想打壓股市
，缸友唔好過分解讀。而今日（２０日）公布舊年第四季祖國ＧＤＰ略勝預期，都幫助Ａ場收復
番部分失地，埋單抽高近２巴仙，創業板仲衝前逾４巴仙創歷史新高添！
　　與此同時，有消息話人行加碼續做中期借貸便利９００億人仔，即係向孖屐開大水喉，刺激
祖國錢莊都衝番上去，細間Ｄ嘅民行（０１９８８）就跑贏街坊，急升５巴仙收１０﹒０６銀，
招行（０３９６８）都抽高逾３巴仙，就算畀淡馬錫掟貨嘅建行（００９３９）都升番近２巴仙
完場。
　　中資股領軍之下，香江魚缸近全日高位收市，報２３９５１漲２１２點，收復番百天線（約
２３７７７），國貨佬更威水，袋番２６５點或２﹒３巴仙，收１１７４１。
　　不過全日成交就縮番落去８８５億左右，畀噚日少咗約三成。

＊昨日小股災皆因想多了？大市輕反彈低撈心歡笑＊

　　中證監見噚日出招嚇到缸友腳都震埋，Ａ仔場發生大地震，就夤夜喺網站出文安撫番個「孖
屐」。發言人話罰嗰１２間違規券商係為咗保護缸友權益，「孖屐」唔應該過分解讀，呢件事同
打壓股市係兩回事。不過，可能因為Ａ場有跌停機制，噚日部分券商股瀉得唔夠喉，今日繼續向
下插，當中中信証券（０６０３０）（滬：６０００３０）同海通證券（０６８３７）
（滬：６００８３７）Ａ仔分別再唔見咗近一成同９巴仙。好彩，香江缸友已經回番神，放心入
市掃平貨，兩者分別反彈５﹒９及８﹒３巴仙。其實缸友們覺得價位啱，都可以考慮入少少等
「深港通」開車。
　　另一邊廂，內險股都隨Ａ場衝上，國壽（０２６２８）反彈４﹒２巴仙，報３０﹒８５銀，
收復咗１０天線同２０天線，仲係升市火車頭添。平保（０２３１８）就緊隨其後，亦都彈高近
３﹒０巴仙報８３﹒６銀。ＥＴＦ股都升番Ｄ，Ａ５０（０２８２３）就踢高近４巴仙。

＊券商一額汗ＡＨ各走各，壽仔Ａ５０缸邊跳隻舞＊

　　噚日個市氣氛咁差，搞到有啲股今日先嚟料。金山軟件（０３８８８）噚日宣布，最大股東
雷軍嘅控股公司小米向ＱＱ（００７００）買金軟近３個巴仙嘅股權，每股作價１４﹒９３銀，
單刁完成後，雷軍投票權升到近三成，不過噚日個市太弱，搞到金山軟件股價無咩反應。結果金
軟今日大升８﹒２巴仙，報１７﹒４８銀。ＱＱ今日都造好，升０﹒９巴仙，報１２４﹒１銀。
　　仲有，藍戰士之一嘅中信股份（００２６７）又有「大刁」公布，繼早前蛇吞象母企資產之
後，今日午後宣布，得到卜峰集團旗下正大以及伊藤忠合營正大光明加入，涉資近８０３億銀！
午後復牌之後，股價都曾經抽升過５個巴仙，但最後都縮細返，只踢高１﹒５巴仙，報
１３﹒５２銀。　　　　　　　　　　

＊金軟好消息今天始炒上，中信有大刁奈何價不前＊

　　缸友如果唞夠，今日就記得準時上車，因為魚缸快車今日又開出喇。噚日一班火車佬，因為
Ａ仔場果邊太過恐慌嘅關係全部開倒車，但今日就踩行油，當中，南車（０１７６６）
（滬：６０１７６６）同北車（０６１９９）（滬：６０１２９９）Ａ股更加漲停板，香江呢邊
就分別踢高３﹒８同４﹒６巴仙，各報１０﹒３銀同１０﹒８４銀。街坊中鐵建（０１１８６）
、中鐵（００３９０）同中交建（０１８００）就齊齊衝高３至５巴仙，夠晒ＨＡＰＰＹ。
　　另外作為地盤佬嘅中聯重科（０１１５７）就發盈警，話指因為受國家固定資產投資，尤其
係房地產投資增速持續放緩，工程機械產品市場需求不振，所以預期去年純利將會跌七至八成咁
多，不過都無阻股價踢高，今日臨收市更加倒升番上去，最終全日踢高３﹒５巴仙，報５﹒３５
銀，唔通否極泰來？
　
＊火車轟隆隆中聯似否極，半新股發威日成夠誇張＊

　　孖屐氣氛好番Ｄ，半新股都熱鬧番上嚟，當中最巴閉嘅，非日成（０３７０８）莫屬。以
３﹒０６億銀打入五十大成交榜，仲爆升五成收０﹒９銀，拎埋最威水個股！呢隻股係做香江樓
宇維修保養同埋翻新服務，啱啱喺上星期三（１４日）掛牌，但無咩起色，仲一度潛埋水。估唔
到今日無端端大發神威，爆升咁多仲創埋新高。
　　新龍移動（０１３６２）上星期四（１５日）登場，又成功爆升逾２８巴仙收１﹒１３銀。
遲一日掛牌嘅科勁（０６８２２）都發力衝高逾１６巴仙，勁！
　　仲有其他細股，好似中國３Ｄ數碼（０８３７５）無原因咁飛升近四成收０﹒２８５銀，施
伯樂（０８２６０）就發埋不明升因，但完場都飆２６巴仙收０﹒５８銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。