《小傳日記》Ａ場再跪低，香江續閉翳！

　　《小傳日記》老老實實，希臘嗰邊搞咗咁耐，缸友都無心機再理，只能等佢哋快Ｄ傾點數。
照目前形勢嚟講，法國同德國都唔算企得超硬，似乎仲有轉彎餘地；阿Ｑ啲睇，希臘未必一定被
踢出歐元區，危機仲有望解決嘅！
　　反之，Ａ場依家所面臨嘅危機，仲更加令人心寒。救市無效，Ａ場又碌低逾１巴仙，創業板
繼續重推近６巴仙，幾乎所有股份跌停或者停賽，見對咁嘅市況，試問仲邊有缸友敢掟錢入海呢
？！
　　Ａ場一日未好轉，香江高開之後好快又繼續成為「提款機」，今日（７日）再錄得近
１７２５億銀成交，再碌低２６０點報２４９７５，又守唔穩二萬五，國指再成為重災區瀉
４０４點報１１８２７。

＊高開不持久跌開不用唞，生發發券商繼續大低收＊

　　魚缸咁弱，生發發（００３８８）就梗係走唔出淡友手指隙喇，唔單上跌穿過噚日低位，仲
連喺２２０銀嘅「血肉長城」都正式陣亡，最低曾２１８﹒４銀，傷亡慘重，收市就報２２２銀
，係最差表現藍籌股。生發發已經差唔多去番４月初，升市「大時代」之前嘅水平，２００銀大
關真的不能失了。
　　另一位重磅藍戰士友邦（０１２９９）抗跌力強到不得了，基本上喺「五窮六絕」兩個月入
面，佢都無咩點跌，呢排去到百天線（約４９﹒５銀）就企番穩，今日仲逆市升逾１巴仙收市報
５０﹒０５銀，屬長線之選！

＊Ａ仔唔多妥內險暈陀陀，你插我又插難復笑呵呵＊

　　連番急救下Ａ仔場雖然噚日迴光返照，今日仍然要向下，搞到券商股今日仍然未止瀉！三位
半新丁廣發（０１７７６）、華泰六八八六（０６８８６）同埋國聯證券（０１４５６）今日跌
幅介乎８巴仙至１２巴仙，Ａ股嗰邊托市之下廣發同華泰六八八六ＡＨ溢價已高達八成左右！國
泰君安（０１７８８）、海通證券（０６８３７）齊齊碌低１３巴仙。
　　Ａ仔場唔掂，自然都諗起內險股，不過跌幅溫和過券商好多。平保（０２３１８）連９０蚊
都跌穿過！好彩收市唔見近４巴仙報９１﹒３銀，如果收市價連９０蚊都守唔住，可能要下試
８２蚊左右先有支持啦。街坊太平（００９６６）同新保（０１３３６）就更無眼睇，各蒸發９
及１０巴仙，慘。

＊大象與長和逆市撐到行，歐洲一鑊泡思捷更頭痕＊

　　歐洲佬都唔知點搞，希臘壇嘢家陣真係「剪不斷、理還亂」，令人捉摸唔透後市會點走。缸
友就觀望神話國同歐元區其他成員國債務商談結果，令到歐洲業務比重大嘅股份普遍回升返，當
中大笨象（００００５）就逆流而上近１巴仙收６８﹒４５銀。不過有風話突尼西亞政府反對公
司同瑞士和解，反對大笨象向瑞士支付４０００萬法郎，缸友小心有變數呀。街坊渣打
（０２８８８）就無乜變動，逆市企穩報１２３﹒３銀。
　　而喺環球都有好多業務嘅長和（００００１），今日都踢起１巴仙報１１０銀，距離上番百
天線只係差ＤＤ咋！不過歐洲經濟一鑊泡，會唔會影響埋啲人「濕平」嘅意欲呢？一向水皮嘅思
捷（００３３０）繼續跌低逾３巴仙報６﹒８７銀。

＊市況多凶險公用避一避，ＱＱ微微軟街坊卻痛悲＊

　　噚日（６日）香江魚缸急插８２７點，搞到缸友心慌慌，避險公用股即刻大派用場，做跌市
避難所，中電（００００２）逆市踢高逾１巴仙，收報６６﹒１銀；煤氣（００００３）同埋電
能實業（００００６）齊齊唔見唔夠１巴仙，但都係跑贏大市！
　　科網股今日繼續向下插，大隻佬藍戰士ＱＱ（００７００）作為龍頭，已經算係科網股中跌
得算少嗰個，淨係唔見超過１巴仙。軟件股隻隻唔見雙位數跌幅，擎天軟件（０１２９７）急瀉
近１８巴仙；中訊軟件（００２９９）更加急插２８巴仙！手遊股都係無運行，ＩＧＧ
（００７９９）轉咗主板，但都難逃一跌，唔見近８巴仙；雲遊（００４８４）更加急跌兩成！
請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。