《小傳日記》憧憬開水喉，魚缸升個夠；大行輪流踩，賭股愁更愁！

　　《小傳日記》花旗國聯儲局開會傾緊加息時間表，之前孖屐就講到似層層，話「息魔」提早
殺到。不過到關鍵時刻，依家又話有調查發現，主席耶倫根本無得揀，只可以「漸進式」慢慢加
，美股當堂醒神晒，反彈成百點。
　　花旗市反彈，再加埋阿爺突然送上驚喜，聞說噚日（１６日）人行靜雞雞向五大祖國錢莊
「放水」５０００億人仔；兩大好消息推動下，香江魚缸今朝（１７日）一開市就反彈逾２００
點，仲一度抽升最多３３４點，啱啱好掂到５０天線（約２４４６９），收復番噚日被「吹散」
嘅失地。完場就有２４０點落袋收２４３７６，同抽高１７５點收１０８９３嘅國貨佬拍住上；
香江「八連跌」終於拜拜。全日成交都唔少，有近７７０億銀。

＊阿爺鬆鬆手美加息淡化，魚缸收到了今天誇啦啦＊

　　阿爺出手呢個好消息傳到真嘅一樣，不過Ａ仔場差啲反彈失敗，好彩最終都上番２３００關
，真係捏一把冷汗。而香江呢邊一班錢莊就梗係開晒Ｐａｒｔｙ，再加埋美林出報告，話估計阿
爺未來幾星期可能又會再「升級」出招，久旱逢甘露嘅錢莊唔理三七廿一，一於衝高咗先！
　　傳聞入面嘅五大行，交行（０３３２８）就升得最靚仔，完場踢高逾２巴仙收５﹒７４銀，
跑贏建工中農四大巨無霸，四大行就只升１至２巴仙。其他街坊都算叨到光，惟獨光行
（０６８１８）曾逆市碌低，好彩收市前都升番０﹒５巴仙，唔通缸友唔太Ｂｕｙ唐總推進嘅新
光大集團整體上市大計？！　　
　　錢莊難得咁勇猛，吸引唔少缸友入貨，不過巴克萊就提醒大家，今次反彈浪已接近尾聲，已
經調低部分目標價及評級，喺時候沽偵走人咁話。

＊內銀大踏步濠賭卻苦腦，紛創一年低唯有等運到＊
　　
　　錢莊就話憧憬阿爺打救啫，至於畀阿爺打壓嘅濠賭股，就真係跌到驚喇…今日同經紀陳食午
飯果時，佢話好多坐緊艇嘅客仔都喊晒口問：「究竟啲賭股仲要跌到幾時呀？」睇住一隻隻排住
隊創逾一年新低，真係心都實埋。
　　成班大行愈踩愈開心，由以前將佢地捧上天，到依家不停出報告唱淡，講到濠賭前景「沒有
最差，只有更差」。摩通直頭話今個月濠賭收入可能會跌２１巴仙，係２００７年以嚟最大跌幅
，瑞銀又話今個月收入惡化等。澳博（００８８０）、美高梅（０２２８２）今日跌得最甘，齊
齊唔見約５巴仙。龍頭之一嘅金沙（０１９２８）終於頂唔順，加入逾一年新低大軍，曾低見
４１﹒６銀，埋單都要跌近４巴仙收４２﹒５銀，銀娛（０００２７）就同５０大關說再見，碌
低２﹒６巴仙收４９﹒３銀。

＊滬港通就緒港所再蠢動，券商輕舉步留力不前衝＊

　　靜咗一排無咁熱辣辣嘅「滬港通」概念股又有番啲起色，因為生發發（００３８８）主席周
松崗噚日報喜訊，話滬港通工作已經準備就緒，下一步係修改規則，希望可以１０月底正式開通
！缸友聽到之後，今日一開市就掃番啲生發發旁身，散場時就被推高２巴仙收１７７﹒５銀，好
似有反彈嘅跡象咁喎！
　　講開滬港通，又點可以唔提吓班券商股呢！不過鑊氣已大不如前，比較受炒友寵幸嘅第一上
海（００２２７）都只係升４巴仙收１﹒５４銀，但都已叫做唔錯，大隻啲嘅中國銀河
（０６８８１）同國泰君安（０６８３７）都只係升近３巴仙同０﹒５巴仙，而中信証券
（０６０３０）本來都有３巴仙進帳，但散場就打回原形，最終無升跌。

＊禾雀續亂飛價漲成交激，新增六路線港鐵好招積＊
　　
　　反而一班禾雀就愈升愈有，近期炒友最愛嘅中國天然氣（００９３１）唞咗兩日之後，今日
又再強勢起動，以近６﹒８億銀成交爆升近１６巴仙收１﹒９２銀，上市新高在望！仲有好多隻
細股都創超過５２星期新高，好似賽得利（０１７６８）旗下祖國黏膠短纖業務畀大股東睇中，
股價就坐火箭衝高逾３３巴仙收２﹒０１銀，做咗最威水股份。
　　最後要講一講，影響所有香江市民嘅重要新聞！就係政府公布《鐵路發展策略２０１４》，
準備用成千億銀新增六條鐵路路線。雖然港鐵成日壞，又被市民鬧，不過最緊要係幫到股東賺到
錢，鐵路長起長有，港鐵（０００６６）想瘦都難啦，唔怪之得尾市突然升多咗，有１﹒６巴仙
進帳收３２銀啦！請請！　　

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。