《小傳日記》ＰＭＩ曳曳，Ａ場好氣勢；排隊等放榜，國貨先失威！

　　《小傳日記》Ａ場噚日（２３日）創下九連升佳績，唔少缸友都驚「高處不勝寒」。今朝匯
豐中國３月ＰＭＩ初值得番４９﹒２，唔單止跌晒眼鏡，仲創埋１１個月低位，認真肉酸，而Ａ
場上半場亦調頭碌低超１巴仙。之不過，有時Ａ場並唔係可以用常理去分析，只係食完個午飯，
Ａ場缸友已經唔記得咗ＰＭＩ係乜東東，又再衝入市掃貨，結果竟然Ｖ型反彈，倒升ＤＤ收場報
３６９１點，完美示範「十連升」，勁！
　　相對地，香江缸友就明顯審慎得多，見到祖國數據差，而且嚟緊就係中資金融股放榜嘅高峰
期，風頭火勢下都決定離場觀戰。恆指最終收跌９４點報２４３９９，又跌穿５０天線（約
２４４２９）；國貨插得仲勁，碌低１７２點報１２００５點，全日主板成交８９７億銀左右。
　　老老實實，小傳對祖國錢莊嘅成績表就無咩太大期望；恆指短期想上番二萬五都唔係咁易，
睇嚟都要反反覆覆番一陣子先有明確方向架喇！

＊Ａ場十連升香江唔多醒，壽仔與內銀粉絲頭擰擰＊

　　祖國魚缸試完高位之後急插，埋單輕微倒升，但一班中資金融股就成個阿伯咁，有氣落坡，
無氣上斜。藍戰士國壽（０２６２８）今日收市之後派成績表，大行預計全年多賺３０至６７巴
仙，分歧都幾大。唔知係咪呢個原因，缸友都唔夠膽偷步炒業績，今日股價軟１個巴仙，收報
３３﹒１５銀。
　　另外，幾間祖國最大嘅錢莊都會陸陸續續出業績，工行（０１３９８）今日表現最差，唔見
咗近兩巴仙，收報５﹒５８銀。建行（００９３９）、中銀（０３９８８）分別軟１﹒４％同
１﹒１％。
　　呢幾日Ａ仔場成交勁到不得了，可惜市況太ｃｈｏｋ反而令缸友心存戒心，券商股有散水跡
象。中信証券（０６０３０）舊年多賺３１巴仙至１１３億人仔，股價唔見咗３巴仙有多，收報
２６﹒７５銀。街坊海通（０６８３７）、銀證（０６８８１）跌約３巴仙左右。

＊券商唞大氣長汽好夠氣，鐵路轟隆隆今天逆市起＊

　　長汽（０２３３３）今日開曬Ｔｕｒｂｏ，噚日放榜後畀多間大行升目標價；今日巴克萊就
矛盾Ｄ，升目標到４２銀，但就繼續叫人減貨。結果今日隻股都漲近２巴仙，仲創埋新高
５３﹒４銀。
　　比亞迪（０１２１１）今日就開後波，因為有報道話ＴＥＳＬＡ已獲發深圳新能源牌，揸新
能源車可以喺特定日子有好多優惠，包括過路費、充電費同埋停車費等等，似乎要同比亞迪爭飯
食。而工信部公布上個月有３４２１架新能源車免收車購稅，比亞迪嘅「秦」佔咗四成有多，但
都唔係好點幫補到個股價。今日股價都係唔爭氣，跣低近３巴仙，慘。
　　有隻鐵路相關股表現都好突出，南車時代（０３８９８）放榜後話今年訂單多兩成，巴克萊
亦出嚟唱好，升目標價到６６銀，以反映上年業績同埋管理層對前景感樂觀，股價即踢高６巴仙
。街坊中鐵（００３９０）今日跟升２巴仙。

＊陸發發合景放榜齊跳舞，四叔夠疏爽搶高來慶祝＊

　　祖國地主大哥中海外（００６８８）全年賺近２７７億按年多近兩成，勁，派息３５仙，同
時阿媽科水畀佢，有成４２８億，結果今日踢高近３巴仙。合景泰富（０１８１３）同樣派咗成
績表，純利都係升近兩成去到３２﹒７億人仔，派３３分息。主席孔健岷話公司主要做一線城市
生意，所以嚟緊表現都有信心，股價今日大升７巴仙。
　　本地地主成績表就相對無咁靚，恆地（０００１２）上年賺多半成左右，純利近１６８億，
派７６仙，派息多咗２仙之餘仲照舊１０送１紅股，有豬肉派缸友緊係搶住要啦，今日都踢高近
４巴仙。街坊長和（００００１）經過回吐後終於重拾升勢，踢高半個巴仙。
　　大大隻嘅渣打（０２８８８）畀摩通睇中，話佢遷冊會釋放銀行價值，仲升目標價至折合
１４４﹒６７銀，評級升到去「增持」，刺激股價升近半成收１２９﹒７銀。

＊渣打似否極藥業更好景，阿爺夠關顧科網高高高＊

　　早排兩會無乜醫療改革消息，缸友對藥股嘅憧憬煙消雲散，個別藥股今日似乎有啲鹹魚翻生
徵兆。聯邦制藥（０３９３３）出咗溫馨提示，預期全年溢利會激增１２倍，刺激股價飆高１７
巴仙有多，收報３﹒７３銀。已經派咗成績表嘅泰凌醫藥（０１０１１）繼續有好表現，彈高咗
逾７巴仙，收報１﹒７銀。
　　「互聯網＋」概念繼續發酵，金蝶（００２６８）同金山（０３８８８）話會拍住上開發雲
端業務，兩股齊齊造好。金蝶踢高近５巴仙，收報３﹒１９銀；金山連續３日都有大成交，股價
愈升愈有，埋單有５巴仙進帳，重上廿蚊大關。至於差啲畀孖屐遺忘嘅手遊股呢排靜悄悄起革命
，周四（２６日）會出業績嘅雲遊（００４８４）有一成進帳，收報１５﹒５銀，街坊挨芝芝仲
厲害，抽高１３巴仙。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。