《小傳日記》Ａ場瘋炒後急墜，香江重傷心都碎！

　　《小傳日記》小傳噚日（８日）先講起，Ａ仔場呢排炒到熱辣辣，今次升浪係咪就快見頂？
！點知唔使一日，今日（９日）Ａ場終於回歸現實，升到去最高３０９１點之後，下半場好似食
咗「瀉藥」咁，眨吓眼就唔見１巴仙，眨多吓又唔見多１巴仙…最終埋單插低逾５巴仙收
２８５６點，係逾五年來最大單日跌幅，之前炒到癲咗嘅ＥＴＦ股率先撻低，單係Ａ５０
（０２８２３）成交額已高達１２８億銀左右，跣低逾７巴仙收場！
　　雖然唔知今次係回一回氣，定係跌浪嘅開始，但已經嚇到香江缸友無鞋挽屐走，講得出嘅中
資金融股同券商股都震散晒，搞到大隻佬重創，一度急挫近６５０點，埋單都唔見５６１點或逾
２巴仙，收２３４８５，國貨佬就梗係傷得仲重，跣低５４０點或４﹒６巴仙，收１１３３２，
慘！
　　　
＊天堂與地獄只是一線差，大上復大落不得不看化＊

　　中港魚缸跌到嘭嘭聲，缸友爭先掟貨，滬深市成交高達近１﹒３萬億人仔，再一次創全球紀
錄。頭先提過Ａ５０成交都過百億，可想而信，香江全日成交都唔會少得去邊，埋單高達
１４４２億銀左右，拍得住上星期五（５日）１４７６億銀嘅高位。
　　香江驚現「小型股災」，超過１２９０隻股份中伏，只得２７８隻逃過一劫，如果噚日高追
入貨嘅缸友，真係要「保重」。先睇「金融重災區」，建、工、中、農四行Ａ股都一度瀉停板，
Ｈ股就３至逾５巴仙。計一計數，Ａ＋Ｈ市值足足蒸發咗超過４７００億！其他街坊招行
（０３９６８）、民行（０１９８８）就傷得仲重，齊齊唔見７巴仙！
　　「燕疏」嗰邊，壽仔（０２６２８）（滬：６０１６２８）Ａ股都慘遇跌停板嘅命運，Ｈ股
就唔見近５巴仙。最陰功係新華保險（０１３３６）（滬：６０１３３６）ＡＨ受敵，兩邊都重
挫約一成，粉絲都無眼睇囉。

＊來來回回間成交千四億，內險與內銀同是重災區＊

　　至於鑊氣最勁嘅券商世界，三個字形容：「立立亂」！先講大隻嘅成員，銀證
（０６８８１）短短一個月累升超過八成，今日就話考慮發５５億人仔公司債，雖然唔係配股抽
水，但都嚇到持貨缸友急急跳船，收市蒸發近１３巴仙收９﹒６銀。講到明未來三個月可能會發
股集資嘅中信証券（０６０３０）反而無跌得咁「勁」，但都碌低近８巴仙收２９﹒３５銀。
　　另一邊廂，海通證券（０６８３７）衝出國際，宣布以３﹒８億歐元買葡國ＢＥＳＩ投行，
今朝股價曾經破頂見２３﹒２銀，但高處不勝寒，收市要插低近１２巴仙報１９﹒６銀。
　　細粒Ｄ嘅券商股就上演「天與地」，申銀（００２１８）、華富國際（００９５２）竟然炒
高１２及１４巴仙，簡直係逆市奇葩！但其他街坊差唔多全軍覆沒，敦沛（００８１２）、耀才
（０１４２８）就碌低８至１３巴仙喇。

＊昨天太風光今天心慌慌，券商碌呀碌粉絲大減倉＊

　　喺亂巿中掘金，絕唔係一件易事，昔日「炒家尤物」嘅太陽能股都不能倖免。有缸湖傳聞，
指花旗國對祖國嘅光伏「雙反」將喺後日（１１日）作仲裁。咩係「雙反」？意即反補貼、反傾
銷嘅調查。唔止咁噃，與花旗國相鄰嘅楓葉國，亦剛宣布對祖國光伏產品進行「雙反」調查，據
指將喺出年３月獲裁決。有專家估計，因楓葉國係祖國光伏產品嘅主要出口國，若對方落閘，一
眾祖國太陽能企業即時中伏，搞到成個板塊碌晒落嚟。
　　龍頭協鑫（０３８００）曾經畀人捧到天咁高，今日就急插１３巴仙收１﹒７７銀，兩蚊雞
都守唔到呀。陽光能源（００７５７）都跌得好甘，碌低咗近８巴仙，其他嘅光伏佬都無運行。
但漢能（００５６６）就唔跟大隊，無啦啦炒高咗１１巴仙收２﹒４３銀，仲錄得近５億銀大成
交，真係唔知咩「咩葫蘆賣咩藥」，有待跟進。

＊楓葉搞雙反太陽失光芒，跌市搵奇葩國策誇啦啦＊

　　講番Ｄ「得寵股」先，祖國經濟會議正式開鑼，有分析話推進「一路一帶」係重要嘅大方向
之一，同基建有關嘅重型機械板塊喺大跌市之中，照舊受到孖屐追捧。大佬級嘅中聯重科
（０１１５７）最高見過５﹒３７銀，踢高一成。點知魚缸愈跌愈急，搞到最後只係升逾５巴仙
，收報５﹒１３銀。街坊中國龍工（０３３３９）同三一國際（００６３１）分別漲逾７巴仙同
逾５巴仙，各報１﹒６２銀及２﹒０７銀，勁！
　　近親水泥股雖然要陪跌，防守力普遍算硬淨。三個大隻佬中建材（０３３２３）、潤泥
（０１３１３）同埋安徽海螺（００９１４）只係唔見１個巴仙有多，收報７﹒４５銀、
５﹒０６銀及２７﹒０５銀，算係有個交代。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。