按盤價 
《小傳日記》當大市旺嘅時候，真係唔使有咩實際理由，都可以大炒特炒。噚日（２８日）
無端端翻炒「滬港通」，加上Ａ仔場咁勁，大隻佬踢高二百幾點都好正常。不過，今日（２９日
）阿爺突然開抽濕機，Ａ仔場又回緊氣，點知香江一樣可以靠大象（００００５）同一班地主佬
衝高２１１點，收２４６４０，真係夠晒巴閉！
仲有生發發（００３８８）都出咗唔少力！今日畀德銀讚一讚上望２０２銀之後，就即刻飛
咗上去最高１７５﹒５銀，仲以近３６億銀抽升逾３巴仙，報１７４﹒９銀，成交額遠遠拋離全
部對手！
今日畀本地薑搶晒鏡，國貨指數就難免黯然失色，只係跟勢踢高４９點收１１１２２。總括
全日成交，有成８８６﹒６億銀，交投依然咁旺。
＊魚缸六連漲淡友好寂寞，德國佬祝福生發發落鑊＊
呢排生發發同「股王」ＱＱ（００７００）做咗「風頭躉」，ＱＱ一向都多多計劃，嗰頭獲
批搞民營銀行，依家又話進軍網上教育，另外又同旗下京東商城合作，喺祖國賣埋Ｘｂｏｘ
Ｏｎｅ遊戲機，名副其實「百足咁多爪」，股價就當然又創新高見１３０﹒９銀，完場仍升逾１
巴仙見１３０﹒４銀，勁！
不過唔好漏咗大象嘅功勞，雖然大象無咩好消息傳出嚟，但係密密耕耘嘅佢，原來不知不覺
間，已經由約７８銀升番上去８３﹒２銀，今日仲為大市貢獻咗４１點，係最出力嘅大隻佬！
一班香江地主喺下半場亦都好落力，除咗等緊花旗國周四（３１日）凌晨公布議息結果之外
，原來大摩轉口風，話估樓市會繼續升，仲調高地主目標價添！周四放榜嘅超人（００００１）
今日預早破頂慶祝，埋單有近３巴仙進帳收１４７﹒１銀，「囝囝」和黃（０００１３）都抽高
１﹒５巴仙。不過最勁非新地（０００１６）莫屬！佢單「世紀審訊」全城關注，隻股今日就急
升逾４巴仙收１１２﹒３銀，創逾一年新高外，以黑馬姿態奪得最威水大隻佬添！
＊百足咁多爪ＱＱ仍風騷，地主返來了你高我更高＊
魚缸鑊氣咁猛，成班中華兒女都升咗唔少，但大行們仍然繼續密密掃，祖國錢莊、祖國保險
都仲有力衝。富瑞發表研究報告話，上半年壽險業務嘅基本因素好過預期，新業務價值增長夠晒
「Ｓｕｒｐｒｉｓｅ」，達到雙位數增長，比市場預期的單位數仲高。前景咁美好，自然成為追
捧對象。國壽（０２６２８）飛升３﹒２巴仙，報２２﹒９銀；平保（０２３１８）踢高１﹒８
巴仙，報６６﹒３銀。
祖國錢莊聲勢都好浩大，交行（０３３２８）話，而家關注緊國家喺混合所有制經濟同埋金
融體制改革等方面嘅要求，積極研究緊深化混合所有制改革、完善公司內部治理機制嘅可行方案
，要推動改革咁話。今日交行一度見５﹒９３銀創逾一年新高，收市就回番啲報５﹒８５銀；民
行（０１９８８）仲勁，踢高近３巴仙報７﹒９９銀。中行（０３９８８）亦有約１巴仙進帳，
報３﹒７４銀。
＊內險續受捧壽仔好靚仔，交行與民行今天誇啦啦＊
阿爺對樓市愈來愈鬆手，杭州今日起就局部鬆綁樓市限購，一眾祖國地主自然打算應聲提高
個價。龍頭中海外（００６８８）繼續踢高，收升近兩個巴仙報２３﹒１５銀；碧桂園
（０２００７）彈高近３巴仙，潤地（０１１０９）亦唔差，升約１巴仙左右報１７﹒３８銀。
祖國電訊表現都唔錯，蘇寧雲商（深：００２０２４）今日宣布同聯通（００７６２）４Ｇ
達成戰略合作，雙方將從終端產品推廣、虛擬運營商等業務領域進行合力推廣。聯通表現強勁，
收市踢高２﹒７巴仙，更加見過１３﹒７６銀創超過兩年新高；中電信（００７２８）亦升近２
巴仙；中移動（００９４１）係咁易升０﹒７個巴仙。
＊阿爺鬆鬆手內房笑笑口，魔音忽飄來海螺逆市跌＊
噚日Ａ仔場急升逾２巴仙，創７個半月新高，衝得咁急，難怪今日要唞下氣！國貨指數雖然
無大隻佬升咁多，但都繼續創下「六連升」。今日比亞迪（０１２１１）就做咗最靚仔國貨佬。
話說北京今年計劃新增１３００架電動出租車，雖然數量唔算好多，但係就肯定係非常好開始，
話唔定其他城市都有樣學樣呢！憑住無限憧憬，比亞迪今日踢高６巴仙，收５２﹒７５銀！
正所謂「有人歡喜有人愁」，魚缸呢排熱炒滬港通，不過都唔係隻隻股份可以受惠。大摩今
日出報告話，「滬港通」或者會收窄海螺（００９１４）（滬：６００５８５）ＡＨ股之間嘅差
距。望返海螺Ａ股股價得１７﹒８５人仔，低Ｈ股咁多，咁即係意味著Ｈ股隨時未跌完啦！結果
海螺Ｈ股今日碌低逾３巴仙收２９銀，做咗最差國貨佬。
仲有海通證券（０６８３７）同華南城（０１６６８）都畀股東掟貨，分別套現１７億同
１０億左右，唔怪得兩個股價都要逆市碌低逾２巴仙及近６巴仙啦！請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
