極速報價  |  詳細報價  |  互動圖表  |  成交  |  新聞  |  評論  |  影片  |  相關證券  |  公司資料  |  派息  |  賣空
03888 金山軟件
即時 按盤價 升24.100 +0.700 (+2.991%)
相關新聞

28/07/2014 17:34

《小傳日記》再炒滬港通,魚缸衝衝衝;QQ生發發,升得好輕鬆!

  《小傳日記》今日(28日)缸外真係熱到頭頂出煙,企多一陣都有啲頭暈暈嘅感覺;至於
缸內都一樣熱爆,不過呢隻「熱」令到成班缸友開心到暈啦!今朝「孖屐」突然傳出「滬港通」
將會喺10月13號正式開通,雖然祖國嗰邊就話無咁嘅事,香江呢邊又唔肯回應;不過兩地缸
友話之你是堅是流,一於先炒為快。
  A仔場繼續高高高,急升逾2巴仙收2177點,創7個半月新高,熱鬧到不得了!原本香
江今朝開市只係升33點,但見到A仔場咁開心,就梗係慶祝埋一份啦!眨吓眼就升逾200點
,上半埸成功彈高285點至24501點,係2010年11月以嚟高位,仲搞到43隻大隻
佬熊仔受靶,再次血流成河。完場時恆指仲有212點進帳,收24428,已經創下「五連漲
」,夾埋升咗約1041點啦!
  國貨指數都唔弱,埋單彈高79點收11072,一樣連升五日,對得住各位鄉親父老!總
結全日,個市咁強,成交又點會少呀,全日有成854﹒6億銀,比上星期五(25日)多番逾
11巴仙。

*缸外與缸內同樣熱到暈,魚缸五連漲43熊敗陣*

  老老實實,一早都預咗「滬港通」會喺10月正式開通,今次只係傳埋會喺13號登場,根
本就無咩驚天動地好消息出現。不過,呢排個市咁旺,好友當然係將「無消息」變做「好消息」
咁炒!最受惠就梗係港交所(00388)啦,明明市傳有三間祖國錢莊今年都嚟唔到上市,港
所隨時連IPO集資額「梗勁四」都不保,但係缸友都照衝入去掃貨,最高升到去169﹒6銀
,創逾三年佳績,完場時都有逾3巴仙進帳收169銀,成交高達23﹒6億銀,係全日第四大
成交額股份。
  炒得「滬港通」呢個消息,又點可以少咗券商股一份呢?第一上海(00227)係「有成
交,有升幅」嘅代表,全日以2億銀踢高逾兩成,以最高位收市報1﹒31銀。緊隨其次係申銀
萬國(00218),成交就雖然少好多,只得約6150萬銀,不過升幅就有近18巴仙,一
樣咁勁!其他街坊國泰君安(01788)同中國銀河(06881)都有8至9巴仙進帳。
 
*券商收到了你升我又升,內銀追落後交行誇啦啦*

  除咗「滬港通」受惠股落鑊之外,中資股呢排嘅氣勢真係銳不可擋,祖國地主、祖國保險等
等已經輪流炒高,今日就輪到祖國錢莊啦!工行(01398)計劃發優先股「Cap水」
800億人仔。每次提起「Cap水」缸友都嗌怕怕,不過見啲錢係用嚟補充其他一級資本,咁
缸友都好體諒嘅,再加埋瑞銀德銀都出聲支持,叫人買貨,完場時股價唔單止無跌,仲踢高
1﹒5巴仙收市報5﹒28銀添。
  不過,要論升幅表現,工行都要輸畀交行(03328)同民行(01988)一截呀。上
星期五,市傳交行已申請混合所有制試點,如果獲批准,唔排除未來會進一步引入新股東。咁咪
即係可以引入民資?!小傳齋諗,已經有無限憧憬。交行果然不負眾望,全日踢高逾6巴仙收
5﹒81銀,係最叻仔錢莊;街坊民行就獲瑞信選為扶助中小企貸款政策受惠股,全日表現都相
當唔錯,升近4巴仙收7﹒76銀。

*微眾開綠燈QQ有榮焉,科網齊跳舞湯仔最高興*

  講開呢班政策受惠股,不得不提「股王」QQ(00700)今日嘅威水史!話說阿爺終於
肯點頭,批准三間民營錢莊,其中一間就係QQ持股30巴仙嘅「前海微眾銀行」,雖然呢間民
營錢莊註冊資本只係30億人仔,對QQ嚟講簡直係濕濕碎,但係能夠贏咗阿里巴巴飲頭啖湯,
又見到阿爺嘅支持,對未來申請網上金融就更有信心啦!花旗就即刻出報告,睇好QQ上望
144銀,今日QQ喺多重好消息刺激下,就寫上最光輝一頁,高見129﹒4銀嘅最好成績,
完時嗰陣都彈高逾3巴仙收128﹒9銀,單憑個股之力,就推高大隻佬69點啦!
  QQ升得咁勁,帶挈其他科網股都一齊開PARTY,愛將金山軟件(03888)抽高5
巴仙,細細粒嘅TOM集團(02383)急升近14巴仙收1﹒67銀,搶晒風頭。
 
*標普來祝福華南城踢高,金屬與煤炭今天亦風騷*

  中資股當紅,但題材炒來炒去都係得幾個,有時真係幾悶。今日見到靜咗好耐嘅物流股炒上
都醒一醒神。華南城(01668)畀標普將長期企業信用評級上調至「BB-」,刺激炒高近
7巴仙收4﹒23銀,仲破埋十天同廿天線。街坊中外運(00598)都踢高5﹒47巴仙,
收5﹒21銀;不過嘉里物流(00636)就因為阿媽嘉里建設(00683)發盈警,搞到
逆市碌低近1巴仙收12﹒9銀。難得魚缸有「新星」,希望唔會得一日貨仔啦!
  另邊廂,近期炒上嘅有色金屬板塊今日表現都好省鏡,湖南有色(02626)再飆逾12
巴仙,收2﹒71銀。街坊中鋁(02600)都踢高逾4巴仙。另外,煤炭股表現都唔錯,當
中恆鼎(01393)表現最叻仔,升逾8巴仙,收1﹒06銀。請請!

  《編者按》本欄搜羅即日熱門傳聞,惟消息未經證實,《經濟通》亦不保證內容之準確性
       本文只供參考之用,並不構成要約、招攬或邀請、誘使、任何不論種類或形式之
       申述或訂立任何建議及推薦,讀者務請運用個人獨立思考能力自行作出投資決定
       ,如因相關建議招致損失,概與《經濟通》、編者及作者無涉。

備註: 即時報價更新時間為 28/03/2024 18:00
  港股即時基本市場行情由香港交易所提供; 香港交易所指定免費發放即時基本市場行情的網站
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力