《小傳日記》缸外不向恐襲低頭，缸內消化加息高收！

　　《小傳日記》缸外世界又有恐襲嘅壞消息傳出，今次不幸地，外交部確認有祖國公民被「伊
斯蘭國」極端組織殺害。國家主席習近平即作出強烈譴責，直斥恐怖主義係人類公敵，堅決打擊
！
　　聽到咁多令人心痛嘅消息，小傳都無晒心機…
　　睇番缸內世界，繼續「股照炒」。花旗國噚晚（１８日）都重拾士氣，就算會議記錄強化加
息預期，但當地魚缸都抽高２４７點收１７７３７，帶旺香江今日衝高３１１點收２２５００，
收復十天及五十天線。Ａ場就踢高逾１巴仙收３６１７，國指都叨光有１３７點落袋，收
１０１９３。
　　大市有升幅，但可惜成交就無乜郁。全日約有６６８億銀左右，整固階段仲未完結喎！

＊大市高高收成交靜蠅蠅，吉利有大計立即嘭嘭升＊

　　吉利（００１７５）睇好電動車孖屐，宣布推出第一架純電動車「帝豪ＥＶ」！睇嚟缸友都
對吉利好有信心，齊齊入市買貨，結果埋單吉利升５巴仙報４﹒１７銀，跑贏晒一班兄弟。雖然
多咗人搶生意，但比亞迪（０１２１１）輸人唔輸陣，收市衝前２巴仙收４６﹒５銀，不甘示弱
！
　　體育股有阿爺關照，當然士氣高漲。當中安踏（０２０２０）就最威水，噚日已經率先衝前
，今日又再漲６巴仙收２４﹒０５銀，就算畀摩通潑冷水，話無咩水位再升，都一度再破頂見
２４﹒４５銀，勁！畀摩通唱好嘅特步（０１３６１）都彈高近４巴仙收４﹒４６銀，其他街坊
李寧（０２３３１）、３６１度（０１３６１）都有２至４巴仙進帳。

＊阿爺來錫錫運動好好好，扮靚股思動昆機忽炒高＊

　　個別零售股炒作，卓悅（００６５３）靜咗咁耐，無啦啦炒高２６巴仙，升破１０天、
２０天同５０天線，黑馬做咗第二勁個股！下禮拜二（２４日）派成績表嘅莎莎（００１７８）
亦有半成進帳；百麗（０１８８０）亦升３巴仙，收報７﹒１５銀，仲做埋最叻藍戰士。
　　昆明機床（００３００）為咗避觸發Ｈ股全面要約，降低Ａ股增發規模，結果復牌亦大升近
２７巴仙，收報４﹒７１銀。
　　半新丁中國創意（０８３６８）錄得近千萬大手，之後炒高近１６巴仙，收報４﹒６２銀，
較配售價０﹒３９銀高１０﹒８倍！上年全年賺得６５０萬人仔都唔夠，但以收市價計市值已達
　５５億，缸友小心啦！
　　爪哇（００２５１）被傳暗盤放灣仔大新金融中心全幢，之後澄清話無收到確實協議，另外
主要股東會配售最多３巴仙持股，結果澄清出咗之後升幅收窄，但最尾仍然踢高一成。

＊傳聞賣物業爪哇升得誇，糖果與三三果創板本色＊

　　俗語有云「贏粒糖，輸間廠」，缸友如果早前追入中國糖果（０８１８２）博反彈，今鑊認
真大鑊。噚日瀉咗逾八成，今日再蒸發近６３巴仙，收報０﹒２６銀，兩日累計無咗９３巴仙，
連續兩日喺最差個股！目前仍高配售價三成。
　　緊隨中國糖果後面嘅就係三三傳媒（０８０８７），今日碌低近３６巴仙，收報０﹒１３４
銀。
　　至於噚日最佳個股數字王國（００５４７）得一日貨仔，今日嘔番１３巴仙出嚟，收報
０﹒７４銀，成交都有逾億元。
　　美克國際（００９５３）終止向ＱＱ（００７００）同ＴＶＢ（００５１１）主席配股，雖
然話個別投資者仍可能參股公司，但都挽回唔到缸友信心。美克復牌碌低８巴仙，收０﹒４８５
銀。

＊內房向前走大象不煩憂，瑞信畀個讚金山確優秀＊

　　金山軟件（０３８８８）噚日獲花旗同瑞信唱好升近４巴仙之後，今日再踢高９巴仙，成交
仲多過噚日，勢頭良好。
　　大笨象（００００５）雖然據報被鬥牛國調查洗錢案，但仍然跟住大市向前走，踢高近２巴
仙，收報６２﹒０５銀。
　　祖國地主今日就無咩運行，據報四大行業包括金融、建築、內房同生活服務營改增有望明年
第一季公布，嚇到祖國地主腳軟軟，中海外（００６８８）唔見近２巴仙，收報２６﹒１５銀，
係表現最渣藍戰士；潤地（０１１０９）升１巴仙，報２１﹒４５銀；萬科企業（０２２０２）
就唔見近２巴仙。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。