《小傳日記》阿爺縱放水，國貨有點累；中移與ＱＱ，追開繼續追！

　　《小傳日記》Ａ仔場噚日（２１日）興奮完之後，今日（２２日）只輕輕踏前，而香江Ｈ股
尾段更洩晒氣。李總理喺「達沃斯論壇」話，神州經濟喺２０１４年有下行壓力，不過唔會硬著
陸。
　　阿爺就繼續做２６９５億中期借貸便利，仲新增５００億，重啟逆回購，向市場「放水」。
睇嚟正如缸友所料，臨近神州春節，呀爺一定例行放水；之不過，Ａ仔場同香江已連續兩日大升
，要回一回氣亦好正常。
　　香江魚缸朝早高開後掉頭行，試過最低去到２４４３８，而一堆ＥＴＦ都冷靜咗，Ａ５０
（０２８２３）今日回落０﹒８巴仙，降一降溫；至於祖國移動（００９４１）今日就繼續強勢
衝高１﹒２巴仙，紅底王之中認真光芒四射。
　　今日傳統藍籌攞番個勢，恆指升１７０點收２４５２２，創四個月高位；國貨佬只微升２５
點收１２０４７。今日成交有９９５億銀。雖然魚缸三連升，但今日支燭已經近乎十字星！
　
＊歐洲勢放水希臘勿輕心，太多不明朗最緊要謹慎＊　
　
　　加拿大噚晚減完息之後，歐洲今晚就會議息，放水已經係意料之內，問題只係放到幾盡。周
末希臘又大選，即使歐洲順利希臘嗰邊仲未放得心；況且魚缸今日支燭身咁短，缸友都係打醒十
二分精神為妙！
　　唔經唔覺，祖國移動已經連續踢高咗三日。大和就話，神州三大電話商移動用戶嘅上客量都
好過預期，當中祖國移動４Ｇ動力維持強勁，重申對神州電話商「正面」評級。所以唔單止祖國
移動，直頭連街坊都一齊升天。繼祖國移動之後，大和亦睇好聯通（００７６２），其次就係中
電信（００７２８），兩者分別踢高０﹒７巴仙同２﹒２巴仙，報１２﹒１銀同４﹒６３銀。
　
＊大和來護航電信拍拍掌，華創忽起動旺旺卻重傷＊
　
　　另一隻個靚仔就係股王騰訊（００７００），今日創咗兩個月高位，消息話公司旗下微信朋
友圈廣告投放門檻為５００萬人仔，好多大行都睇好佢，股價今日踢高２﹒３巴仙，報
１３１﹒６銀。
　　華創（００２９１），今日竟然成為最好表現嘅藍戰士，德銀話公司業務會有轉機，比咗個
買入評級佢，股價今日踢高５巴仙，報１６﹒９８銀。之不過，旺旺（００１５１）就慘喇，被
野村踩低評級叫減持，目標價去到８銀，成為最傷藍戰士，收報９﹒３９銀，碌低６﹒５巴仙，
跌幅係２０１１年１０月以嚟最大！　　
　　久違了嘅大象，今日就畀大家一個驚喜，抽高２％收市。另邊廂，賭仔亦唔曳；銀娛
（０００２７）今日踢高３巴仙，報３８﹒９銀，而金沙（０１９２８）就踢高３﹒６巴仙，報
３７﹒８５銀。
　
＊大象與濠賭齊齊威番轉，太平發盈喜股價失後勁＊
　
　　由於人行證實繼續做ＭＬＦ，一班神州錢莊今日都表現不俗。建行（００９３９）踢高
０﹒８巴仙，報６﹒４２銀，交行（０３３２８）踢高０﹒９巴仙，報６﹒７３銀。至於工行
（０１３９８）都踢高０﹒５巴仙。
　　中國太平（００９６６）就發盈喜，話全年多賺逾１倍，令到股價今日早上踢到勁高，不過
之後又縮返，全日只係微升０﹒２巴仙，報２３﹒６５銀。平保（０２３１８）就反而走低
１﹒５巴仙，國壽（０２６２８）亦微微收低。
　
＊結晶深上市申銀威到盡，美林來錫錫吉利輕踏前＊
　
　　申銀萬國（００２１８）今日威風到不得了，皆因同宏源合併完成，「結晶品」申萬宏源
（深：０００１６６）喺下星期一（２６日）登場，市值仲可能僅次於中信証券添。咁大件喜事
，申銀萬國今日就最高飛升近３８巴仙預早慶祝，埋單仲有逾３６巴仙落袋收８﹒０８銀，勁！
仲帶挈埋其他街坊敦沛（００８１２）同英皇證券（００７１７）抽高９巴仙及５巴仙。
　　只可惜，其他中資一族就仲未走出陰霾，銀證（０６８８１）、中信証券（０６０３０）同
海通證券（０６８３７）要逆市跌１至近４巴仙，認真「陰功豬」。
　　噚日跟勢跑出嘅砵砵車就要同魚缸分道揚鑣喇。呢排深得大行寵幸嘅吉利（００１７５）再
獲美銀美林升目標，一度連百天線都收復埋，但到終點時無咩力，最終收升近１巴仙報３﹒０８
銀。街坊華晨（０１１１４）旗下合營華晨寶馬，就以近５億銀向新晨動力（０１１４８）賣曲
軸生產線，可能粉絲唔多ｂｕｙ呢單「刁」，搞到華晨逆市開後波，唔見近１巴仙收１４﹒１６
銀。
　
＊貝恩講分手國美算冷靜，賀首推電影阿里影業漲＊
　
　　講開賣嘢，昔日基金愛股國美（００４９３）就風光不再，畀貝恩資本拋棄，折讓最多５巴
仙賣晒所有國美股份，套現最多１﹒４億美金。好彩缸友反應唔算太大，只係收跌近３巴仙收
１﹒１５銀，總算執番身彩。　
　　另外，阿里巴巴旗下阿里影業（０１０６０）終於打破近一年嘅悶局，好威咁以全日高位收
市，仲以１３﹒６億爆升逾１９巴仙，收１﹒５５銀！除咗早前宣布將啟動第一部電影項目之外
，最新消息就係羅兵咸接任做核數師，唔通又有新搞作嚟緊？！請請！　

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。