《小傳日記》魚缸高位唞陣先，公用三寶出頭天！

　　《小傳日記》最近缸外掀起咗一股「冰桶挑戰」熱潮，幾有錢，幾出名嘅人都玩埋一份，齊
齊自淋冰水，做善事之餘，又夠晒透心涼，認真過癮！
　　講番個市，噚日（１９日）尾市熱情過後，今日（２０日）也要涼一涼，喺２５１００水平
浮浮沉沉，全日高低波幅都只得１３４點，簡直悶到瞌眼瞓…不過點都好，完場都袋番３６點落
袋收２５１５９，係連續第二日企穩於二萬五樓上，總算係一個好兆頭。國貨佬指數就無晒癮，
要碌低３８點收１１０５５。大悶市之下，全日成交都有７０４億銀左右，都算唔錯了。
　　就喺呢個時候，摩通突然化身「大好友」，話如果大隻佬指數今個星期埋單時，都仲企得穩
呢個重要大關，咁下一站將會喺３２０００點，即係再見２００７年高位！究竟呢位大好友嘅預
言有幾準呢？小傳都要拭目以待。

＊昨日熱烘烘今天涼浸浸，摩通認真牛上望三萬二＊

　　今日個市牛牛皮皮，但其實「股王」ＱＱ（００７００）就靜靜起革命，唔聲唔聲上番
１３０關樓上，收市仲踢高近２巴仙報１３１﹒９銀，成功收復番十天線（約１３０﹒７８銀）
。如果之後幾日都繼續收高於十天線，話唔定好快又準備新一輪升浪喎？！
　　只可惜，ＱＱ嘅強勢帶挈唔到「愛將」金山軟件（０３８８８），皆因金山自己唔爭氣，中
期只係多賺近７巴仙至３﹒６４億人仔，盈利增幅大大減慢，嚇到粉絲們「無鞋挽屐走」，搞到
一度急插８巴仙至２２﹒２５銀，連２５０天線都穿埋，雖然收市時就跌少咗，但都要唔見近４
巴仙收２３﹒３銀，成交仲要急增至近１０億銀，沽壓都唔輕，仲留守嘅粉絲就要坐穩啲啦。　

＊ＱＱ靜雞雞重越百三銀，金山欠亮點唯有打倒褪＊

　　另一邊廂，有對「父子兵」喺噚日收市後放榜，中行（０３９８８）中期多賺１１巴仙至
８９７億人仔，只係啱啱符合市預期。今日成班大行蜂擁出報告，普遍嚟講，都話如果唔計撥備
前嘅盈利，其實盤數都算唔錯，但就要小心不良貸款嘅問題。成班大行畀嘅目標價都有幾大出入
，當中高盛就覺得中行只係中規中矩，予「中性」評級，目標價３﹒８銀，而里昂就話買得過，
上望４﹒４銀添！睇番中行今日表現，收跌０﹒３巴仙報３﹒６７銀，睇嚟缸友都係信高盛多啲
喎。
　　至於囝囝中銀香港（０２３８８）就搶晒阿爸風頭，半年賺逾７巴仙至近１２１億銀，淨息
差擴大至１﹒７４巴仙。花旗大讚份業績符預期，話中銀香港係行業投資首選咁話，結果中銀香
港以１３億銀成交額大升近３巴仙收２６銀，唔單止創年半新高，仲做埋第三叻仔藍戰士。真叻
仔！

＊大行睇中行認真夠分歧，中銀靚爆鏡要多謝花旗＊

　　正所謂「有麝自然香」，業績夠省鏡嘅話，缸友又點會唔支持呢？！好似砵砵車股近排無晒
聲氣，鬼死咁無癮。但華晨（０１１１４）噚日收市之後放榜，中期多賺近八成至３６億人仔，
當中，拍住寶馬一齊搞嗰間合營華晨寶馬，成績一樣咁靚仔，半年盈利急升７６巴仙至
３６﹒９１億人仔。對於有錢嘅強國人嚟講，名車就係身份象徵，華晨寶馬想唔賺錢都難啦！不
過瑞銀就提一提大家，小心華晨下半年銷售會減慢，開支又會大咗，繼續畀「中性」評級，目標
１５﹒３銀。搞到本來一度抽高近７巴仙嘅華晨，完場時得番逾２巴仙落袋收１４﹒５２銀。
　　雖然升少咗，但點都慘唔過合生元（０１１１２），中期盈利增長雖然慢咗ＤＤ，但粉絲完
全唔收貨，齊齊決定掟貨走人，搞到收市要急瀉近１１巴仙，只得３３﹒０５銀，仲創埋逾５２
周新低。

＊華晨失尾陣合生元捱沽，中移再唞唞公用顛一顛＊
　　
　　如果缸友真係求穩陣，可以繼續留意番啲藍戰士，噚日同大家提過嘅「公用三寶」今日都仲
好神氣，當中煤氣（００００３）就吐氣揚眉，急升逾３巴仙收１８﹒３６銀，距離上市新高約
１９﹒２４銀愈嚟愈近，仲做埋第二威水藍戰士！中電（００００２）、同電能（００００６）
都唔失禮，分別踢高逾１巴仙及近２巴仙，一齊開Ｐａｒｔｙ。
　　至於朝著「紅底股」衝嘅祖國移動（００９４１），雖然已經否認咗「炒人」傳聞，但都難
免向下跌一跌，唔見逾１巴仙收９４﹒７銀。同樣係近排焦點嘅生發發（００３８８），今日就
微升０﹒２巴仙收１８４﹒５銀，但原來完場前一度上番１８５銀，喺自２００８年１月以來高
位，想當年因金融海嘯坐艇嘅缸友，終於見到家鄉啦，恭喜！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。