《小傳日記》Ａ仔仍然帥，香江卻憔悴

　　《小傳日記》噚晚外圍表現唔錯，歐洲中央錢莊打算加快買債，刺激德法魚缸雙雙有兩巴仙
進帳。Ａ場今日反覆向上，仲成功收復過四千五，但後勁不繼，最終都係企唔穩四千五收場。香
江今朝高開５７點，但好快就倒跌；Ａ場收工後，香江呢邊跌幅明顯擴大，仲試過失守十天線
（２７５２２），好彩最尾都叫做跌少咗，收報２７５８５點，唔見１０８點或０﹒４巴仙，十
天線失而復得。主板成交仲係無咩起色，全日約１３７８億銀。
　　Ａ場著眼於《中國製造２０２５》，阿爺希望多個行業板塊都有出頭天，結果今日踢高
０﹒７巴仙收報４４４６點，國貨淨係得４４點落袋，收報１４２３５點，但總算成功收復廿天
線（１４２３２）。

＊魚缸似洩氣成交有點木，交行有大刁踏前來慶祝＊

　　內地銀主呢排都有動作，好似交行（０３３２８）咁，斥１３﹒５億銀收購巴西銀行ＢＢＭ
八成股權，係交行首次海外併購，消息一出，交行今日站得住腳，踢起唔夠一個巴仙，報
７﹒５５銀。
　　另一邊廂，總理李克強出訪足球國，簽咗２７０億美元貿易、投資等協議，受惠嘅唔止交行
，仲有工行（０１３９８），工行將會同足球國最大的抵押貸款機構－－Ｃａｉｘａ　
Ｅｃｏｎｏｍｉｃａ　Ｆｅｄｅｒａｌ成立一個５００億美元嘅基金，為基礎設施項目投資，結
果今日股價就踢起０﹒５巴仙。
　　內險佬新保（０１３３６）傳被機構投資者大手減持，今日碌低１巴仙。好彩一眾街坊安然
無恙，平保（０２３１８）、太保（０２６０１）同人壽（０２６２８）升０﹒１巴仙至１巴仙
。

＊新保打倒褪大戶玩減持？高佬好矛盾ＱＱ軟一軟＊

　　ＱＱ（００７００）畀高盛踢出「堅係掃貨」名單，原因係佢升幅超過曬阿里同百度等鄰居
，但仲係維持「買入」評級，未來一年「他屐」仲由１５０銀升到１８０銀，預測出年ＰＥ３０
倍。隻股今日跌唔夠２巴仙，收報１５８﹒６銀。
　　ＱＱ揸住近９巴仙嘅金山（０３８８８）就畀大摩讚佢雲業務進展唔錯，但係手遊方面就差
啲，事關競爭持續，又突破唔到樽頸位，所以畀咗佢「與大市同步」評級，「他屐」２６蚊。最
終全日金山升１巴仙。
　　大摩同時撐一撐金蝶（００２６８），估佢雲業務會健康成長，重申「掃貨」評級，「他屐
」升至６﹒５銀，尾市發力之下收升超過２巴仙。

＊美金嘭嘭升油金股齊挫，６４２超誇大漲近八倍＊

　　美金升值，搞到準備抬起頭向上行嘅油價同金價齊齊被壓番落。油佬企定定捱打，昆侖能源
（００１３５）碌低近３巴仙，報８﹒６銀，仲係表現最差嘅藍戰士。三桶油都好慘，中海油
（００８８３）、中石油（００８５７）同中石化（００３８６）分別都無咗０﹒１巴仙至
０﹒５巴仙。
　　掘金都未必好好搵，金價碌低佢地都喊晒苦。靈寶黃金（０３３３０）行低７巴仙，報
１﹒９４銀。招金（０１８１８）蒸發４巴仙，報５﹒２９銀。黃金國際（０２０９９）好少少
，跌咗１巴仙姐。
　　今日雖然跌市收場，不過有位特別參賽者表現非常耀眼。就係比較低調嘅優先股－百利大優
先股（００６４２），今日最多飆８﹒７倍，埋單都有８倍入袋，收報２﹒７８銀。連普通股－
百利大（００４９５）都受惠，扭腰由跌轉彈高６巴仙，收報０﹒８３銀，認真厲害！

＊漢能挫五成中途忽停賽，光伏各走各有喜亦有愁＊

　　股仔上上落落，有時真係好得人驚，上個月市場仲揣測過漢能（００５６６）有機會取代華
創（００２９１）做藍戰士，但結果係兩回事。漢能今日一下子就唔見四成七，仲要停埋牌，停
牌前報３﹒９１銀。公司今朝仲開緊股東會，不過主席李河君無現身。有小股東就話自己１蚊已
經買入公司股份，投資要睇長線咁話，唔知公司幾時會復牌呢？公司就未有回應。
　　今日其他光伏股各走各，卡姆丹克（００７１２）噚日（１９日）仲威風凜凜，今日回落一
成。阿爺嗰邊就有數據顯示，２０１５年１－４月份，全國太陽能３８２萬千瓦，比去年同期多
投產３４１萬千瓦。咁講法唔通光伏佬又要起動？連比亞迪（０１２１１）都喺巴西設太陽能西
板工廠，而銀建國際（００１７１）就注資４億人仔去太陽能公司度，不過兩者今日未有大異動
住，前者踢起２﹒２巴仙，後者無升跌。請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。