《小傳日記》魚缸拍烏蠅，好友等出兵！

　　《小傳日記》今日（２４日）只能用一個字形容魚缸：「悶！」全日喺廿天線度上上落落，
高低波幅唔夠二百點，魚缸靜到烏蠅飛過都聽到。上半場勉強有三百億，點知下半場仲悶，全日
埋單六百億都無，只得５７２億銀，係９個月新低紀錄，真係悶到瞓幾覺！
　　其實都唔怪得缸友唔敢落場玩，花旗國等議息，噚晚又輕輕碌低３１點收１７７９２，Ａ場
同樣無方向收３６１６點；再加埋今個星期五（２７日）就係期指結算日，無特別重大消息之下
，好淡雙方當然唔會貿貿易出手喇。結果，恆指埋單只係唔見７８點收２２５８７，國指喺祖國
錢莊拖累下，就跌得多ＤＤ，挫７２點收１０１５６。

＊電能與長建重組等表決，超人眾愛股今天微微軟＊

　　超人旗下全線腳軟。電能實業（００００６）同長建（０１０３８）今日開股東大會傾合併
。雖然唔少電能小股東都唔滿意個換股比率，不過，小超李澤鉅就強調出價已經好合理，合併非
志在必得。電能同長建雙雙停賽等表決；而在賽道嘅超人一號（００００１）無升跌，長實地產
（０１１１３）就軟近２巴仙，收報５２﹒３５銀。港燈（０２６３８）觸頂見６﹒０９銀後都
走軟，全日碌低唔夠１巴仙，收報６﹒０４銀。泓富產業（００８０８）及置實產業
（００７７８）都唔見咗約１巴仙。
　　聯想（００９９２）呢期喺藍戰士中表現相當突出，聽日係派中期息６仙除淨日，今日就逆
市踢高逾３巴仙，收報８﹒７６銀，係表現最佳藍戰士，似乎已經見咗底。
　
＊聯想逆市漲內銀受輕傷，阿爺來錫錫券商未歡暢＊
　
　　據報到９月尾，神州錢莊嘅不良貸款比率逾２巴仙，餘額高達２萬億人仔，比年頭再多５千
億，升足４年！光大銀行（０６８１８）瞓低逾２巴仙，報３﹒６３銀。街坊建行
（００９３９）、工行（０１３９８）同交行（０３３２８）齊齊碌低逾１巴仙，報５﹒４８、
４﹒７９同５﹒５４銀。
　　有傳阿爺見魚缸回穩，開始放寬７月股災嘅應急政策，或者取消券商自營股票每日淨買入嘅
要求。海通證券（０６８３７）拗腰倒升１巴仙，報１４﹒５銀。華泰證券（０６８８６）朝早
試過冧低近４％，之後都收窄返，但全日仍唔見咗逾１巴仙，收１９﹒７４銀。國泰君安
（０１７８８）個主席唔見人影，可能涉案受查，噚日直插逾１２巴仙，今日只係反彈逾２巴仙
，收２﹒９２銀。

＊野村薦金沙緣何唔多受，天能搞分拆股價確優秀＊

　　野村話，濠賭股今年以來掟走咗四成，估計出年股價可以溫和復甦，博彩業中場收入都會增
長返８巴仙，不過貴賓廳仲未脫險、會減２９巴仙。金沙（０１９２８）就獲評為首選，但似乎
唔多受噃！微微行前０﹒６巴仙，報２６﹒４銀。銀娛（０００２７）心有不甘，直衝近２巴仙
，報２３﹒４５銀。美高梅（０２２８２）同澳博（００８８０）就唔生性，跣低約２巴仙，埋
單１０﹒２４同５﹒９２銀。
　　有指神州鐵路規劃可能由「四縱四橫」加到「八縱八橫」，總理李克強外訪亦落力推銷，想
幫忙整個馬來西亞、新加坡高鐵。可惜成班火車開倒車，中交建（０１８００）、中鐵建
（０１１８６）同中鐵（００３９０）褪後逾２巴仙，報９﹒８９、１０﹒７２同６﹒７銀。

＊莎莎派得爽尾段突發力，中亞放榜前連日高高高＊

　　天能動力（００８１９）諗住將阿仔浙江天源科技喺神州新三板上市。如果成事，對集團釋
放價值都有幫助，難怪天能動力今日抽高逾８巴仙，收報６﹒９４銀，創埋上市新高添！
　　中國燃氣（００３８４）聽日放榜，盤前已經有一手３９９萬股交易，涉資４７２５萬銀。
隻股今日就踢高２巴仙，收報１２﹒０２銀，似乎缸友對佢份成績單有信心喎！
　　莎莎（００１７８）中期少賺成５５巴仙，得１﹒５３億銀，不過連埋特別息有９仙息收。
放榜後早段都仲係腳仔軟，不過之後發力，最尾跌轉升逾３巴仙，收報２﹒９３銀。星期五先放
榜嘅中亞能源（００８５０）仲勁，大成交炒高逾２５巴仙，收報０﹒２３８銀，單單兩日已經
炒高近４７成巴仙！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。