《小傳日記》大象ＱＱ齊觸礁，中港磚頭升到笑！

　　《小傳日記》話咁快「五一」小黃金周就過咗，估唔到實施「一周一行」之後，嚟香江嘅祖
國旅客不跌反升，比舊年同期增加一成四。人流旺咗，加上股市大旺帶動市面消費強左，地產佬
隨時又有藉口加租，一班磚頭股今日（４日）都衝高晒慶祝，認真巴閉！
　　不過，４月祖國官方ＰＭＩ雖然持平於５０﹒１，但孖屐覺得經濟都仲係未掂，等緊阿爺出
招救經濟，Ａ場都升３８點收４４８０。香江呢邊，因為聽日放榜嘅大象（００００５）同科技
龍頭股王ＱＱ（００７００）都畀淡友轟炸，齊齊碌低近２巴仙，合力拖低１０５點。最終，恆
指倒跌９點收場，報２８１２３；國指就仲頂得住，微微踢高２８點收１４４５９。全日主板成
交少咗Ｄ，約１５５６億銀。
　　雖然個市無力，但係大大隻嘅中信股份（００２６７）同有「上海和黃」之稱嘅復星表現相
當唔錯，前者就宣布主要股東完成向正大光明賣一成股權涉資高違３４５億銀，刺激股價收升逾
３巴仙；後者又計劃用２１億美金併購花旗國保險佬，收市又飆高１１巴仙再破頂，勁！

＊ＰＭＩ曳曳憧憬谷經濟，Ａ仔即踢上香江有點翳＊

　　講番焦點板塊祖國磚頭先，雖然近排有回暖跡象，廣東省首季商品房銷售有３﹒４巴仙進帳
，之不過成班大隻佬之前升得太多，祖國海外（００６８８）同潤地（０１１０９）破完頂之後
就被缸友掟貨，搞到收市分別跌近２及近３巴仙，報３１﹒９５銀同２７﹒４５銀，後者仲係今
日表現最差藍戰士添。反而二、三線嘅磚頭佬就繼續搶晒風頭，細細粒嘅沿海家園
（０１１２４）一鳴驚人，收升逾３１巴仙，近期走勢超強嘅恆大（０３３３３）繼續破頂，踢
高逾９巴仙，連８蚊關都一舉攻破。
　　另外，祖國都研制水泥業階梯電價實施細則，水泥股有追捧。其中升得最勁嘅係金隅
（０２００９），踢高逾８巴仙造１０﹒５４銀；同行安徽海螺（００９１４）都有近５巴仙進
帳。唯獨中建材（０３３２３）斯人獨憔悴，全日股價偏軟唔夠１巴仙。

＊假期消費旺地主不用慌，愛細唔愛大內房走勢壯＊

　　本地地產佬都發圍，「五一」假期期間本地商場好旺，再加埋偉大嘅母親節就快到，夏天又
就到，個個行街買新衫，新地（０００１６）旗下ａｐｍ、大埔超級城等１２個商場人流有８至
１２巴仙增長，生意多咗一成至一成半，同系上水廣場、將軍澳東港城等亦都丁財兩旺，結果新
地就踢高超過４巴仙收１３４﹒４銀，仲曾經創埋超過七年高位１３５﹒７銀。
　　新世界（０００１７）就畀德銀唱好，話佢賣走３間酒店ｔｉｍｉｎｇ好，估計會有成百億
收益，「他屐」升到１３﹒８銀，維持「掃貨」評級，今日亦都有半成進帳，創年半高位
１０﹒９６銀，仲做埋今日最叻藍戰士。鄰居恆地（０００１２）、九倉（００００４）同埋會
德豐（０００２０）升幅介乎近４巴仙至近６巴仙，恆地同會德豐仲雙雙創新高添。大好友
（０００８３）今日破頂，高收３﹒２％，但已經係升得少嗰隻啦！

＊同系三分親你好我更好，２３２再上幸福最幸福＊

　　放咗３日假，小傳叉足電，今日特別精靈，發現有部分同系股份今日好受炒友歡迎，威華達
（００６２２）突然大升近７巴仙，兼有逾４億大成交配合，成交有成５億股，差唔多係平時嘅
９倍，仲見０﹒９２銀創自２００２年７月高位，而揸住威華達３６巴仙嘅百仕達
（０１１６８）亦踢高近４巴仙，創超過４年高位。
　　香港建設（００１９０）亦係大升兼有成交配合，抽升超過１６巴仙收０﹒３６銀，仲曾創
３年高位。佢揸住超過５４巴仙嘅祖國再生能源投資（００９８７）亦叨光踢高超過８巴仙。
　　另外超人有揸住嘅中航工業（００２３２）今日抽高一成創新高，收報１﹒３９銀，超人果
然無寶不落。中航工業旗下幸福控股（００２６０）更加爆升超過３８巴仙，創咗近８年高位
０﹒５６銀，有貨嘅缸友就真係幸福啦！

＊你說Ｓｅｌｌ　ｉｎ　Ｍａｙ我要繼續Ｓｔａｙ，股仔鑊氣猛誰願Ｇｏ　Ａｗａｙ＊

　　魚缸上上落落，無乜著落，炒友唯有搵嘢落鑊。上置（０１２０７）話會磋商配股或構成股
權變動，消息刺激股價一度狂飆逾九成，埋單升幅收窄至７６﹒６巴仙，收報０﹒６８銀，為全
日表現最佳個股。
　　緊隨其後嘅長和國際（００００９）都好有鑊氣，根據披露權益，上個星期二（２８日）匯
金由持有公司０巴仙股份，大幅升至６８﹒３９巴仙，查實只係匯金持有「保證權益」及「衍生
工具」好倉，但實際係咩工具唔知，亦唔知行使價係幾多。響披露消息呢一刻，匯金仍未持有實
股，但都足以全隻股今日一度炒高一倍二，公司發不明升因公告，升幅先收窄至７３巴仙。
　　主力搞音響嘅成謙聲匯（０２７２８）都唔執輸爆上，公司話會訂立潛在關連交易咁話，全
日股價有４３巴仙進帳，收報１﹒６９銀。啱啱復賽嘅南華金融（００６１９）就大折讓供股，
不過缸友似乎無有怕，照炒上超過４６巴仙。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。