《小傳日記》Ａ場又勝仗，破關再向上；香江回回氣，地主齊受傷

　　《小傳日記》噚日（４日）全世界都以為「深港通」今年上場，點知原來係「舊聞當新聞」
，上演咗一場「美麗的誤會」。不過呢個誤會反而幫Ａ場打破悶局，再加上「習馬會」效應，同
埋阿爺開會提出推進工業穩增長，深化利率市場改革等等，Ａ場今日（５日）乘勢再衝高近２巴
仙收３５２２點，創兩個半月高位，仲一度逼近三千六大關添。勁！
　　不過，香江缸友噚日興奮咗半日之後，今日明顯留力唞唞，喺二萬三關上上落落，全日高低
波幅只得二百點左右，埋單時淡友贏個馬鼻。恆指跌２點收２３０５１。Ａ場破關，香江中資股
自然都有好成績，帶領國指升５６點收１０６１７，跑贏大市。全日魚缸總成交雖然縮番落去，
但都有８４３億銀左右，都算旺場！　

＊Ａ股ＥＴＦ奮力向上爬，內險與券商走勢誇啦啦＊

　　Ａ場發力闖上三千五，Ａ股ＥＴＦ當然表現唔錯，南方Ａ５０（０２８２２）同安碩Ａ５０
中國（０２８２３）升２至３巴仙左右，各報１３﹒１銀同１１﹒６銀，成交仲要唔少，分別有
２７億同２１億，排成交榜第２位同第４位。
　　投資收益靠曬Ａ場嘅內險亦好生猛，平保（０２３１８）大升近３巴仙，收報４５﹒４銀，
係第二好表現藍戰士；新保（０１３３６）亦漲近２巴仙，報３５﹒１５銀，國貨佬中第二勁。
太保０２６０１）同壽仔（０２６２８）靚過一段，但散場升唔夠１％。
　　券商之前有份救市，Ａ場有起色股價自然有好表現，銀證（０６８８１）踢高半成，收報
７﹒５９銀，中州證券（０１３７５）升１巴仙，廣發証券（０１７７６）就有３巴仙進帳，係
表現最好國貨佬。

＊靚數據撐腰聯通升到笑，阿爺夠關顧基建亦夠照＊

　　祖國工信部指首三季行業移動數據同互聯網業務收入增近四成，移動電話用戶累計已經超過
１３億戶，當中一半以上係３Ｇ或４Ｇ用戶，同時正考慮三大電訊商改革進程，消息刺激聯通
（００７６２）炒高近６巴仙，重上十蚊，收報１０﹒１２銀。瑞信唱好中電信
（００７２８），話佢最受累鐵塔共用，畀「優於大市」評級同「他屐」７﹒９３銀，結果踢高
１巴仙，收報４﹒２銀。祖國移動（００９４１）就得唔夠半個巴仙進帳，報９５﹒２５銀。
　　基建股表現亦唔錯，交通部推進西藏等藏區公路發展，加上中鐵健（０１１８６）中標武漢
項目，Ａ股（滬：６０１１８６）升半成，Ｈ股升得唔夠１巴仙；中鐵（００３９０）同中交建
（０１８００）就升約２巴仙。

＊請來了猛人大象踏前步，息魔快來襲地主難睇好＊

　　阿里影業（０１０６０）豪掟５﹒２億美金，買娘親嘅線上電影售票業務，同投資融資平台
娛樂寶，衝前近３巴仙，報２﹒１７銀。阿里嘅主要勁敵ＱＱ（００７００）下星期二
（１０日）放榜，瑞銀率先估佢第三季收入會升２８巴仙，但似乎冇咩刺激作用，依然碌低
０﹒５巴仙，報１５２﹒３銀。
　　有指跨國餐飲集團金巴斯（Ｃｏｍｐａｓｓ）主席會加入大象（００００５）董事局，將會
參與決定搬唔搬離米字國，大象彈起近２巴仙，報６１﹒９５銀，仲一次過跳過１０天同２０天
線。
　　耶倫喺花旗國聽證會度話，如有數據支持，下個月就可能加息。一班本地磚頭佬聽見心慌慌
，信置（０００８３）跣低近３巴仙，報１１﹒７２銀，係最差藍戰士；長實（０１１１３）、
恆隆（００１０１）都腳軟，唔見咗１至２巴仙，埋單５３﹒６５同１８﹒８８銀。

＊Ｆｒａｓｅｒ再急插亞勢未止血，貴金屬３Ｄ忽然好鑊氣＊

　　半新丁ＦＲＡＳＥＲ（０８３６６）都唔明點解兩日插咗逾８８巴仙，今日低見０﹒２５銀
，收市全日瀉近３９巴仙，得返０﹒２５５銀，只係高配售價０﹒２銀約２８巴仙咋。上市幾日
就差唔多打回原形，真係大叫三聲「慘慘慘」！
　　亞勢備份（０８２９０）同病相連，一樣未止血，再次瞓低近１３巴仙，報０﹒２７銀，三
日夾埋足足蒸發逾９３巴仙。中國農產品（００１４９）細胞大變身，「五合一」之後，折讓
２８巴仙「二供三」，結果冧低６巴仙，報０﹒１１銀。
　　贏家方面，中國貴金屬（０１１９４）一支大陽燭升破１００天線，飆高逾２７巴仙，報
０﹒４４５銀。３Ｄ數碼（０８０７８）跌足四日冇咗逾４５巴仙後，終於一吐污氣，反彈返近
６巴仙，埋單０﹒５５銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。