《小傳日記》Ａ場反高潮，國貨有點焦！

　　《小傳日記》全國政協會議今日（３日）下午三點鐘開幕；不過，Ａ場受到一大班新丁
「招親」影響，一大舊錢被鎖死，搞到埋單要收跌逾２巴仙，報３２６３點創一個月最大跌幅添
。Ａ場唔掂，當堂嚇散晒香江呢邊嘅ＥＴＦ，安碩Ａ５０（０２８２３）同南方Ａ５０
（０２８２２）齊齊唔見約３巴仙，慘！
　　Ａ場反高潮，香江魚缸即刻洩晒氣，由開場彈高近百點，到散場前急急倒插落去，仲一度低
見２４６６３，連廿天線（約２４６８３點）都失守埋。埋單就跌少咗Ｄ，但都唔見１８４點收
２４７０２。國貨就跌得更甘，插低２６８點或２﹒２巴仙，收報１１９４５。全日成交都有
７９９億銀左右，沽壓都唔輕喎，缸友要小心喇！

＊阿爺頻泵水可惜多新丁，Ａ仔無力挽國貨被狂掟＊
　　
　　本月焦點，盡在兩會，而上星期六（２８日）阿爺忽然減息，以為魚缸會有幾日好合皮；只
可惜，近排祖國新丁排住隊上場，將會凍結大把資金，搞到Ａ場今日急跌超過２巴仙，三千三得
而復失。睇嚟真係要靠諗諗計，為Ａ場再沖一沖喜喇！
　　雖然阿爺已經連接放水救「旱災」，三個半月內再度減息，但一班內房、內險同內銀好似扶
唔起。好！今日再嚟招３５０億人仔「泵水」，不過一班中字輩都頭耷耷，眼濕濕。好似國壽（
０２６２８）收市前被淡友襲擊，埋單碌低近４巴仙報３２﹒０５銀，做咗最差大隻佬；而街坊
新保（０１３３６）今日又再跣低４巴仙。
　　中小型內銀都傷得幾重，交行（０３３２８）同民行（０１９８８）都唔見３至近４巴仙。
萬科（０２２０２）就做咗內房股受襲代表，跣低４巴仙，報１６﹒９８銀，認真無奈！

＊內險與內銀今回同內傷，環保成焦點拍住齊齊漲＊

　　可再生能源股係「兩會」焦點之一，游資今日乘勢炒起核電股。大隻佬中廣核
（０１８１６）盤中試過升逾６巴仙，可惜埋單唔見咗一半，只有３巴仙多啲進帳，收３﹒２２
銀。同系中廣核美亞（０１８１１）亦都有大成交踢高近５巴仙，不過發盈警嘅中廣核礦業
（０１１６４）就無咁好福氣，要跟市跌１巴仙。街坊以中核工業（００６１１）升得最勁，喺
星期五（６日）放榜前偷步抽高近１２巴仙，創近兩年高。
　　至於噚日已經炒咗一轉嘅太陽能股，繼續發光發亮。漢能薄膜（００５６６）阿媽係兩會提
交支持光伏一體化提案，刺激股價彈高１０﹒５巴仙，收報５﹒２５銀。其他街坊都乘機叨光，
協鑫新能源（００４５１）、興業太陽能（００７５０）分別踢高９﹒５巴仙同９巴仙；大隻佬
保利協鑫相形見絀，只有４﹒６巴仙升幅。

＊電信有４Ｇ可惜反高潮，華策見異樣急挫成交激＊

　　祖國電訊股都無厘神氣，聯通（００７６２）同中電信（００７２８）之前食住發４Ｇ牌嘅
消息炒咗上去，到消息成真就無以為繼，今日聯通仲喺派全年成績表之前碌番落去，皆因孖屐估
計，份成績表應該係同業中最差，大淡友里昂早已唔睇好，叫缸友沽貨兼睇１２蚊目標價，搞到
聯通收跌逾２巴仙收報１２﹒３８銀。收市後成績揭盅，全年賺近１２１億人仔增１６巴仙，果
然差過預期。
　　街坊中電信仲傷，大挫近４巴仙收４﹒８５銀。一哥中移動（００９４１）就大陰燭跌穿保
歷加通道，收１０２﹒５銀，「紅底股」地位又響起警號！
　　講開大陰燭，華人策略（０８０８９）都逾２億銀大成交急瀉３８巴仙，係最差表現個股。
原來新濠國際（００２００）澄清，話集團同埋主席何猷龍，同華人策略完全無任何合作關係。
合作憧憬落空，難怪今日隻華策畀人洗倉喇。　　　　

＊濠賭數據曳好在勝預期，股仔齊反彈不做霎眼嬌＊

　　據《澳門日報》指，馬交全國人大代表團同埋全國政協委員噚日（２日）到咗北京準備
「兩會」傾吓點搞區域合作同埋可持續發展等問題，上午賭仔表現普遍都唔錯。
　　中午馬交出賭收成績表，２月博彩毛收入得１９５億澳門銀，按年少近４８﹒６巴仙，雖然
創咗有紀錄以嚟最大跌幅，但都好過孖屐預期，巴克萊即出報告撐一撐。下半場一開市，位位缸
友即刻爭住掃貨，金沙（０１９２８）同銀娛（０００２７）都曾經最多升近半成，但大市轉弱
，最終埋單只收升約１﹒７巴仙同２巴仙，銀娛都守得住第二佳藍戰士寶座。
　　街坊永利澳門（０１１２８）聽日準備放榜，今日都跟大隊抽高２﹒４巴仙。美高梅
（０２２８２）都有３﹒２巴仙進帳。不過，老老實實，就算今次賭收無想像中咁差，但都唔代
表已走出谷底，建議缸友到下半年等有新賭場開幕同賭收基數低啲先入貨啦。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。