按盤價 
《小傳日記》花旗國魚缸噚晚（１８日）認真熱鬧，先係烏國局勢降一降溫、又有企業宣布
近百億美金大併購等好消息，刺激道指飛升１７５點收１６８３８；納指仲誇張，抽升近１巴仙
收報４５０８點，創逾１４年新高！
缸友一心以為香江魚缸今朝（１９日）都應該可以叨吓光，係咁易都升番百幾點啩！點知，
阿爺宣布抽水３００億人仔，Ａ仔場又呆呆滯滯，搞到香江呢邊一開市只係升９０點後就無晒力
，下半場仲嘔番晒所有升幅，一度倒跌４６點添。點知說時遲，那時快，兩大濠賭一哥發力，成
個市氣氛即時唔同晒，大隻佬指數突然倒升番最多２４５點，完場成功收漲１６７點報
２５１２２。不過，國貨佬指數就只得２９點進帳，收１１０９４，又要得個「恨」字啦。
雖然完場前成交急增，但係全日成交都只係多番ＤＤ，約７２４億銀左右。
＊完場一小時魚缸突急漲，銀娛派成績街坊同向上＊
數數手指，業績期已經過咗一半，今日大隻佬可以強勢反彈，都係全靠班放咗榜嘅「藍戰士
」！論大隻，就梗係要講銀娛（０００２７）先啦，中期盈利雖然增加２９巴仙至近６０億，差
過預期，但係ＥＢＩＴＤＡ創新高，兼派特別息，氹到班粉絲勁開心，齊齊入貨支持，銀娛成功
發力追落後，急漲逾３巴仙收６１﹒９銀，仲帶挈埋金沙（０１９２８）跟漲２巴仙收
５４﹒２５銀，其他街坊都升２至３巴仙。
若果論最威水表現，相信潤地（０１１０９）敢認第二，都無人敢認第一！中期盈利增加逾
１３巴仙近５０億銀之外，管理層仲拍心口，話祖國樓市氣氛好咗，所以有信心完成７００億銀
賣樓目標。既然公司咁有信心，股價就梗係率先反映出嚟啦，全日爆升近８巴仙收１８﹒１８銀
，缸友都睇到「嘩嘩聲」！就連龍頭祖國海外（００６８８）都唔執輸，袋番逾１巴仙落袋。
＊賣樓好錢途潤地高高收，中移小回氣有貨無煩憂＊
除咗成績之外，缸友都好關心，呢排威到盡嘅祖國移動（００９４１）究竟可唔可以做番
「紅底股」？！其實祖國移動已經連升咗四日，今日仲一度再創六年新高去到９６﹒５銀，計一
計數，即係已經累升咗近１３巴仙，以一隻巨無霸嚟講，已經係「頂呱呱」嘅表現。所以，今日
點都要唞唞，曾經回番去９４﹒７銀水平。不過，估唔到唞唔夠大半日，缸友已經忍唔住衝入去
買貨，最終祖國移動收市都去番９５﹒８銀，睇嚟今次真係好有機會做番「紅底股」噃！
ＱＱ（００７００）完場前明顯跟市升多咗，去番１３０﹒８銀，不過持久力唔算太夠，最
終只輕輕踢高０﹒８巴仙收１２９﹒８銀。市傳ＱＱ晉級競投中石化（００３８６）母公司旗下
油品銷售業務股權，呢單消息睇嚟刺激不大喎。
至於聽日（２０日）除息嘅大象（００００５）雖然無咩消息，但都成功倒升番０﹒３巴仙
報８３﹒７５銀，值得一讚！隻小象（０００１１）仲靚，彈上新高１３１﹒８銀收市，升
１﹒５％。
＊小象好靚仔皆因好息徒，上石化爆升海油失尾陣＊
上面嗰班藍戰士就攞晒威，其實中海油（００８８３）今日都一度嘗過做「風頭躉」嘅滋味
。話說，俄烏德法四國嘅外長喺柏林有個會議，市場就憧憬進一步化解烏國危機。之前因為油價
上升受惠嘅中海油，今日有瑞信出面護航，將評級升至「中性」，目標價由１１蚊升到１３﹒５
蚊。幾樣因素加埋，刺激中海油早段試過抽高４巴仙有多，氣氛一時無兩。點知，之後發軟蹄，
碌番晒落嚟，升幅全銷。好彩，最終都有１巴仙進帳，收報１５﹒４銀，總算無咁失威。
至於街坊中石油（００８５７）、中石化都齊齊有約１巴仙進帳。而中石化囝囝上石化
（００３３８）（滬：６００６８８）今日就升得好靚仔，下半場突然踢高近一成，創三年半高
位，完場時都仲抽高逾６巴仙收２﹒６８銀，Ａ股仲漲到停咗板，夠晒光宗耀祖。
＊大市停不了公用照樣追，領匯望染藍今天仍然帥＊
個市突然之間咁旺，就連平時比較低調嘅藍戰士「公用三寶」都忍唔住要發力，中電
（００００２）、煤氣（００００３）、電能（００００６）全部都創晒超過５２星期新高，分
別踢高１﹒５巴仙、逾２巴仙及０﹒５巴仙，收６６﹒７銀、１７﹒８銀及７３﹒１銀。
啱啱獲批買ＩＢＭ低端伺服器業務嘅聯想（００９９２）仲勁，畀里昂出報告唱好後，股價
就繼續向上衝，今日仲一度高見１２﹒１銀，係２０００年３月以來新高添呀！完場時都企穩喺
１２銀高位，係第三威水藍戰士。
大有機會染藍嗁領匯（００８２３）就宣布向嘉里（００６８３）買黃大仙商場，畀瑞銀同
巴克萊唱好，股價又一度破頂見４６﹒７銀，收市報４６﹒５５銀升逾３巴仙，勁！請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
