《小傳日記》Ａ場兵敗如山倒，香江狂瀉怎算好！

　　《小傳日記》花旗國道指上星期五（２４日），繼續因為企業成績差，同埋加息周期展開後
，息魔有排唔肯定走，已經插低咗１６３點收１７５６８。美股弱，已經搞到香江今朝
（２７日）一開波就唔見二百幾點，穿二萬五關不特止，就連牛熊線都眨吓眼穿埋，掟貨訊號又
再響起。
　　點知最恐怖嘅時刻仲未殺到，Ａ場嗰邊宣布咗６月份工業企業總利潤跌０﹒３巴仙。老實講
，呢個數據根本唔太重要，但淡友要開戰嘅話，咩理由都可以大開殺戒。結果Ａ場四千關被攻陷
後，就兵敗如山倒，收市重創逾８巴仙收３７２５點，係近８年半以來最大單日跌幅。慘！
　　
＊Ａ仔加息魔屋漏逢夜雨，是日小股災周四更當心＊

　　戰事蔓延到香江魚缸喇，一度被震散最多８４６點至２４２８２，基本上大部分中資股都全
軍覆沒，ＥＴＦ孖寶齊齊插低６至７巴仙，內險、油股、科網股等都傷亡慘重。完場時，恆指就
蒸發７７６點報２４３５１，國指就插４４８點收１１２３０，全日成交上番千億，約有
１１６２億銀。溫馨提示，今個星期四（３０日）就係香江期指結算日，而星洲Ａ５０期指亦係
同一日結算，小心淡友趁機會又發動攻勢呀！
　　中港魚缸大震盪，藍戰士全線失陷，生發發（００３８８）就當然走唔甩，近３０億銀插近
５巴仙收２０９﹒２銀，又跌向２００大關。券商兄弟們仲死得轟烈，銀證（０６８８１）、中
信証券（０６０３０）同海通證券（０６８３７）都恐慌性瀉１０至１２巴仙！　　

＊生發發券商你傷我更傷，ＱＱ被質低弟弟更惆悵＊

　　至於股王ＱＱ（００７００）都一樣無運行，插足近４巴仙，收報１４５﹒６銀，一次過失
守多條平均線，拖累埋一班手遊股、軟件股向下。當中，博雅互動（００４３４）發盈警，話網
頁遊戲嘅收入下降，上半年利潤會比舊年同期明顯下跌，當然更加冇得留低，全日跳崖近１９巴
仙，報３﹒６４銀。雲遊（００４８４）、網龍（００７７７）一樣誇張，各倒水１４及１３巴
仙。
　　個市弱不禁風，軟件股就起勢畀人沽，傷亡慘重，隻隻雙位數跌幅，中訊軟件
（００２９９）同中國軟件（００３５４）蒸發超過一成。金軟（０３８８８）瀉逾１２巴仙碌
到去２０﹒１銀，保唔住２５０天線，真係欲哭無淚。
　　　　　
＊內房好消息卻當耳邊風，內險ＥＴＦ跌到面都燶＊

　　內地報紙講未來房地產稅徵收或設「豁免徵收面積」。雖然算係好消息，不過，Ａ場大地震
，內地磚頭齊倒冧。保利置業（００１１９）冧低近７巴仙，報２﹒９７銀。潤地
（０１１０９）同恆大（０３３３３）亦唔見咗４至５巴仙。中海外（００６８８）碌低近５巴
仙，報２５﹒２５銀。
　　平保（０２３１８）今日紅股除權兼末期息除淨日，股價亦受Ａ場地震拖累少咗約２巴仙，
報４７﹒１５銀。其他街坊都自身難保，國壽（０２６２８）蒸發咗近６巴仙，報２９﹒０５銀
。太保（０２６０１）及新保（０１３３６）齊齊碌低近５巴仙至６巴仙，傷亡慘重。

＊國美獲注資趁消息掟貨，江南搞批盪４３３狂飆＊

　　國美（００４９３）獲大股東黃光裕注入５７８家門店，涉資近１１３億銀。雖然公司大讚
好抵，但似乎股東唔多認同，復賽後急急跳落１３巴仙，報１﹒２７銀。
　　江南（０１３６６）先舊後新折讓逾１１巴仙配股，淨籌７億銀發展海外銷售網絡同埋投資
電纜業務，似乎同國美一樣唔多獲股東歡心，開賽已急跌，埋單計無咗逾７巴仙，報２﹒０４銀
。
　　科瑞（０８１０９）做開節能業務，無啦啦就諗住涉足埋展覽業務，公司似乎開始有啲不務
正業，難怪復賽後被股東拋棄，趴低咗近３２巴仙咁多，收報０﹒３５５銀，係最差表現個股。
　　相反北方礦業（００４３３）就難得成為股災中嘅生還者，向賣方溢價配股兼發票據收購金
融資訊業務六成五股權。逆風踼高近４５巴仙，收報０﹒２９５銀，係最勁抽個股，厲害！請請
！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。